Ihtirametna

ما تعتل همّ

Posted in Writings by johnnyhage on August 10, 2009

نحنا بصدد إنو نفتح قهوة حاليا
أو ما يُسمّى بالمجتمع اللّبناني بال Cafe…

 

من لمّن أخدنا هالقرار….
مش رح خبّركن….بكم حيط صرنا فايتين
لكن رح خبّركن…
عن “الحيط” اللّي فايتين فيه حاليّاً…

 

كنّا محتارين نحنا
….شو بدنا نبيع بهال Cafe….
لأنّو إذا بدنا نفتح Café…
بطبيعة الحال…
لازم نبيع شي…ما بيصير…

 

فكنّا محتارين……
شو بدنا نحط عال Menu….

 

قام رحنا جبنا Chef….
مش واحد….اتنين……
وأجا كلّ واحد مننّ…
“شاف” شو بدنا نفتح…..

 

الحلو….إنّو اتنيناتن فاتو بالجوّ…..
فاتو وكتّروا….
عاشوها كتير يعني…
وصار كلّ واحد منّن….يزتّ إقتراح ورا إقتراح….
وبغزارة…..

 

هون أنا انقزت…
جيت قلتلّن….
“يا جماعة نحنا منقدّر جهودكن….
بسّ بدنا نعرف…
..شو رحّ بتكلفنا هالخبريّي كلّها….”
أنا كنت ناطر إنّو يعطوني شي رقم…
ت عأساسوا أعمل حساباتي…..

 

قام الأوّل جاوبني:
“ولو….ما تعتل همّ يا زلمي…..
رح سايركن مظبوط…ما تعتل همّ”….
قام التاني جاوبني:
“…حطّوا إيديكن بميّ باردة……
وما تعتلوا همّ…عن جدّ ما تعتلوا همّ”…..

 

هون أنا….
بنّكت….
صفرنت…
تلّتت….
لأنّو أنا ….
عنّ جدّ……
….عتلان همّ…..

 

فكيف بدّي فسّرلن….
إنّو الألفاظ الجميلة تبع “ما تعتل همّ”….
ما بتناسبني …ولا بتروّقني…..
وكيف بدّي فسّرلن….
إنّّو أنا….عن جدّ حابب أعرف….
قدّيش رح بتكلّفني هالعمليّة كلّها…..وبالأرقام؟…

 

هات هلّق….
حلّل…
وبصّر…
وخمّن….
…شو يعني….
…”ما تعتل هم”…..

 

إحترماتنا…

Advertisements

مش أنا يللّي دايرها

Posted in Writings by johnnyhage on August 10, 2009

اليوم لمّا وعيت من النّوم…..
انتبهت لشغلة……

انتبهت إنّو حياتي….
مش أنا يللّي دايرها….

أنا…بسّ….حاملها…
وداير فيها من محّل لمحّل ….
لكن منّي دايرها….

ما بعرف مين دايرها …
بس أكيد مش أنا….

يعني أنا…
تلات ارباع الإشياء يلّي بعملها كلّ يوم…..
ما بعملها….لأنّو أنا….بدّي أعملها….
بس ما بعرف كيف ….
بصفّي عم بعملها…

مدري من وين بتخلق هالمسؤوليّات كلّها….
بتظهر فجأة….
وبتجبرك…
إنّو تعيش حياتك…
مش متل ما إنت بدّك اتعيشها…..

إي…..شو هيدا؟…..
في شي غلط…..
أكيد…في شي غلط بالتركيبة….

 

إحترماتنا…

هيدي مش شطارة

Posted in Writings by johnnyhage on August 10, 2009

أجمل شعور عندي…..
لمّا بشتري كتب……

منشان هيك…..
بصير أبرم عالمكتبات…..
وأنا محمّس…
لشوف شو بدّي إشتري…….

كتير بشتري…..

لكن إذا بدنا نجي نحكي بصراحة……
لو هلّق….بقرّر…إنّو وقّف إشتري……
وبقرّر كمان….
إنّو بلّش إقرا الكتب يللّي عندي ياها….
ويللّي صرلي فترة عم بشتري فيها…..
كنت بوقّف شراية كتب…ع شي 14 سنة….

لأنّو الظاهر….
إنّو نسبة “شراء الكتب” عندي……
مرتفعة…أكتر بكتير
من نسبة “قراءة الكتب”….

هيدا لأنّو أنا…..
كلّ ما بشتري كتاب جديد….
بحسّ حالي مثقّف شويّ زيادي…..

من كم يوم لاحظت….
وحسّيت عدمّي……
إنّو هالشي غلط….
واكتشفت….
إنّو مش شطارة الواحد يشتري كتب…..
الشطارة…إنّو يقريها……

وساعتها…خود عثقافة……

 

إحترماتنا…

%d bloggers like this: