Ihtirametna

نحنا ربّ السياسة

Posted in Writings by johnnyhage on December 26, 2010

 

[Image Source: Chroniques beyrouthines]

 

حلو كتير شو عم بصير عنّا بالسياسة….

شو بدّك يا خيّي نحنا….بلد خلقنا….

لنتعاطى سياسة…

نحنا ربّ السياسة…..

 

ما في عنّا حدا ما بيفهم سياسي…..

كلّن ما شالله عليهن…. كامشينا…..

كامشينا… وساحبين فينا….

 

إنّو شو فكرك يعني هينة….

هينة… إنّو صرلنا أكتر من شهرين تلاتة…

مجلس نيابي…ومجلس وزاري بإمّن وأبوهن..

ساحبين بهالبلد….

وعم بناقشو…وعم بحلّلوا….وعم بيخطبوا….وعم بجودوا..

بالمحكمة الدوليّة…..وبتفاهم ال سين – سين.

هينة هيدي؟

 

اخصوصي إنّو…

هودي التنين….

 

ما حدا داري شو عم بصير فيهن…..

لا حدا داري شو عم بصير بالمحكمة…

ولا حدا داري شو عم بصير بالسين سين….

 

بيجوا قال…وبخبرونا إنّو شو “ممكن” يصير…

لاه…تعوا لقلكن….

نحنا ما بدنا نعرف شو “ممكن” يصير….

ممكن يصير كتير إشيا…..

ممكن يصير إشيا لا تحصى ولا تعدّ…

يعني في عندك إحتمالات…

فيها اتقعّدنا 10 سنين عم منحلّل….

إي هيدي ما بتنفع….

 

نحنا بدنا نعرف شو “عم بصير”….

 

إي بس…إذا هنّي ما بيعرفوا….

كيف بدّك ياهن يجو يخبرونا…

ما……ما بيعرفوا…

 

أنا متل ما شايف…..

إنّو عنّا قرطة سياسيّي…

حاطّين رزنامة قدّامن….

وملونين هالإيّام اللّي منعيّد فيها..واللّي هييّ كتيرة عنّا..

ملونينها بأقلام تلوين عريضة….

لتضوّي قدّامن….

 

وبيجوا…

وبينزلوا فينا…

نقاشات…وتحاليل….وخطابات….وتجويد…

لنوصل لشي عيد ….

 

بعدين…ببشرونا…

إنّو هلّق كل شي رح يوقف…بمناسبة الأعياد….

ليتركوا مجال للعالم إنّو تعيّد…بطبيعة الحال….

 

ومن بعد الأعياد…

بيرجعوا…بطلّوا علينا…. وببلشو…عن جديد…

من الأول…

ودايماً ببلشو بإنّو

“فترة ما قبل الأعياد..هيّي غير ما بعد الأعياد”

 

انتبهوا …كلّن عندن رزنامات…..

والرزنامات كلّها بتشبه بعضها….

بسّ الألوان العريضة اللّي اللّي بلونو فيها…

هيدي بتختلف……

هون كلّ واحد عندو لونو صار…..

إي….

 

 

إحترماتنا…

Advertisements

بوظة ع مغلي

Posted in Writings by johnnyhage on December 24, 2010

 

مبارح كان آخر نهار شغل ….قبل الأعياد….

ف…اجتمعنا بالمكتب أنا وزملائي…..

لنتغدّا ونعيّد سوا….

 

تغدّينا…..ومن بعد الغدا….

وحدي من زميلاتنا….منّاش لبنانية…

يابانيّة هيي…. من اليابان يعني….

 جاية وجايبي معها بوظة…..للتحلاية…

 

صرلها هيّي أكتر من عشر سنين عايشة بلبنان….

ولبنانيّتها بعدها عقدّها….

بودّها تتعلم لبناني…

لكن اللّبنانييّ مننش عم يسعفوها….

لأنّو لمّن يشوفو شكلها ياباني….

بيجو حكو معها بالإنكليزي….مش باللّبناني….

فطلعت البنت فحلة بالإنكليزي…

لكن هيّ بينها وبين حالها….

بعدها عم بتحاول تركّ عحالها لتتعلّم لبناني…

 

 

هلّق جايي هيّي ومبسوطة….

وجايبة معها عالمكتب جاط…

في بوظة….

في بوظة ع مغلي…..

بوظة ع مغلي؟

أنا صرلي أكتر من 28 سنة لبناني….

وما معيش خبر إنّو في شي إسمو بوظة عمغلي…..

 

 فسألتها أنا…قلتلها بتعرفي شو يعني مغلي؟….

قالتلي هيّي بالإنغليزي..أكيد…..

“أي لوف مغلي….إت إذ لايك كنافة أند بوظة

I love Meghli, it is like knefeh and bouza”…

قلتلها: “أنا بعرق شو هوّي المغلي….

بسّ إنتِ بتعرفي شو يعني “مغلي” باللّبناني؟”

قالتي: “لأ..”

قلتلها: “إي… بعرف…

مغلي يعني boiling….

وبوظة…يعني متلّج…..freezing يعني

وبوظة ع مغلي….يعني إنتِ هلّق عم تاكلي……

Freezing  ع  Boiling…..

عرفتي كيف؟….”

 

اتطلّعت فيّي هييّ وسطّلت….

وضلّت مسطلة شي دقيقتين…تلاتي…

عم بتجرّب تفهم شو قلتلّها….

 

رجعت دغري قلتلّها:

“ليكي…

طالما نحنا عايشين بمجتمع إستهلاكي…

طالما في عالم رح بتضلها عم بتحكّ راسها….

لتفبرك اختراعات جديدة….بتسطّل….

لتجي العالم اللّي متلي واللّي متلِك…

تسطّل وتشتريها….

متل ما صار فيكي هلّق….

 

ف…ينعاد عليكي…وعليكن جميعاً…..

وخلّينا نشوف سنة الجايي متل اليوم…..

ع شو رح منسطّل…..

 

إحترماتنا…..

 

صار بدنا إعادة تأهيل

Posted in Writings by johnnyhage on December 11, 2010

الساعة وحدة بعد نص ليل مبارح…..

بلّشنا نحكي عن شو شفنا……

وبقينا عم نحكي للساعة تلاتة و نصّ ع وجّ الضوّ…..

 

حكينا عن الإسرائلييّ…..

وعن إنّو….العمى بقلبن شو وقحين…..

وعن كيف إنّو بعدن قاعدين بفلسطين….

لأ..ومقتنعين إنّو هيدي أرضن كمان…..

وهيئتن مفكرين إنّن باقيين الجماعة…

وعم بفرقوا جنسيّات إسرائيليّ كمان…..

 

 

حكينا عن الفلسطنييّ……

وكيف إنّو منقصمين…

وكيف إنّو عم بحاربوا العالم كلّوا….

لوحدن….

عفواً بمساعدة جامعة الدول العربيّة….

لوحدن يعني….

وفتنا بدباجة إلها أولّ وما إلها آخر…

عن القضيّة الفلسطنيّة…..

وعن إذا عم تتقدّم لقدّام…أوعم ترجع لورا…..

أو إنّو إذا بعدا…ومش عم بتزحزح من محلّها….

 

 

حكينا عن الأميركان…والبريطانيّي…والأوروبيّي….

وعن ألأمم المتّحدة كمان…..

وعن كيف إنّو هنّي داعمين هالإسرائيلييّ…

بشكل متواصل…..ماديّاً…ومعنويّاً…وبطريقة عميا يعني…..

لدرجة صاير هيدا الدعم…صاير بيشبه

نوع من أنواع الهَبَل……

والهبل عم يتزايد مع مرور الزمن عفكرا…

وعم يتفشّى ليعدي غير بلدان كمان….

 

 

 

وحكينا عن العرب……

يا بييّ شو حكينا عن العرب…..

حكينا ولتّينا وبربرنا….

كتيرعن العرب…..

 

بربرنا عن العمى اللّي بقلبنا…..

والعمى اللّي بعيوننا….

والعمى اللّي بذاكرتنا….

والعمى اللّي بجهودنا…

والعمى اللّي بخطاباتنا….

والعمى اللّي ب هبلنا….

وكلّ أنواع العمى اللّي فينا……

 

وعرب مش بسّ يعني أنظمة وحكومات…..

لاه….العمى بقلبنا ك….شعوب….

ما هيّ الشعوب اللّي بتعمل أنظمة وحكومات…..

ولاّ لأ؟

 

 

وبربرنا عن القضيّة الفلسطنيّة

وكيف إنّو هيدي القضيّة…. منّاش قضّية للفلسطينيّة وبسس…..

انتبهوا….هيدي قضيّة عربيّة مسائبة إنّها عأرض فلسطين…..

وهيدي القضيّة الفلسطينيّة…

هيدي منّاش قضيّة إسلاميّة….

كمان انتبهوا…..

هيدي قضيّة إنسانيّة من دون ما يكون الدين إلو دخل فيها…..

 

هيدي يا تقبروني…..قضيّة عالميّة….

 

بسّ مسائبة….إنّو العرب……

نحنا يعني….

حاطيّنا عجنب…. لأنّو مش مسائبة هلّق….

وكلّ ما منحطّها أكتر عجنب…

كلّ ما عم نقضي عالقضيّة أكتر وأكتر….

مسائبة إنّو نحنا العرب….. هلّق معجوقين….

عم نشتري…وعم منبيع……وعم نقبض…..و عم ندفع….

 

 

كلّ هالحكي والديباجة إجا من بعد ما شفنا……

التمرينة الأخيرة لمسرحيّة “عائد إلى حيفا”

بمسرح بابل بالحمرا…

المسرحيّة بتفتح اليوم….. وبتبقى عم تعرض يوميّة ل 19 ديسمبر….

 

“عائد إلى حيفا” هيّي بالأساس رواية لغسّان كنفاني…..وهلّق عم تخرجها لينا أبيض عالمسرح…..

 

 

اتفضلوا….روحوا شوفوها…..

وبسّ تشوفوها….

خبّروني…..

شو رئيكن إنتوا؟….

 

 

ما صار بدنا إعادة تأهيل؟

 

 

إحترماتنا….

%d bloggers like this: