Ihtirametna

ع طريق رومية

Posted in Writings by johnnyhage on November 18, 2010

كنت طالع نهار الأربعا…

على رومية……لزور إختي…..

بما إنّو صار إلي فترة مش زايرها….

 

إختي…قاعدي ب رومية..

مش بالحبس….لكن دغر ي حدّ الحبس…..

 

أنا وطالع…

لفتتلي نظري أرمات سرعة مزروعة عجنب الطريق….

 

بعلمك بتكون ساحب بالطلوع…..

وفي آرمة بتخبرك إنّو لازم تمشي 80 كيلومتر بالساعة مثلاً….

وإذ…بتفرّخلك أرمة تانية…من حيث لا تدري…..

وبتخبرك إنّو هلّق لازم تقشط ل 40 كيلومتر بالساعة…

إي بتنتع فرام أخو إختو….لتنزل لل40……

وبتسمع زمامير سيّارات…

وأصوت فرامات ومسبّات عالم عم بتلعلع وعم بتزيزق من وراك….

 

بتمشي 40….عم مهل….

شي تلات أربع كيلومترات بتمشي…

وبتدوّر الراديو…عال أساس إنّو زهئان يعني…

والسيّارة أنجأ ساحبة بهالطلوع….

ف….بتدوّر راديو..وبتذكرك مذيعة الأخبار….

إنّو في حدن من  فتح الإسلام…

هرب من حبس رومية….

هرب…والجيش…والدرك…والأمن العام…والدولة كلها…

عم بتفتّش عليه… ومش عارفين وينوّي بعد…

 

وإنت ساحب بهالطلوع….عطريق الحبس………

من ميلة ما فيك تسرع…ويلك تاكل ظبط….

ومن ميلة تانية … بهيكي سرعة….

بتخاف يتكبّش فيك جندي فتح الإسلام……

ويصفّي راكض حدّ السيّارة…..

ويتعمشق بالشبّاك بركي….

وينزل فيك خبيط ليوم الخبيط….

 

 

إنّو معقول 40 كلم بالساعة….وبالطلوع كمان؟

معقولي هيدي…..

 

 

بعدين بحال بدكن تمّشونا 40 كم بالساعة بالطلوع يا خيّي…

بدكن تتأكدوا إنّو ابواب الحبوسة…مسكرة منيح…..

ليكو ليش ما بتقفلوها إنّتو…..؟

تبقوا قفلوها قبل ما تناموا…. أفضل بكون….

 

 

 

إحترماتنا….

 

Advertisements

إذا علقت…أنا شو بعمل

Posted in Writings by johnnyhage on November 15, 2010

عم بقولوا إنّو الأوضاع مش رايقة…

وعم بقولوا كمان….إنّو يمكن تعلق بين اللّبنانيّي…

الأوضاع يمكن تعلق…..

وإنتَ يكمن تعلق بين اللّبنانيّي…..

 

طيّب…إذا عِلقِت……أنا شو بعمل؟

 

أنا….

فرد…ما في عندي….

ولا في عندي بارودي…..

ولا عندي نقّيفة حتّى….

مش بسّ هيك….

ما بعمري استعملت سلاح….ولا بعرف إستعملوا…

ولا بدّي أعرف….

 

آخر مرّة مسكت سلاح…

كان شئفت بارودي بلاستيك….

بتخرطش….وبتقوّس….

بسّ ما بتطّيلع شي…. غير صوت فاضي….

كانت إيدي مالحة وقتها…ف…كسرتها….

 

كسرتها….لأنّها بارودي لعبة كانت….

بسّ البارودي الحقيقيّة…

هيدي ما فيكش تكسرها…هيدي هيّي بتكسرك….

 

لمّن كنت صغير…

كانوا كلّن عم بركّوا عليّي….

قال بدّن يعلموني الأبجديّة…

بالعربي…وبالفرنساوي…وبالإنغليزي…..

حتّى صير أعرف إتواصل مع العالم….

وكانوا عم بركّوا عليّي….

إنّي إلعب فوتبول….وأعمل مسرح….

لحتّى إتثقّف قال….

 

لكن…ما بعمرو حدن ….

إجا….وعلّمني كيف بستعمل بارودي أو فرد مثلاً….

أو أرشدني….على إنّو شو هيّي أفضل طريقة قوّص فيها عالعالم….

 

مع إنّو كان لازم يعلموني ويرشدوني….

إذا من نحنا وصغار هنّي عارفين….

إنّو نحنا عايشين ببلد….

أهلو…ما فيهن إلاّ كلّ 15 سنة…يقبّروا بعض….

لازم كانوا يعلمونا….نستعمل بواريد وفرودي يا خيّي….

إذا كلّ 15 سنة….الحرب راجعة….

لازم نتحضّر نفسيّاً…ومعنويّاً….وتسليحيّاً…

 

لازم إذا هيك المعادلة…

ومصرّين الجماعة….إنّو بدّن يانا نبقى بهالبلد…..

لازم يغيروا المناهج التعليميّة…

وضيفوا مادّة…”التحضير للحرب اللّبنانيّة” يا خيّي….

 

 

هلّق هيدا…حلّ…ممكن يظبط للجيل الصاعد….

ياريت بياخدو بعين الإعتبار…

ولو إنّو عين الإعتبار بهالحالة…ياريت بتبلى بالعمى…

 

هلّق أنا…. بكرا… إذا علقِت شو بعمل؟

 

إذا علقت….وإجا واحد هبيلة….

 جاب فرد أو بارودي وسحبوا عليّي….شو بعمل؟

 

بقعد بكتبلو وبقريلو؟…..إي بقوّصني….

بقعد بتحاور أنا ويّاه؟….ما معو وقت الزلمي….بقوّصني….

بقبّع بالركيض؟…بقوّصني…. شو عم بتذاكى عليه…

 

بقلوّ شيل الفرد من إيدك…هيدا خطر؟….

وكأنّو هوّّي مش عارف يعني ….بقوّصني….

 

بقعد صلّي لربيّ أنّو يساعدني؟….ممكن تظبط هيدا….

لكن إذا طلع ربّي غير ربّوا…..بقوّصني….

 

شو بعمل….بقوّصوا؟…..ما بعرف…..

حتّى ولوّ بعرف….. ما فيّي…..

حتّى ولوّ فيّي…ما بدّي يا خيّي…..

 

طيّب …بكرا… إذا علقت…أنا شو بعمل؟

 

 

إحترماتنا….

مش كلّ اليهود مع إسرائيل

Posted in Writings by johnnyhage on November 11, 2010

مبارح….بعتتلي صديقتي رسالة إلكترونيّة…..

فيها فيديو…. بيحكي عن زيارة نتنياهو لأميركا….

وبفرجينا المعارضة اللّي واجهتو بوحدي من المحاضرات…

اللّي كان عم بيخطب فيها باليهود الأميركان….

 (http://www.youtube.com/watch?v=xjLm6d2Mzgg)
 

ذكّرني هيدا الفيديو بإشيا كتير مهمّة…..

ذكّرني…كيف إنّو…

 

مش كلّ اليهود مع إسرائيل….

في يهود….مش طايقين إسرائيل…ولا طايقين الإحتلال….

يمكن كنت ناسيها هيدي أنا…مش يمكن…أكيد….

 

وذكّرني بإشيا تانية كمان….

ذكّرني كيف إنّو……

 

مش كلّ شي أبيض أو أسود…..

في رمادي…وبنفسجي…وفستقي….

وفي عدد لا يحصى من تركيبة الألوان…..

 

مشّ كلّ شي صحّ…أو غلط…..في يكون بين التنين…

وفي يكون التنين كمان….متل نظريّة الQuantum Theory

 

بنفس الإطار….

مش كلّ الشيعة مع حزب أللّه…أو مع برّي…..

 

وبردو بنفس الإطار…..

مش كلّ السنّة مع الحريري… أو مع كرامي….

كمان وبنفس الإطار….. ويا فرحتي شو رح بساع هالإطار….

مش كلّ الدروز مع البيك حتّى….

 

وضروري نوضّح إنّو مش كلّ الأرمن مع الطاشناك….

 

وكذلك….ويا ويلي من ذلك……

مش كلّ المسيحيّي مع جعجع….أو مع عون…

أو فرنجيّة…أو جميّل (الكبير أو الفرافير)… أو المرّ….أو سكاف…

أو شمعون…أو فارس….أو فرام….أو إدّه….أو فرعون….

أو أبو أرز…أو أبو أنطون……أو أبو جعيص…….

 

أو..أو.. أو.. أو.. أو..عوّ.. عوّ.. عوّ.. عوّ.. عوّ.. عوّ.. عوّ..

 

 

 

إحترماتنا…..

%d bloggers like this: