Ihtirametna

خدلك عفوضة

Posted in Writings by johnnyhage on March 31, 2010

عم بكتب من قاعة المسرح….
قاعد عكرسي من كراسي الجمهور….
خامس صفّ بالتحديد..
في بوجّي خشبة المسرح…
وحوالي خمستعشر ممثّل عم ببرعطوا قدّامي…..

إذا شي مرّة اشتغلتوا مسرح من قبل….
بتشوفوا إنّو بالتمارين الأوّليّة……
بأوّل كم أسبوع يعني…..
ما  بتلافي غير ممثّلين ببرعطوا قدّامك….
ومش معروف مين عم يعمل شو….

في شخص واحد لازم يكون عارف شو عم بصير…
أو من الأفضل إنّو يكون عارف شو عم بصير….
هيدا هوّي المخرج…..أو المخرجة (تما يزعلوا الصبايا)…..

وبعلمك بكونوا عم ببرعطوا….
كلمة وحدة….من المخرج….أو المخرجة  (تما يزعلوا الصبايا)….
بيركّب مشهد …ما بيفهم….
بياخد العقل….
وبياخدلك أنفاسك كمان….

هيدا شي صحيح جدّاً بالمسرح….
طيّب تخايلوا العالم الطبيعي….
العالم الخارجي…اللّي نحنا عايشين فيه….

واتخايلوا هالناس والجماهيراللّي عم بتبرعط يمين شمال….
ومش عارفي حالها شو عم تعمل…..
وتخايلوا كمان إنّو المخرج مش موجود….
وإنّو ما في مخرج….

أوفففف….خدلك عفوضة ساعتها…..

هلّق رح يطلعك كم واحد مفكرين حالن مخرجين….
أوعاملين حالها مخرجين….
لكن هنّي منّن مخرجين…..
والجماهير رح بتصدّقهن….

أوففففف…هلّق حود عفوضة….

إي يا تقبروني….
هيدا العالم مش بعيد عنّا…
مش بعيد عنّا أبداً…..
أو بالأحرى…. هيدا هوّي نفسوا…عالمنا….

إحترماتنا….

بكرا لمّا يرجع يخلقني عن جديد

Posted in Writings by johnnyhage on March 20, 2010

أنا بعرف شو رح أطلب منّو…..
ورح إبقى صلّيلو كلّ ّيوم… ليحقّقلي شو بدّي……
إنّو مش كلّ يوم…كلّ يوم…..
معنى الحكي يعني…..
المهم إنّو بكرا لمّا إتذكر صلّيلو….
رح دايماً أطلب منّو….

رح أطلب منّو…
إنّو بكرا…لمّا يرجع يخلقني عن جديد….
إذا ما في إزعاج …ومن دون ما يحمل تقلي يعني….
بركي…. بيخلقني بشي بلد تاني….
بلد غير يا خيّي….

بشي بلد شويّ محترم أكتر….

بركي بيخلقني بشي بلد….في نظام مثلاً….

شي بلد يكونوا بناياتو مرقّمين حسب المناطق والأرقام……
وعندو خريطة واضحة فيك تتبعها لتسوح فيه….
هيدا بحال جايي عبالك تسوح….
إنّو بشرفكن… فيه أبسط من هيك….

بركي بيخلقني بشي بلد….
قادر يعلّمني بمدارس وجامعات محترمة…..وتابعة للدولة……
من دون ما إتكّل عإمّي وبيّي….
وإهلِكهن طول عمرن ليعلموني بمدارس خاصّة…….
هلّق من دون شكّ… إمّي وبيّي ما في منّن….يقبروني بجنّنوا….
بسّ لو إنّو هالبلد…بشدّ همتوا شويّ زغيرة……
بسّ شويّ….

بركي بيخلقني بشي بلد….
يكون السياسي فيه جايي ليخدم الشعب…..
ومش الشعب…جايي ليخدم السياسي…..

بركي ….كمان بطلب منّو….
إنّو يخلقني بشي بلد….
أهلوا….بحبّوا بعضن….

مش ضروري يحبّوا بعضن يا خيّي….
يتحمّلوا بعضن…..يحترموا بعضن…..
شو بعرفتي شو…المهمّ إنّو يعيشوا مع بعضن….
هلّق مظبوط …يمكن…
…متل ما بادي….
كلّ مجموعة بتناديلك وبتصلّيلك عطريقتها….
بسّ دخيل عرضك…قلّن إنو إنت مش فرقاني معك….
وقلّن كمان إنّو ….كلّن، بالنسبة إلك، متل بعضن…
وما حدا مسبّق حدا….. وطريق الجنّة عمسافة وحدة من الكلّ….
بسّ تما يقبروا بعضن يعني….
حرام….

بركي كمان بطلب منّو…إنّو بيخلقني….
بشي بلد…..
قادر إنّو يعطيني جنسيّة محترمة…..
هيك…بوفّرعليّي روح إشحد جنسيّة تاني….

هلّقّ فيني قلّوا كمان…
إنّو إذا منّو قادر يخلقني عن جديد….
بشي بلد تاني…
بركي…
كحلّ بديل يعني….
بركي…بظبّط البلد اللّي عايش فيه أنا حالياً….
هيي ذاتها ساعتها بتصبر….مش فرقاني معي أنا….

لأ…بسّ أكيدي…إذا بقلّوا هيك…
رح بجاوبني:
“دخيل عرضك…..ما تفوّتني بهالمتاهات….
خلص بكرا لمّا إخلقك عن جديد….رح إخلقك ببلد تاني….عذوقك….
خلص…..وعد”..

إحترماتنا….

مينياتور

Posted in Writings by johnnyhage on March 15, 2010

هلّق افهمت ليش شارع الحمرا…
هوّ أجمل شارع بالنسبة إلي…بلبنان…..
هلّق افهمت ليش كنت حسّ…..
إنّو في شي غريب بهالشارع……

هلّق افهمت إنّو…..
مسرح ال”بيكاديللّي” هيدا المبنى المتواضع عنّا….
هيدا أصلو أجنبي….
ومسمّايينو عإسم منطقة…
إلها أوّل وما إلها آخر….
بلندن….
هيدي المنطقة فيها مسارح ليوم المسارح…..
ومطاعم ليوم المطاعم….
وبنوكي ونايت كلوبات…..ليوم البنوكي والنايت كلوبات…..

هلّق افهمت إنّو…..
ال”ماي فار”….هيدا الأوتيل اللّي كانو معمرينو….
وهبّطوا…مدري رمّموا…مدري شو رجعوا عملو في….
هيدي كمان منطقة مهمّة بلندن….
في بقلبها جنينة ضخمة إسمها “هايد بارك”….
وجنينة تاني فستوكة…إسمعها “غرين بارك” –
غرين بارك بتشبه كتير جنينة الصنايع…من ناحية المساحة بسّ مش أكتر-

هلّق افهمت إنّو…
ال”تروكاديرو” هوّي مبنى ضخم موجود بمنطقة ال”بيكاديللّي” أصلاً…

هلّق افهمت إنّو…
سينما “الستراند” اللّي عنا بالحمرا…..
إسمها جايي من شارع ضخم بمدينة “لندن”…
حدّ ال”كوفنت غاردن” – وهيدي سوق ضخم للمشتريات…من وقت للتاني بتنبّذ فيه فجأة عروض فنيّة عالطرقات…هيك فجأة…

هلّق افهمت…إنّو ال”بريستول” ما خصّو ب 14 آذار….
هيدا خصّوا بمدينة بإنغلترا متل “لندن”…
لكن بعيدة عنّا شي ساعتين…بالتران….

مش رح زيدها عليكن أكتر من هيك…..
لكن حبّيت إنّي خبّركن إنّو هلّق فهمت….
إنّو بالإجمال….
الحمرا هيّي “مينياتور” عن “لندن”…بالأسامي بسّ….

و بالإجمال…..
كلّ بناية مهمّة بشارع الحمرا….
إسمها عإسم منطقة بتاخد العقل….بإمّها وأبوها….ب “لندن”….
وبتزيدها أهميّة بأشواط وأشواط وأشواط للبناية اللّي عنّا….

الحمرا على ما يبدو….مصغّر عن بريطانيا على سلّم 1 ع 10,000…
ومنشان هيك….الظاهر….أنا بحبّها هالقد….
ف..اتفضّلوا اتخايلوا….بعد كلّ عالشرح…..إذا الحمرا هالقدّ بحبّها….
قدّيش لكان…رح اطلع بحبّها ل”لندن”…..
أوف…..كتير….
كتير….و على سلّم 1 ع 10,000…

عفوقة……
حابب إلفت إنتباه الدولة اللّبنانية والمستثمرين….
إنّو للصراحة…بعد ناقصنا بنايتين بالحمرا:
وحدي لازم انسميها “كينسنغتون”
والتانية…. “برتوبيللّو”
ساعتها بتكمل….

يلاّ…بسيطة…انشاللّه خير….
أللّه كريم…..

إحترماتنا….

%d bloggers like this: