Ihtirametna

حكم ديكتاتوري محط

Posted in Writings by johnnyhage on October 30, 2010

أنا اطلعت بحلّ جذري وقاطع للدولة اللّبنانيّة……

أنا هلّق اعرفت شو لازم نعمل لنصير بلد محترم وبيسوى…..

أنا القيت الجواب للحزّورة اللّي كل السياسيّين اللّبنانيين عم دوروا عليها….

أنا رح قلكن شو لازم نعمل….

 

نحنا لازم نطلب من شي دولة تانية…..

مسالمة…..محترمة حالها…..

وما حدا من اللّبنانيّ عندن مشكلة معها….

متل كندا مثلاً…أو سويسرا يمكن…..ما بعرف….

مش مشكلة…منلاقي دولة….

 ومنطلب منها تجي تحكمنا……حكم ديكتاتوري محط…..

 

ديكتاتوري محط….

واللّي بيعلّي راسوا يقطشولوا ياه…..

 

إيه… خلّيهن يجوا يعلّمونا عن جديد….. ويعملولنا “ترايننغ”……

كيف الإنسان ممكن إنّو بطريقة حضاريّة يدير بلد…..

لأنّو…نحنا عنّا مشكلة: بالإنسان، وبالطريقة الحضاريّة، وبالإدارة، وبالبلد.

 

خلّيهن يجوا…,ويفظّعوا فينا لنصير نفهم نحكي مع بعض…

ونتعاطى بالسياسي…خلّيهن يربّونا عإيديهن….

وخلّهن لمّا انصير اكبار

يعلمونا نمشي لوحدنا…..

ولمّا انصير نعرف نمشي لوحدنا…..

ساعتها فيهن يتركونا….

وأفضل  إنّو ما يتركونا فرد مرّة….أحسن عمراحل بكون….

بسّ ليتأكّدوا إنّو ما رح نرجع انخبّص…..

أفضل إنّو يخلّو عينن علينا…..

 

لإنّو غير هيك…. هيدا البلد…مش رح بصير بلد….

ولو بدّوا يصير…. كان صار….

 

إحترماتنا….

Advertisements

هيدا إسمو هَبَل

Posted in Writings by johnnyhage on October 27, 2010

أنا بطبيعتي وقح….

وهيّي بطبيعتها جريئة…وما بتستحي…..

بسّ لمّن نكون كلّ واحد لوحدو….

 

لمّن نقعد اتنيناتنا…عطاولة وحدي…

بوجّ بعض…..

منصفّي…..مستحييّن من بعض….

وعم منحكي عن إشيا ما إلها طعمة….

 

كلّ ما إقعد قدّامها……

عطاولة…مستديرة…..

وقنّينة النبيد الفاتحينها جديد….

قاعدي بيناتنا……

 

ما منعود نعرف شو بدنا نحكي…..

 

 

ودغري لمّا منفترق….

هيّي بتلقط البلاكبيري تبعولا…

وأنا بلقط النوكيا تبعولي……

وممنزل حكي ودردشي وديباجات…….

بمواضيع وتفاصيل…

جدّاً عميقة…وغميقة…وطويلة…وعريضة…

 

 

بسّ صبحان ألله..كل مّا منلتقي…..

منصفي متل المجاديب…. اتنيناتنا….

 عم منبحلق ببعض….

وعم منناقش… قدّيش الطقس حلو مثلاً…

 

 

إي…هيدا شو إسموا هيدا…….

هيدا إسموا هبل…وضعف شخصيّة…

مش بسّ شخصيّة….ضعف شخصيتين……

أنا..وهيّي….

إي…وهيدا إسمو طقّ حنك….

وضحك عالدقون…..

وهبل…أه …هيدي قلناها هَبَل؟….

إي…هيك….

 

 

وهلّق…إذا قريت هيدا اللّي كتبتوا هلّق…

مش رح تجي توقف قدّامي…

وتلقطني…

وتقلّي ليش كتبت هيك…

لاه….

رح اتبعتلي رسالة من البلاكبيري تبعولا….

 

 

 

إحترماتنا…..

 

أكتر بلد نازل بغينيس بوك

Posted in Writings by johnnyhage on October 25, 2010

نحنا…..بتاريخ بلدنا الحديث….

اللّي بعد ما اننشر ب ولا كتاب….

صاروا الدول المتواجدة عالخريطة العالميّة….

عم تنظر لإلنا بإعجاب…وبفخر….

وعم تطلّع ع إنجازاتنا الجديدة…اللّي ما بتخلص…

واللّي عم من ضلنا نبهرهن فيها…..

عم تطّلع لئلنا…بفخر وإعتزاز….

يعني شو بدّي قلكن ….

بكلّ ما للكلمة من معنا….

 

ف..إمشوا معنا….

إذا بتريدوا…

 

نحنا…يا جماعة….

عنّا أكبر جاط تبّولة….

 

نحنا عنّا …أكبر جاط فتّوش……

 

نحنا كمان عنّا…في أكبر جاط حمّص…..

وعنّا كمان…أكبر سندويشة فلافل….

 

وعنّا…عن جديد أكبر صحن شنكليش…..

 

وعرفت مبارح من الأخبار…إنّو طلعت من عنّا….

أكبر منقوشة…

وطلعت مربّعة كمان….بدل ما تكون مدوّرة…..

شوفوا الإبداع لوين…

 

كمان في عنّا هلّق…أكبر علم لبناني….

هلّق ما تسألوني مين هيدا اللّي خطر عبالوا يعمل أكبر علم لبناني…..

ما بعرف إذا كان خايف شي بلد تاني يجي يعمل أكبر علم لبناني مثلاً…..

متل إسرائيل مثلاً…ما بعرف بتعملها….معقولي…؟ معقولي…

 

بعدان نحنا….

نحنا عنّا أغنى رجل بالعالم….

هلّق سائبت إنّو لبناني مكسيكي هوّي….

بس لو ما كان لبناني وحربوق…..

أنا أكيد إنّو ما كان وصل….

 

نحنا كمان….

أكتر بلد بيقعد بلا رئيس جمهوريّة…..

من لمّن بتخلص ولاية الرئيس القديم…وبيطلع محّلوا رئيس جديد….

 

نحنا بتاريخ بلدنا الحديث…

صرنا منفضّل إنّو رئيس الجمهوريّة…

يكون مارق بمنصب قائد الجيش…قبل ما يصير رئيس…

إي ..أفضل بكون….
 

نحنا أكتر بلد بياخد وقت لتتشكّل فيه الحكومة…

 حسب الديموقراطيّة التوافقيّة…

 

نحنا أوّل بلدّ اخترع شي إسمو ديموقراطيّة توافقيّة…..

 

نحنا كمان… أكتر بلد… في نوّاب…بضلّن عم يطلعوا نوّاب…

ولوّ إنّو الشعب مش مبسوط مننّ….

ولمّا بموتوا…بيجوا ولادن محلّن…..

وكمان الشعب ما بكون مبسوط منّن….

 

نحنا أكتر بلد من سابع المستحيلات فيه….

إنّو رئيس مجلس النوّاب….

يصير رئيس مجلس نوّاب سابق….

 

نحنا أكتر بلد…..

بينزلوا أهلو عالمظاهرات…

كلّ ما دق الكوز بالجرّة….

حتىّ صاروا معوّضين هلّق…

ينزلوا من دون ما يدقّ الكوز بالجرّة….

 

نحنّا أكتر بلد طوّلت عنا الحرب الأهليّة….وبعد ما خلصت عفكرة….

 

يعني شو بدّي قلكن صفّينا مهمشرين جماعة غينيس بوك…..

وكلّ فترة منخترعلن اختراع جديد….

لدرجة ..

بعد نتفي…

رح ننزل بغينيس بوك….ك “أكتر بلد نازل بغينيس بوك”…

 

 

إحترماتنا….

%d bloggers like this: