Ihtirametna

ويكيليكس….يا بيّي شو وسخين

Posted in Writings by johnnyhage on December 7, 2010

بما يخصّ آخر أحداث ويكيليكس….

أنا تبيّنلي إنّو الكذب بدمّن يا خيّي….

مش إنّو كذّابين عن غير قصدن…

لأ…كذابين عن قصد…

وبكلّ عين وقحة كمان….

 

وهيدا الإنتربول الدولي….هيدا مسخرة…

هيدا مسخرة على نطاق دولي….

 

إجا إستاذ “جوليان أسانج”…

ونشر يللّي بدّو ينشرو…..

وحطّ النقط عالحروف…..

وخبّر الخليقة بما فيها…

عن قدّيش السياسي كذّاب…..

 

انتبهوا….هوّي فضح الأميركان…..

بسّ الأميركان…كانو عم يجتمعوا….

مع غير الأميركان….

وتلات ارباع العالم هلّق…ماشيين مع الأميركان…

 

كمان انتبهوا…الربع الباقي…

مش يعني أوادم هودي….

لاه….أوعا تغلطوا….

الفرق إنّو هودي….

ما كانوش يجتمعوا مع الأميركان….

وما إجا حدا يفضحن بعد…..

 

هلّق اللّذيذ بالموضوع…..إنّو ما حدا استرجى يتذاكى….

ويجي يدّعي…إنّو هودي الوثايق مش مظبوطين…

أو كذب مثلاً…أو نَفاق…أو ما بعرف يمكن مزوّرين…

لاه….

كلنا متّفقين….إنّو الوثايق صحيحة ميّة بالميّة…

وإنّو الوسخنة بين الدول…

هيدي وسخنة بكلّ ما للكلمة من معنى….

 

مش هون المشكلة…

المشكلة إنّو…..

كيف هيدي الوسخنة تسرّبت للإعلام….

 

قامت الدول…. صفرنت…

واتدخّل الإنتربول…..

 

انتبهوا..اتدخّل الإنتربول الدولي….

ليشوفوا بأيّ تهمة بدّن يلزقوا للزلمي…

تما يعدش يسرّب هيك وسخنة…

 

لأنّو بنظرن…هوّي صار عم بتوسخن هلّق….

 

يمكن يلزقوه بتهمة….

التحرّش الجنسي بالسويد….ب “آب”….

من آب كان بالسويد الإستاذ…وهلّق بهالحشرة…

فاقوا الجماعة يلقطوه للتحقيق….

 

أو يمكن يلزقوه….

بنشر السياسة الأميركيةّ الوسخة بالعلن…..

المشكلة مش بالسياسة الأميركيّة الوسخة….

المشكلة بالعلن….

 

 ما بعرف بشو رح يلزقوه…

بسّ بعرف…إنّو رح يلزقوه….

 

هلّق أنا…من ميلتي أنا…ريّحت بالي شويّ…

لأنّو كنت مفكّر إنّو لبنان وحدوا ملتعن عرضو….

طلع إنّو لاه…..

 

وينك وين…..

 

إحترماتنا….

Advertisements

ريسك ينطح ريسك

Posted in Writings by johnnyhage on December 2, 2010

مبارح كنت عم بحضر ورشة عمل….

عن المبادرات الإجتماعيّة أو إذا بدكن بالإنكليزي بيسمّوها

“سوشال أنتربرنارشيب”….هيدي P  بالآخر…مش ….B

 

فطلب منّا المحاضر….”جيلبير” كان إسمو….

وبعدو إسمو “جيلبير” عفكرا….

طلب منّا انخبّرو عن المخاطر أو ال”ريسك”…

اللّي أخدناها بحياتنا…..

 

طلعلو شي  10 أشخاص من 18 شخص….وجاوبوا…

إنّو  “العيشة بلبنان”….هيّ “ريسك” جدّاً كبير مش شويّ….

 

وكلّ ما كان يطلع حدا يجاوب هيك جواب….

كانت المجموعة عم تضحّك…عأساس إنّو جواب مهضوم…..

 

بسّ إنّو إذا بتفكروا فيها….

العيشة بلبنان…عن جدّ “ريسك”…..

مش بسّ “ريسك”…”ريسكات”..

هلّق بدكن تقولولي…..إنّو مش “ريسك” تعيش ببلد…..

 

ما بتعرف أيمتا بتنقطع فيك الماي…إنت وعم تتحمّم….

وملحّف بالصابون…. وما بعدش فيك تكفّي حمّام…

إلاّ إذا شرّف السيترن…….

هيدا “ريسك”….

 

ما بتعرف أيمتا بتكون عالطريق عم بتسوق…

وبيجي كميون..من شي كسّارة….

جايي صحتو….محمّل وزن زيادة يعني….

وفلتانين معو الفرامات بالنزول….

ف…بقشّك…..إنتَ والخليقة….

هيدا “ريسك”….

 

ما بتعرف أيمتها بتكون آخد فرصة من شغلك…..

بتزور دايرة رسميّة بالدوام الرسمي…

وبتكتشف إنّو  الموظّفين… وقّفوا شغل لليوم…

لأنّو هلّق صار وقت يشربو فنجان قهوة…….

هيدا “ريسك”….

 

ما بتعرف أيمتا بتكون نازل شغل عالكموبيوتر بالليّل….

لأنّو لازم تسلّم مشروعك قبل ما يطلع الضوّ…

وإذ…بتنقطع الإنترنيت…

وتاجر الإنترنت ولا ممكن يردّ عليك قبل ما يطلع الضوّ….

هيدا “ريسك”….

 

ما بتعرف أيمتا بتكون نازل ب”الأسوسنير”……

ب بناية شي 10 طوابق……

حتّى تنقطع فيك الكهربا..بنصّ الطريق….

إنتَ وعالخامس يعني….

ولا تلبّد ما في حدا…..

“هيدا ريسك”….

 

ما بتعرف أيمتا إنتَ وسايق….

بتغطس ب”الخندق الغميق”……

مش هالمنطقة بالتحديد…..

تقريباً بكلّ شارع في عنّا خندق غميق……

“هيدا ريسك”…..

 

 

ما بتعرف أيمتا بتطبّ عليك بناية….إنت وماشي بالصدفة…

 بشارع مقتظ بالبنايات الطالعين بشكل عشوائي…

“هيدا ريسك”…..

 

 

ما بتعرف إذا بدّك تلعب ماتش فوتبول…

أيا لون لازم  بتلبس…..

أزرق…أصفر…أخضر….أحمر….برتقالي….شو؟

تما فريقك ينحسب عفريق….

إي “هيدا ريسك”…

 

ومن بعد ما يخلص ماتش الفوتبول…

ما تقوم شي رصاصة طايشة…..تهتدي عراسك…..

لأنّو في عالم بلا راس….عم تحتفل بالكلاشنكوفات….

وعم بتطرطش….

“هيدا ريسك”…..

 

 

ما بتعرف أيمتا بيطلع القرار الظنّي……

“هيدا ريسك”…..

 

 

والله شغلة هيدي……

ليك كم “ريسك” ب “ريسك” فيه……

يعني كان لازم جيلبير…. يغيّر السؤال نتفي…

وما يسألنا عن وجود “الرسيكات” بحياتنا…..

هوّي كان أفضل لو سألنا…

عن إذا حياتنا…. بعدها موجودة تحت كلّ “هالريسكات”…..

 

 

عرفتو كيف؟….

 

 

إحترماتنا….

 

%d bloggers like this: