Ihtirametna

إهانة هالدويري

Posted in Writings by johnnyhage on February 25, 2018

مش عم بفهم أنا هلّ إنّو هوّي حالة عمى…
ولاّ إنّو ضعف نظر…
ولاّ إنّو غباء….
ولاّ إستغباء…ولاّ شو؟
دخيل عرضكن حدن يتحنّن عليي ويخبّرني…

لأ.. ومبسوطين… وعاملين همروجي…و
ووووووو…
ومزبطين المايك أب ومشنغلين بعضن وساحبين يحضروا الفيلم…
قال لأنّو هيدا أوّل فيلم لبناني بيترشح عالأوسكار….
وبرافو عليّ “زيّاد الدويري” شو إنّو موهوب….
هني هيك حاملين العدّية وماشيين فيها…

هلّق من دون شك إنّو “زياد الدويري” موهوب….
لكن من دون شك كمان إنّو زيّاد الدويري خبيث… ومفظّع…
ومطبّع مع إسرائيل…
ومن دون شك إنّو في عالم بلبنان عم بتشد عمشدّو…

أنا مش عم بقدر استوعب بعدني… كيف إنّو هيدا…
راح عاش 7 اشهر بإسرائيل…. واشتغل مع الإسرائيلية…
وصوّر فيلم باسرائيل…. ورجع إجا علبنان… وفات عادة…
وصوّر قيلم تاني بلبنان…. ولما تذكر القضاء يستدعيه…
طلع إنّو ما في مشكلة…

خبيث لأنّو بدّو يانا نصدّق إنّو هوّي فناّن… وإنّو ما بيتعاطى سياسي…
وإنّو “تركوني إخرج أفلام أنا … ما تفوتوني بالمعمة السياسية…”
يا حبيبي إنت عن شو عم تأخرج أفلام… عن زراعة البطاطا؟
شو هالإستغباء هيدا…

بعدان نحنا بحرب مع إسرائيل ولاّ لأ؟
طيّب كيف هيدا بروح وبيجي وما حدا بيتعاطى معو؟…
لأ وعم يطلع عكلام الناس….
ومارسيل غانم بحاوروا…
وقال أرسل هوّي برقيّة للجيش اللبناني
يخبّرن إنّو رايح عإسرائيل
اكن هنّي ما ردّو عليه…
إنّو اتخايل يردّو عليه يعني…
إنو شو بدّو يكون ردّت فعل الجيش اللبناني
لمّن يجي هيك طلب
إنّو شو متوقّع الدويري…

بعدان شغلي تاني كتير مهمّة…
الدويري راح بال 2013 صوّر فيلم باسرائيل إسمو The Attack….
واظهر الوجه الرقيق والضحية لإسرائيل بصراعن مع الفلسطنيين….
وفرجا إنّو الفلسطينيّ جماعة عدائية وما بيسووا…
بال 2017 بينزل بصوّرفيلم ببيروت إسمو The Insult
عن اللّبنانيي والفلسطنيّي…. وبفرجي فيهن كيف إنّو الفلسطنيي ما بينطاقو…
يعني الفلسطنيي…طلعوا بالفيلمين ما بينطاقوا….
مرّة مع اللّبنانيي، ومرّة مع الإسرائيليّة…
يعنيّ الفلسطنييّ صفّو هني المشكلة المشتركة…
ومش الإسرائيليّة…
شفتو كيف؟

مين مستلملو توزيع الفيلمين للدويري بأميركا؟
صح… كوهين ميديا غروب…
من رئيس مجلس إدارة كوهين ميديا غروب…
صحّ…شارلز كوهين…
شارلز كوهين يا أبو الحبايب… بال 2002 حصل على ميدالية السلام الإسرائيلية بحفل غدا عملتوا الدولة إسرائلية تكريماً لئلو….طيلع هيدا الحفل مبلغ بقيمة 52.4 مليون دولار جمع تبرّعات لدولة إسرائيل…

ونحنا … بعدنا مشنغلين إيدين بعض…
وساحبين نحضر الفيلم…
ووووووو…
والدّولة اللبنانيي بتجي وبتتنى فيلم عاملو واحد عم بطبّع مع إسرائيل…
وبتبعتوعمهرجان البندقية … وبترشحوا للأوسكار…
ووزير الثقافي مكيّف فيه…
ووزير القضاء آخد Sieste…
ووزير الخارجية…. أه عفواً نسيت إنّومش نافع…
والدويري مع اللوبي الإسرائيلي بأميركا
أنا بتوقّع إنّو هلّق بكونو مكيفين…

انتبهو… المشكلة هون مش بفيلم “The Insult”
المشكلة هون بزيّاد الدويري…
وشو عمل قبل  “The Insult” …
ومع مين…
وشو المواقف السياسية اللّي عم يتبناها
من خلال فنّو… وبالإعلام العالمي…
وكيف إنّو لبنان ما عندو مشكلة مع كلّ هيدا….
لا بل مأيّد لكلّ هيدا

قولولي هلّق…
هلّ هّي حالة عمى…
ولاّ إنّو ضعف نظر…
ولاّ إنّو غباء….
ولاّ إنّواستغباء…

وإذا لبنان بدّو يربح أوسكار بهالطريقة…
بلاها الخبرية من أساسها…
لأنّوما في “Insult” أكبر من هيك رح بتكون…
هيدي رح بتكون “The Insult”

إحترماتنا…

 

Advertisements

جايي الإنتخابات

Posted in Writings by johnnyhage on January 22, 2018

جايي الإنتخابات …. وجايي الإنتخابات
جايي الإنتخابات …. وجايي الإنتخابات

ليكو بقبّركن…. ليكو واللّه العظيم بقبّركن…
إذا بعرف … إنّو حدن منكن ….
رح ينتخب بكرا نفس السياسيين….
أو الأحزاب السياسيي اللّي كاينيين…
طول هالمدّة حاكمين….
وجارين البلد تحت تاسع أرض… يعني غرقانين للزلعوم
بمتاهات… شو بّدي قلك هات ايدك والحقني…
مشلشين…مش عم نعرف كيف بدنا نقيمن…
ليكو واللّه العظيم بقبّركن…

بقبّركن إذا بسمع حدن منكن عم بقول…
إنّو ما فيش حدن غيرن نازل…وإنّو نه… بف…مظبوط البلد عم يغرق…
لكن مطّرين نختار بين السيء والأسوأ…
إي لأ… يمكن بالماضي كنتو هيك….
لكن اليوم… بأيّار…. تماماً غير هيك…
في طقم جديد… وفهمان… ومستقل… ووطني…
ونازل ضد كلّ الطبقة السياسيّة… وبكلّ المناطق… تحت حملة “وطني”…
كلّ شي عليكن إنّو تعملو… تهزّو طيزيكن شويّ…
وتروحو تنتخبوهن… كرمال نخلص من الفساد اللّي وطني…

واللّه العظيم بقبّركن….
إذا رح ترجعوا تنتخبو نفس الطقم القديم المعفّن…
وتتفضلو تجو بعد الإنتخابات…
وتنقّو وتقفقفو وتلعو وتنعو…

بقبّركن إذا بكرا…
بتعرفوا شو؟ اسطفلو… انضربوا… اعملو اللي بيريّحكن…
أنا هيك هيك… صرت برّات البلد…
إذا انتخبتو دم جديد، منرجع عالبلد…
وإذا لأ… يعني ما بتستاهلوا إلاّ الطقم القديم المعفّن……
ساعتها منقلّو شكراً ترودو…
ومنضلنا برّا….

وهيدا مش وضعي وحدي بس…ما…
هيدا وضع اكتر من 12 مليون نفر…
نفرو ونفرو ونفرو عبر التاريخ….
احترماتنا….

 

شيت هول

Posted in Writings by johnnyhage on January 16, 2018

ولك شو عم بصير بالعالم يا جماعة…
شو؟
دونالد ترامب شو هيدا…

ترامب إنسان جدّاً خلاق….
بغض النظرعلى إنّو عنصري ومهرج سياسي… هيدي تفاصيل ما… مش مهمّة…
خلاّق الزلمي…كل يومين تلاتي بيتحفنا بشي أخو محلوشي…

هيدي ما كناّ نشوقها عإيّام أوباما…
صحيح، إنّو مع كلّ تخبيصة بروح ملايين الناس بالمغليطة…
لكنو كرياتيف الزلمي….

هيدا وجه من الديموقراطية الوهمية اللّي عم تنتجها وتصدرها الأسواق الأميركية للعالم…

طيّب…. شو في أخبار غير هيك…
من هيدي الميلة من العالم…
كمان ترامب… ما غيروا…
من يومين…
وصف البلدان الأفريقية ب ” شيت هول”
“جورة الخرا” يعني بالعربي…
أصلا أصلا…
ما بعتبر في تعبير أقل خرائي
ممكن يطلع من إنسان هيك خرائي…
ما قلتلكن كرياتيف…

هلّق في عالم من كلّ العالم عم تتظاهر ضدو…
ومبارح لغي زيارتو اللّي كان لازم يقوم فيها على لندن…
أنا أكيد انّو المظاهرات كلّ يوم رح بتزيد…
لأنّو الزلمي كلّ يوم رح يكبر وتكبر الكرياتيفيتي معو…

طيب…عالسريع… شو في أخبار تانيي؟
ريال مدريد نادي الإسباني مبارح خسر 1-0 عأرضو عن جديد… نعيماً…

من هيديك الميلة من العالم…
اسرائيل والهند… على ما يبدو إنّو عم يتّجهو إنّو يصيروا عصافير حبّ…
نتنياهو شنغلّو شي 100 businessman وجّرن عالهند…
ليمضوا اتفاقيات تعاون بمجالات الامن، والطاقة، والفضا (صح، صارو عم يحكو بالفضا الجماعة)، والإنتاجات السينمائية مع “بوليوود”
هلّق الدولة الصهيونية عم تغري المنتجين الهنود بتمويل الأفلام وتخفيض الضرايب اللي بينتنج عن إنتاج الأفلام… كرمال يروحو يصوروا افلامن بفلسطين المحتلة… ويروجوها كمنطقة سياحية…

ع فكرا … في فيلم إسمو “بيروت” نازل جديد عالصالات الأميريكية…
وبيفرجي بيروت بالطريقة اللّي مش متل ما هييّ.. حلوي هيدي عالقافية…
بسّ لتعرفو شو عم نحكي… الفيلم هوّي عن بيروت…
لكن ما في ولا أي شغلة بتشبه بيروت…
صوّروه بالمغرب الجماعة….

من هيدي الميلة من العالم…
عنّا بمونتريال… المدينة مغطّاية بالتلجات….
لدرجة إنّو العالم مش عم تعرف وين صافّة سيّاراتها….
أصلاً ولو عرفوا… هالشي ما بيعني إنو السيارة
رح بتدور أو رح تمشي….
بسّ إنّو بطمن بالو الواحد…
على كلّن…
انشالله اليوم الحرارة رح توصل عنّا للناقص 38..
أنا عم فكّر فوت إتدفى بالبرّاد….
مع إنّو في ناس بعرفهن رايحين يعملو “يوغا إن ثي سنو”…
والله ليوقف دمّن…

من هيديك الميلة بالعالم…
من بيروت بالتحديد…
“فيرجين ميغاستور” بوسط المدينة… عم بسكّر…
المبنى اللّي كان دار أوبرا بالزمانات….
واتحوّل ل “فيرجين ميغاستور” بال 2001،
هلّق بعد 17 سنة عم بسكّر…
أنا محّل وزير الثقافة…
بشتغل على إنّو الدولة تشتريه وتردّو دار أوبرا…
لأنّو بلبنان كلّو ما فيش عنا دار أوبرا…
ولاّ أنا غلطان… أكيد لأ…
دخلكن مين وزير الثقافة هلّق…
أه… إي انسو الموضوع…

بنفس الوقت شكراً لعمّو جبران باسيل لأنّو اكتشفتلنا النفط ببلدنا… يعني لولاك… ما بعرق شو كنا عملنا..
وشكرا يا عمّو لجبران لأنّو جبتلنا جبران يحكم بلدنا
وانشالله كل يوم منكتشف شي جديدي عن بلدنا..
وعن الكذا عمّو اللّ حاكمين بلدنا…
عشتم وعاش لبنان…
(النشيد…)

خبرية جديدة… من هيدي الميلة من العالم…
كيم كارداشيان…
النجمة الأميركية الشهيرة الفارغة…
صار في عندا سطل زبالة جديد…
من ماركة لوي فيتون….
فرجتنا ياهن عحسابها لإنستاغرام…
والعالم راحت فيها…
بهالوقت الطفلة المقاومة الفلسطينية عهد تميمي بعدها بالحبس لأنّو سفقت كف جندي إسرائيل….
والعالم العربي متل إجرو…
لا مش متل إجرو… عم يعمّلها شير عالفايسبوك…

وأنا محلكن … كمان بعمل شير لهيدا الفيديو…
خلّي العالم تعرف شو عم بصير…
ليش لأ….
إحترماتنا…

 

%d bloggers like this: