Ihtirametna

حاملين السلّم بالعرض

Posted in Writings by johnnyhage on August 12, 2010

إنتو اسمعتو…..
عن الملك السعودي اللّي زار لبنان من مفترة….
وسمعتوا إنّو إجا معو الرئيس السوري بنفس الطيّارة…..
وسمعتوا إنّو نزّل هوّي والرئيس السوري….مع بعض….
على سلمّ الطيّارة…..

لكن يلّي ما سمعتوا عنّو إنتو…..
قصّة سلمّ هالطيّارة…..
قصتوا قصةّ هيدا…..

هيدا يا أحبّائي…..
هيدا سلم الطيّارة الملكيّة…..
يللّي بيدعس عليه الملك يعني….
لمّن يجي بدّو ينزل من الطيّارة…..
يعني هيدا “سلّم ملكي”……

إجا الملك السعودي من السعوديّة ع سوريّة…..
…بالطيّارة…..
وإجا السلّم لوحدو… ليلاقيه……بالبرّ….
لحتّى لمّا بدّو يجي ينزل الملك من الطيّارة
ينزل ع السلّم…..

السلم…..بيجي… عادةً
محمّل ع six wheel…. كميون…
وونش هوّي بنفس الوقت…
شاحنة…يعني….شاحنة….كبيرة كتير….

فإجا السلم بالبرّ من السعوديّة…عسوريا…
ومن بعد سوريا إجا دور لبنان…..
فكمان…انطلق السلّم بالبّر…..
لحتّى يلاقي الملك…
…عأساس….إنّو لبنان….
فشخة…..وهينة العمليّة رح بتكون….

وصل السلم….مع الشاحنة اللّي محملتو…
عالحدود…. عالمصنع……
وإذ…بقرروا..ما بعرف مين….إنّو هيدا السلّم….
سلّم ملكي…وبالتالي ….
ما بجوز إنّو يعبر الحدود من معبر الشاحنات….
ما…مش منيحة بحقّوا يعني….
هيدا لازم يعبر الحدود من معبر السيّارات…..

طيّب….عال…..
حاولت الشاحنة إنّو تفوت من هيدا المعبر….
طلعت إنّو ما بتساع…لأنّو المعبر…
هوّ كناية عن خيمة حديد ضخمة….
طولها 6 امتار…..
والشاحنة سائبت إنّو طولها 7 امتار…..
ف…مش ظابطة…..

بعد المشاورات…والمحادثات طويلة…..
قرّروا…. كمان ما بعرف مين….
…..وجابو مقصّات الحديد….
واقعدو أربع ساعات….يقصقصوا بهالخيمة الحديد اللّي عالمعبر…..
لنزعوها….وشالوها من اساسها….
لحتّى السلم الملكي يتفضّل يقطع من تحتا….

إي…أنا أكيد أكيد…..إنّو لو سألتوا السلّم الملكي بحدّ ذاتوا:
“من وين بتفضّل تقطع إنت؟….”
كان قلكن:
“دخيل عرضكن…..مشّوني…سيسروني….
أنا بقطع مع الشاحنات…..
شدّو حالكن يعني…..ما بدّها هالقدّ…..”
شوفوا لأيا درجي…..

شوفوا لأيا درجي ….وقدّيش بدنا….
لنصير…. أو نقرّب من إنّو نصير إسمنا بلد متحضّر….

أولكن منصير؟

 

إحترماتنا….

Advertisements

من قلبي سلام لفيروز

Posted in Writings by johnnyhage on August 3, 2010

قال فيرز صفّت هلّق….

ممنوع تغنّي أغاني الأخوين الرحباني…..

من غير ما تاخد إذن أو موافقة من لرحابني الولاد…..

هودي صار بيجو شي نصّ دزّينة هلّق….

هلّق….فيروز صار بدها إذن منكن؟…

إي…

عفواً منكن…..بالإذن يعني….

…بسّ  فيرز ما بدّها إذن من حدا…

فيروز إذنها معها ….

لأء…ورفعوا دعاوي عليها بالمحاكم…

عمين…..ع فيروز

وبعتوا رسايل تحذيرية…..

لمنظمي المهرجانات…

ليبنبهوهن….

إنّو فيروز…..

ما فيها تغنّي… من دون موافقتهن هنّي…..

عن مين عم يحكوا….عن …. فيروز…

هلّق شو ذكّركن بفيروز إنتوا؟….

إنّو بدكن تكرهوا العالم فيكن…..

ومش عارفين كيف يعني؟….

ما كنتو مبسوطين….عم بتركزوا ع “ستار أكاديمي”…

وماشي حالكن….

وكنتوا عم بتِنظموا ملاحم ومسرحيّات…..

…وبرضو مبسوطين وماشي حالكن…..

خلّيكن يا أخي عم تركّو ع “ستار أكاديمي”…

وع”آخر إيّام سقراط”……

منيح ستار أكاديمي …..شو باه….

وتركولنا فيروز لإلنا يا خيّي……

لأنّو مش رح تظبط معكن هيك….

هيدي القصة……مش رح تظبط معكن….

رح بتصير العالم تكرهكن صدقوني….

مش قصّة دعاوي ومحاكم هيّي….

لاه….

لأنّو يمكن المحاكم….

تطيلّع قرارات…ليوم القرارات…..

ويمكن يصير فيه سردة دعواي ضد فيروز….

لكن…. فيروز….

رح بتضل تغنّي…

ولك إي….

إذا مش لزوجها وسلفها…..

….بتغنّي لإبنها…زيّاد….

لأنّو شو بكن ما تنسوا إنتوا…..بعد في زيّاد…..

ولك ناسيين بركي….

وبعدوا الزلمي  حيّاً يُرزق…ألله يطوّل بعمرا….

وبعدو عم يكتب ويلحّن كمان….

إي شو…..

ف…أكيد أكيد فيروز….. رح بتضلّ تغنّي….

وأكيد أكيد…إنّو …إنتو…..

العالم رح تكرهكن….

عهيك تصرّفات….ودعاوي…..

وأللّه يطوّل بعمركن انشاللّه…..كلكن…..

لتتحفونا…بقرارات ودعاوي جديدة….

ومستقبليّة…..

إحترماتنا….

%d bloggers like this: