Ihtirametna

ركّوا عالخضرة

Posted in Writings by johnnyhage on May 29, 2010

السبت الماضي….

من أسبوع تماماً يعني…

اتصلت فيهن ….

وقلتلّن..

“ألو….مرحبا….

إذا بتريد بدّي أطلب ديليفيري..”

قالولي….

“أهلين إستاذ….تفضّل”

قلتلّن….

” بدّي منقوشتين زعتر مع خضرا إذا بتريدو”….

قالولي….

“عفوا…. بسّ اليوم ما في عنّا غير Salad …

موقّفين كلّ شي ساج وكلّ شي فرن….”…

قلتلّن…

“كيف؟… مش هون “زعتر وزيت”؟

قالولي….

“مبلى…زعتر وزيت  – فرع بليس إستاذ…”

قلتلّن….

“هلّق…شيل الفرع عجنب….أنا بدّي زعتر وزيت….

كلّ شي عم بطلبوا هوّي منقوشة زعتر وزيت….”

قالولي:

عفواً…بسّ اليوم ما في عنّا إلاّ Salad…

قلتلّن:

“Salad؟….خضرة يعني؟

ليك إستاذ….إذا ما عندكن زعتر وزيت…..

ليش فاتحين…..؟…سكروا يا خيّي….

ليش ما بتسكروا….؟…..وبتفتحوا محّل خضرة مثلاً….

وهيك بتبيعوا Salad ليوم ال Salad….

واللّه فكرة…جدّ….خدوها بعين الإعتبار…

 

ودخيل عرضكن….بحال سكّرتوا…..

وبحال قلبتوها مؤسّسة  خضرة…..

دخيل عرضكن….أوعا ثمّ أوعا…

ترجعوا تحطّوا “زعتر وزيت” عال Menu….

خلص….ركّوا عالخضرة يا خيّي…

 

إحترماتنا….

 

منبقا منتلاقى بعد شي سنتين

Posted in Writings by johnnyhage on May 26, 2010

كتّا نضهر مع بعض…

من شي سنتين….

وكان صرلي…شي سنتين مش شايفها….

من لمّن كنّا نضهر مع بعض…..

من سنتين….

انفصلنا….

رحت أنا بميل…وكوّعت كم كوع قاسي…..

زحّطِت…وفت بحيطان….

ورجعت لقيت حالي….وجلّست…ومشيت….

من سنتين برضوا….

راحت هيّي من تاني ميل…..

وكوّعت كم كوع كمان….

شفّطت….شدّت حالها…..

وفاتِت عرض….

سحبِت…….ومِشيِت…

ورجعنا التقينا….من شي عشر ايّام….

عكاس نبيد….

ما سائبت…

نحنا سائبناها…..

وصرنا نتذكّر كيف اتعرّفنا ع بعض…

وصرنا نحكي عن الماضي….

وعن الحاضر…

وعن المستقبل…

وعن البلد… وقدّيش إنّو هالبلد أخو شليطي….

قالتلي….ساعتها هيّي:

“بتتذكّر شو كنّا حركين من كم سنة؟….

وكيف كنّا مفكرين إنّو بدنا نغيّر البلد؟…..

شو قولك….فينا بعد نغيّر هالبلد؟….”

قلتلها…:

“ليكي…يا…تقبريني…….

أوعى بعمرك…بعد تفكري إنّو نحنا….

أو حدا منّا… قادر إنّو يغيّر هالبلد….

هيدا البلد ما بيتغيّر…

هلّق فيكي بأيّ ساعة تغيري “بلد”….

يعني تمسكي حالِك…وتطيري تعيشي ببلد تاني….

معقول…ليش لأ…

بسّ ما فيكي تغيري “البلد”

هيدا البلد…

انتبهي…هنّي كتير قراب من بعضن….

بين “اتغيري بلد” و “اتغيري البلد”

في حرفين…..بسمّوعن “ال” التعريف بالقواعد العربيّة…

ف…اتعرّفي عليهن مظبوط هودي….”

ومنبقا منتلاقى بعد شي سنتين…..

إذا مش بهالبلد…إي…انشاللهّ….

بتسائب بشي بلد تاني…وتالت…ورابع….

وعقولة زيّاد الرحباني:

“بطّل طموحي إنّي غيّر هالبلد….

صفّى أقصى طموحي…إنّو ما خلّي هالبلد يغيّرني”….

إحترماتنا….

كسلانين…يا بيّي شو كسلانين

Posted in Writings by johnnyhage on May 24, 2010

صرلن خمس إيّام…الطلاّب عم يتظاهروا….

بالجامعة الأميركيّة ببيروت….

لأنّو الإدارة قررّت إنّو تغلّي الأقساط….

وتفرضها عليهن….

فبهالخمس إيّام…..

الطلاّب قاطعوا كلّ شي إسموا صفوف….

وكلّ شي إسموا نشاطات…..

وكلّ شي  دراسات….وإمتحانات….

ونزلوا بالحرم الجامعي…..

وراحوا يعتصموا….

 

في منّن….

كتير اتضايقوا من هالقرار….

لأنّو بغضّ النظر إذا هنّي قادرين يدفعوا او لأ….

الأقساط صارت كتير غالية….

 

وفي منّن….

عم يتظاهروا لأنّو….مبسوطين….

عم بعبّروا عن رأيهن …..

وهيدا شي صحّي وسليم…

 

وفي منّن….

عم يتفرّجوا….وعم بيراقبوا…..

وعم بحلّلوا……شو رح بصير بالطلاّب…

وشو رح بصير بالإدارة…..

بهد هيك تحرّك…

 

وفي منّن متل إجرن الدني كلّها….

مش فارقاني معهن شي….

 

أنا برأيي….

إنّو هودي الطلاّب…بالجامعة الأميركيّة….

يعطيهن العافية….

 

ويا ريت…نحنا منتعلّم منّن….ولوّ نتفي…

 

يا ريت….

منوقّف أشغالنا ومننزل نعتصم بالشوارع لأنّو…..

البنزين….غلي قسطو مثلاً….

 

إنتوا لاحظتوا إنّو صفيحة البنزين….

رح توصل لل 40000 ليرة لبنانيّة؟

العما….

إي شو ناطرين؟……

 

خبّروني شو ناطرين؟….

 

أنا بقلكن شو ناطرين….

ناطرين يطلعلوا شي زعيم من هالزعما السياسيّي….

يعزمنا…..حتّى ننزل نتظاهر…..

 

لأنّو من دون عزيمة وخطابات وحملات كذب ونفاق….

…..نحنا لوحدنا…. ما منعرف نعمل شي…..

 

كسلانين…يا بيّي شو كسلانين……

 

 

إحترماتنا….

%d bloggers like this: