Ihtirametna

شيت هول

Posted in Writings by johnnyhage on January 16, 2018

ولك شو عم بصير بالعالم يا جماعة…
شو؟
دونالد ترامب شو هيدا…

ترامب إنسان جدّاً خلاق….
بغض النظرعلى إنّو عنصري ومهرج سياسي… هيدي تفاصيل ما… مش مهمّة…
خلاّق الزلمي…كل يومين تلاتي بيتحفنا بشي أخو محلوشي…

هيدي ما كناّ نشوقها عإيّام أوباما…
صحيح، إنّو مع كلّ تخبيصة بروح ملايين الناس بالمغليطة…
لكنو كرياتيف الزلمي….

هيدا وجه من الديموقراطية الوهمية اللّي عم تنتجها وتصدرها الأسواق الأميركية للعالم…

طيّب…. شو في أخبار غير هيك…
من هيدي الميلة من العالم…
كمان ترامب… ما غيروا…
من يومين…
وصف البلدان الأفريقية ب ” شيت هول”
“جورة الخرا” يعني بالعربي…
أصلا أصلا…
ما بعتبر في تعبير أقل خرائي
ممكن يطلع من إنسان هيك خرائي…
ما قلتلكن كرياتيف…

هلّق في عالم من كلّ العالم عم تتظاهر ضدو…
ومبارح لغي زيارتو اللّي كان لازم يقوم فيها على لندن…
أنا أكيد انّو المظاهرات كلّ يوم رح بتزيد…
لأنّو الزلمي كلّ يوم رح يكبر وتكبر الكرياتيفيتي معو…

طيب…عالسريع… شو في أخبار تانيي؟
ريال مدريد نادي الإسباني مبارح خسر 1-0 عأرضو عن جديد… نعيماً…

من هيديك الميلة من العالم…
اسرائيل والهند… على ما يبدو إنّو عم يتّجهو إنّو يصيروا عصافير حبّ…
نتنياهو شنغلّو شي 100 businessman وجّرن عالهند…
ليمضوا اتفاقيات تعاون بمجالات الامن، والطاقة، والفضا (صح، صارو عم يحكو بالفضا الجماعة)، والإنتاجات السينمائية مع “بوليوود”
هلّق الدولة الصهيونية عم تغري المنتجين الهنود بتمويل الأفلام وتخفيض الضرايب اللي بينتنج عن إنتاج الأفلام… كرمال يروحو يصوروا افلامن بفلسطين المحتلة… ويروجوها كمنطقة سياحية…

ع فكرا … في فيلم إسمو “بيروت” نازل جديد عالصالات الأميريكية…
وبيفرجي بيروت بالطريقة اللّي مش متل ما هييّ.. حلوي هيدي عالقافية…
بسّ لتعرفو شو عم نحكي… الفيلم هوّي عن بيروت…
لكن ما في ولا أي شغلة بتشبه بيروت…
صوّروه بالمغرب الجماعة….

من هيدي الميلة من العالم…
عنّا بمونتريال… المدينة مغطّاية بالتلجات….
لدرجة إنّو العالم مش عم تعرف وين صافّة سيّاراتها….
أصلاً ولو عرفوا… هالشي ما بيعني إنو السيارة
رح بتدور أو رح تمشي….
بسّ إنّو بطمن بالو الواحد…
على كلّن…
انشالله اليوم الحرارة رح توصل عنّا للناقص 38..
أنا عم فكّر فوت إتدفى بالبرّاد….
مع إنّو في ناس بعرفهن رايحين يعملو “يوغا إن ثي سنو”…
والله ليوقف دمّن…

من هيديك الميلة بالعالم…
من بيروت بالتحديد…
“فيرجين ميغاستور” بوسط المدينة… عم بسكّر…
المبنى اللّي كان دار أوبرا بالزمانات….
واتحوّل ل “فيرجين ميغاستور” بال 2001،
هلّق بعد 17 سنة عم بسكّر…
أنا محّل وزير الثقافة…
بشتغل على إنّو الدولة تشتريه وتردّو دار أوبرا…
لأنّو بلبنان كلّو ما فيش عنا دار أوبرا…
ولاّ أنا غلطان… أكيد لأ…
دخلكن مين وزير الثقافة هلّق…
أه… إي انسو الموضوع…

بنفس الوقت شكراً لعمّو جبران باسيل لأنّو اكتشفتلنا النفط ببلدنا… يعني لولاك… ما بعرق شو كنا عملنا..
وشكرا يا عمّو لجبران لأنّو جبتلنا جبران يحكم بلدنا
وانشالله كل يوم منكتشف شي جديدي عن بلدنا..
وعن الكذا عمّو اللّ حاكمين بلدنا…
عشتم وعاش لبنان…
(النشيد…)

خبرية جديدة… من هيدي الميلة من العالم…
كيم كارداشيان…
النجمة الأميركية الشهيرة الفارغة…
صار في عندا سطل زبالة جديد…
من ماركة لوي فيتون….
فرجتنا ياهن عحسابها لإنستاغرام…
والعالم راحت فيها…
بهالوقت الطفلة المقاومة الفلسطينية عهد تميمي بعدها بالحبس لأنّو سفقت كف جندي إسرائيل….
والعالم العربي متل إجرو…
لا مش متل إجرو… عم يعمّلها شير عالفايسبوك…

وأنا محلكن … كمان بعمل شير لهيدا الفيديو…
خلّي العالم تعرف شو عم بصير…
ليش لأ….
إحترماتنا…

 

Advertisements

انشالله بتفاجئوا حالكن

Posted in Writings by johnnyhage on December 31, 2017

 

شو حلو لمن الواحد يعمل شي ويفاجىء حالو…
مش ياخد قرار إنّو لازم يعمل شي  ليفاجئ حالو…
ويقعد ويخطط ويفكّر وحللّ
لأ….
شو حلو لمن ينفّذ…
فففففففف……
لمن يعمل شي… هيدا المهم… يعمل شي…
يعني اذا اخد قرار… وحلو ياخد القرار….
لازم يشتغل إنّو ينفّذو…
لأنّو إذا ما نقّذوا…
بكون اخد قرار…
ورجع اخد عخاطرو كيف إنو ما نفّذ هالقرار

بعرف إنّو اليوم وبكرا…
رح تنهال عليكن المعايدات بمناسبة راس السنة…
منها رح بتكون سلسة… ومنها دجّة….
والأكيد منّو إنّو رح نتفلئو معايدات…
ومادام رح تنفلئو…. معايدة منّي بالزايد…
ولا رح بتقدّم ولا رح بتأخّر…
فانشالله ال2018 تعملو كتييييراشيا…
وتفاجئوا حالكن فيها…
هلّق إنتو بلشو بشغلي وحدي… والباقي بكرّوأ

أنا من جهتي…  رح ارجع اكتب…
وارجع اتحفكن اسبوعياً…
بافكاري…. اللّي ما بفتكر انّو في كتير بفكروا فيها…
مش لأنّي حدن مميّز زيادة عن اللّزوم…
لاء..
لكن يمكن لأنّو هيدي الأفكار..
غريبة لدرجة…. ما عدش حدن عم يطرحا….
أو بركي مش كتير غريبة…
بركي…شو بعرفني… قريبة من طريقة تفكيركن…
لكن..مستحية تطلع للعلن…
لئن…. شو بعرّفني ليّ مستحيّة

ف…. رح تسمعوا منّي قريباً

احترماتنا

ثورة مباركة

Posted in Writings by johnnyhage on March 18, 2017
o-REVOLUTION-FIST-facebook
بالفيديو
كل مرّة كنت اتمنّى إنّو يصير في ثورة بلبنان…
كنت اطلع غلطان…
كنت انفئس… وقول العما بقلبنا كيف إنّو نحنا اللّبنانية
قاعدين عخازوق صممّولنا ياه الزعما والنوّاب اللّي انتخبناهن..
طيب ما العما بقلبنا….
هنّي اعكاريت …. ونحنا شعب صايع وضايع…
هلّق حظّي أنا شخصيا طلع بيفلق الصخر.. وصرلي فرصة إنّو قوم عن هالخاوزق… وافركها…
ففركتها و فل ّيت من البلد…
إي بس أصحابي… وعيلتي… وأهل بلدي بعدن قاعدين عالخازوق….
لأّ.. واتبيّنلي… إنّو كلّ ما بيجو بيتعوّدوا عالخازوق…ويشدّو عحالن ويحاولو يكفّو حياتن بشي طريقة عالخازوق..
بيجو الزعما… وبيفظعو زيادي… وكيف بدّي قلكن…من وقت للتاني… بيحوصوا…وبيجوا وبيبرو الخازوق زيادة… بسنّولو راسو… بروسّو…
ويبدو إنّو هلّق روّسو لدرجي… ما بقا ينقعد عليّ…
صفّى الحلّ الوحيد… إنّو يطير هالخازوق… ويطيروا النوّاب… ويطيروا الزعما…
#ليش_نازل _تتظاهر… لأنّو ما بقا بينقعد عالخازوق…
ولو إنّي بالغربة عم نظّر عليكن من بعيد…
#ليش_نازل _تتظاهر… تما تصير إنت قاعد حدّي بالغربة كمان…
وليكو… اذا ما طار الخازوق… رح نرجع متل الشاطرين نقعد عليه..
فاتّكلو عألله… وثورة مباركة…
احترماتنا…
%d bloggers like this: