Ihtirametna

غلطان

Posted in Writings by johnnyhage on November 21, 2009

First published on Facebook on Saturday, October 10, 2009 at 6:23pm

اليوم وعيت بنفسيّة حلوي….
كتير حلوي….كتير كتير حلوي…


أخدت حمّام بارد عالسريع…
وتأكّدت إنّي صحصحت عالمظبوط…
وانطلقت بسيّارت التويوتا السودا…
…من بعد ما لبست تيابي أكيد….


لأوّل مرّة من زمان…
حسّيت إنّو في شي حلو بهالمشوار…..


ما في عجقة أبداً…
السيّارات ماشية من دون ما تزمّر ولا زمّور….
والشمس شارقة….
والعصافير تزقزق…. معّ إنّي ما كنت سامعها…
بسّ أنا أكيد إنها كانت عم تزقزق…


دوّرت راديو السيّارة….
وبلّشت إسمع موسيقى بتطّوِّل العمر…
ما بعرف من وين لاكشينها…لكنّها بتطوّل العمر….
ولاحظت لأوّل مرّة من زمان….
إنّي متل كأنّي ببلد حضاري…
بلد تاني… مش لبنان…..


قبل ما أوصل مطرح ما بدّي أوصل….
أنا وموقّف عإشارة حمرا……
وما في حدا لا قدّامي ولا ورايي….
بشوف كميون جيش عسكر لبناني…
ساحب…. ومصورَخ….
وشوفير الكميون….
كمان جيشي عسكري لبناني….
ملزّق إجرو عدعسة البنزين….
ولا شايفني… ولا شايف التويوتا السودا…
ولا متل كأنّو داري بشي إسمو إشارة حمرا…


فكتّر خيرو للكميون….ولشوفير الكميون….
وكتّر خير الجيش اللّبناني…
لأنّو أعطاني إشارة واضحة…
على إنّو أنا بعدني هون بلبنان…
وأعطاني إشارة كتير واضحة كمان…
إنّو بعد بدنا شي ميّة سنة وميّة يوم….
ليصير إسمنا بلد متحضّر….


هيدي إذا صار….


إحتراماتنا….

عم يضّحكوا علينا

Posted in Writings by johnnyhage on November 21, 2009

First published on Facebook on Sunday, September 27, 2009 at 1:15am

عم يضّحكوا علينا…..
واللّه…..عم يضّحكوا علينا…..
ونحنا بدورنا عم نضحكلهن……
ومصفّايين اتنيناتنا….
عم نضّحك عبعض….مع بعض….


لمّا يقولولنا “ديموقراطيّة توافقيّة”…..
إي… بيكونوا عم بيضّحكوا علينا…..
هيدي ما بتظبط….ديموقراطيّة…وتوافقّية؟….
هودي ولا ممكن يركبوا سوا….
ولا ممكن يتوافقوا…ولو ديموقراطيّاَ يعني….


لمّا يقولولنا “الحكومة مش عم تركب”
إي… بيكونوا عم بيضّحكوا علينا…..
هيي للحقيقة….إنّو الحكومة بتركب…
بسّ هنّي… ما بدّن يركّبوها إلاّ عوجا…..
وما بحياتها أصلاً ركبِت إلاّ عوجا….
الحكومات كلها…. عوجا… من قديم وجرّ….
مصفّاية عم تركب عالمواطن….
وعم بترَكِّب عضهروا…
ديونات ما بتركب براس حدا….


إي….ف عم يضَحكوا علينا….


لمّا يقولولنا إنّو نحنا قادرين ندير البلد
من دون أيّ تدخّل خارجي…..
إي… بيكونوا عم بيضّحكوا علينا…..
لأنّو ما في شي بصير عنّا بالبلد….
من دون تدخّل خارجي……
ما شي بتاتاً….
و”الخارجي”….بحال قرّر إنّو ما بدّو يتدخّل بشؤن البلد الدقيقة….
بضيع ألله تبعولو “الداخلي”…. وبتصفّي حالتو جدّاً دقيقة……


إي….ف….. عم يضّحكوا علينا….


لمّا بقولوا عن إعلامنا… حرّ وشفّاف وموضوعي…..
هودي بيكونوا…. عم بيضّحكوا علينا…..
إعلامنا مسيّس بقوّة….ومنّو حرّ….ومنّو موضوعي….
وأنا جدّاً جدّاً أكيد من موضوعي…….
وأنا جدّاً جدّاً أكيد كمان….إنّو عم يضّحكوا علينا….


بسّ لنوضّح الإشيا يعني…..


عم يضّحكوا علينا عصوت عالي……
هنّي واقفين حدنا…وبلزقنا كمان….
ونحنا بردو…عم نضّحك معهن….


هنّي ونحنا…..عم نضّحك علينا….


إحتراماتنا….

شو قولِك إنتِ؟

Posted in Writings by johnnyhage on November 21, 2009

First published on Facebook on Saturday, September 19, 2009 at 2:08pm

قاعد ناطرِك…..
…بهونيك زاوية من زوايا الجميّزة…
الموسيقى عم بترجّ داير من داري….
وع َيميني في صبيّة تلات ارباع مظلّطة…
عم ترقص ب “كادر” التلفزيون…
وأنا قاعد…..ناطرِك…..


والسيغارة رح تخلص بالمنفضة قدّامي…..
ودخّان السيغارة…عم بيتطاير فوق كاس النبيد الفاضي
من بعد ما صارو معبّايينلي ياه تلات مرّات….
وأنا قاعد ….ناطرِك…..


وعم فكّر….
هل يا ترى لمّن بتتفضّلي وبتطلّي….
رح قلّك إنّي مفئوس منِّك؟….
ولاّ…..متل العادي….لمّا شوفِك….
رح إنسى؟….


شو قولِك إنتِ….؟
العمى بقلبِك…شو قولِك إنتِ؟…..


إحتراماتنا….

%d bloggers like this: