Ihtirametna

هيدا كلّو من تأليف المجتمع

Posted in Writings by johnnyhage on December 24, 2009

ليكوا…..
اسمعوني شويّ…
اتركوا كلّ شي…واسمعوني شويّ…..
رح جرّب اختصر حديثي….فا…اسمعوا…


روحو غسلوا وجكن…..وركزوا معي ….
واسمعوا منيح…..


ما في شي إسمو صحّ…..
لا في شي إسموا غلط…..
كلّوا هيدا طرق حكي…
كلّوا هيدا من تأليف المجتمع….


إذا إنتوا بتصلّوا مرّة بالأسبوع…
أو خمس مرّات بالنهار…
مش مهم…ما في شي صحّ أو غلط….
المهم إنّو تصلّوا….


إذا إنتو بتأمنوا بأللّه…..أو ما بتآمنوا…..
مشّ مهمّ….ما في شي صحّ أو غلط….
المهمّ إنّو إنتوا مرتاحين بحياتكن….
والمهمّ إنّو مش عم تئزوا حدن….


إذا تزّوجتوا بالكنيسة…أو عند الشيخ….
أو تزّوجتوا مدني حتّى….
مش مهمّ…ما في صحّ أو غلط….
المهمّ إنّو مبسوطين…
والمهمّ إنّو بتحبّوا بعض….


إذا عملتوا حكما…أو مهندسين….أو محاميّي….
أو فنّانين…أو شعراء….أو كهربجيّي….
مش مهمّ….ما في شي صحّ أو غلط…
المهمّ إنّو عملتوا شي ….


إذا كفّيتو علمكن…أو ما كفّيتوه…
مش مهم….ما في شي صحّ أو غلط….
المهم إنّو تعرفوا شو بدكن من هالحياة….


إذا إنت يساري..أو يميني….
برتقالي…زيتي….صفراوي….أو زرقاوي….
بتحبّ السياسي…أو ما بتحبّها…
مع المقاومة…أو ضدّها…
مش مهمّ…..ما في شي صحّ أو غلط…
المهمّ إنّو عندك رأي …وبتعرف تدافع عنّوا….


إذا إنت عايش بأميركا…أو باليابان…
بافريقيا…..أو بلبنان…
مش مهمّ…..ما في شي صحّ أو غلط…
المهمّ إنّك عايش…..


فيني ضلني نازل فيكن لعبكرا…
وخبّركن كيف إنّو ما في شي صحّ أوغلط…
بس بعتقد فهمتوا الفكرا….


ويلّي لازم تفهموا كمان….
إنّو الحياة كتير قصيرة….
دخيل اللّه….
لازم إنتو تقرّروا كيف وليش بدكن تعيشوا حياتكن….
قبل ما يجي المجتمع ويقرّر عنكن…
لأنوّ متل ما صاير هلّق.. كلّو من تأليف المجتمع….


بسّ اتذكروا شغلي وحدي:
“كلّ شي بقرّروا الإنسان….
هيدا لنّو صحّ…ولنّو غلط….
الصح والغلط…ما بدّن قرار….
هودي بكونوا…موجودين…خلقا….”


ميري كريسماس…..وينعاد عليكن….


إحترماتنا….

Advertisements

تاكسي

Posted in Writings by johnnyhage on December 18, 2009

انا مش عم بفهم قصّة هالتكسيات عنّا…..
يا خيّي حدا يفسّرلي….
هنّي عم بنسّقوا مع بعضن شي؟….

معقولي إنّو كلّ تكسيات لبنان بيلتقوا بالشهر مرّة…
ليتّفقوا علينا؟….
معليش…حدا يفسّرلي…

 
لأنّو كلّن بيعملوا ذات الشي من دون إسثناء…

كلّن…
لمّا تكون ماشي عإجريك…بعكس سير السيّارات….
بينزلوا فيك زمامير…
لتروح بعكس الإتّجاه اللّي إنت ماشي فيه….
متل وكأنّو إنت بودّك تغيّر اتّجاهك…
لكن ناطر منّن شي إشارة بركي…

لأ…وبينقئسو لمّا بتأشّرلن بإيدك…
لتقلّن شكراً….

كلّن…
لمّا تطلع معن بالسيّارة….
بيفتحولك موضوع سياسي…أو موضوع الحريم….
أو شي موضوع تاني سخيف….
وبصفّوا ساحبين……بحديثن….
لكن السيّارة أنجأ عم تمشي…
وبدّها دفش عشويّ….

هنّي لازم يكونوا ساحبين بالسيّارة…مش بحديثن…
مغلبطين بركي الجماعة…

كلّن…
لمّا تطلع معن…لتوصل عشي محّل…بتكتشف….
إنّو أخدوا أطول طريق….
ممكن لإنسان موجود على وجّ هالأرض إنّو ياخدها…

كلّن…
بيمشوا عالشمال…مش عاليمين…..
تما يخلّو سيّارات التاكسي التانية…
تدوبل عنّن….

 

وأخيراً…وهيدي اكتر وحدي بتقهرني أنا….

كلّن…
مع نتفة بهايم سايقين سيّارات عاديّة (مش تاكسي)….
نحنا وواقفين عإشارة الحمرا….
بكونوا عم بزمرولنا…لنكبّر عقلنا ونمشي….
لأنّو ما أحمر منّن…إلاّ الإشارة….

 

إحترماتنا….

البيضة الشمال…

Posted in Writings by johnnyhage on December 6, 2009

إجا صديقي لعندي…..
ومستحي…..
إجر لقدّام وإجر لورا…..
بدّو يحكي….لكن مش عم يطلع من تمّو حكي…قد منّو متردّد.
…بصراحة….
مش بسّ كان متردّد….كان مصفرن…

تركتو أنا…..

بعد نتفة وقت…..حسّ إنّو تِخنِت….
وإنّو ما بقا فيه يتحمل الضغط لحالو…..

إجا لعندي وقلّي : “ليك…..”

قلتلّو: “شو”

قلّي: “بدّي قلّك شي”

قلتلّو: “قلّي…شو”…..؟

قلّي: ” عم توجعني بيضتي الشمال”….

قلتلّو عصوت عالي: “شو”؟

قلّي: “إي…متل ما سامع…عم توجعني بيضتي الشمال….
بتعرف شي حكيم أو شي حدا بيفهم بهيك إشيا”….؟

قلتلّو: “لأ…للصراحة لأ…ما بعرف حدا بيفهم بهيك إشيا….”

قلّي:” أنا بعرف…. خالي حكيم…وهوّي بيفهم…بسّ مش مسترجي إحكيه….”

هون أنا…..سفئتو خطاب ما بيفهم…..
وقنعتو إنّو القصّة خطيرة…
وإنّو ضرورة جدّاً يحكي خالو الحكيم بالموضوع…

راح…وحكي خالو الحكيم…….
وخبّرو عن الموضوع…..

ف…بقوم خالو الحكيم….
ال…فِتِح….. وأنا أؤكّد إنّو فِتِح…..بجاوبو:
“بسيطة….ركّ عاليمين”….

سكّر التيليفون….ورجع صديقي لعندي….
مبنّك…ومصفرن أكتر من الأولّ….
وقف قدّامي…وتوجّه بالحديث لئلي:
“قلتلّو عم توجعني بيضتي الشمال…….
قام قلّي بسيطة…ركّ عاليمين”…
إي …..شو يعني؟”

أنا بصراحة…ما عرفت جاوبو شو يعني….

إنتو إذا بتعرفوا شو يعني…..دخيل عرضكن…
خبروني…لروح أنا خبرو…..

و….مستعجلي القصة…بالأمليّة يعني……

إحترماتنا….

%d bloggers like this: