Ihtirametna

هديونا ياه…هديّة

Posted in Writings by johnnyhage on January 23, 2011

خلصنا بقا…… ولك خلصنا بقا…..

لمّا راحوا مضيو إتّفاق الطائف…..

قبض كلّ واحد منّن مبلغ…

بيتراوح بين مليونين و8 ملايين دولار…

 ليوقفوا يتقاتلوا….ويتقاسموا البلد….

ودخيل عرضكن ما حدا يجي ينطّ…

ويقول فلان وفليتنان ما مشيو بالطائف….

لأنّو اللّي ما مشي بالطائف….رجع مشي بالدوحة…..

شو مشي؟…ركض……

وبالدوحة……

لا مليونين ولا تماني…..أكتر بكتير كتير كتير…..

وصارو الجماعة عم يدّشّوا ملايين…..

 

هلّق…..

هيئتن…..هضّموا….وحابّين يرجعوا يعبّوا….

لكن السعوديّة…فهمت اللّعبة….على ما يبدو…..

وقطر…فهمت اللّعبة عالّسريع…..

لأنّو الدوخة اللّي أكلتها بالدوحة….

ما صرلها زمان…..

 

الشعب اللبناني….

كمان فهم اللّعبة…..

بسّ…..حامل حالو غشيم…

ومش فهمان شي من شي…..

 

المشكلة بسيطة….

كلّ البلدان عم بديروا بلدنا…

لأنّو نحنا ما منعرف نديروا…

ببساطة…. لأنّو ما بعمرو كان بلدنا….

 

إستقلالنا…نحنا ما أخدنا…

ولا حاربنا كرمالو…

إجوا هنّي….وهديونا ياه…

هديّة….

هديونا ياه هدّية…عالعيد…

كرمال ساعة اللّي بدن…وبكلّ عيد…

يجو ويلعبوا فيه….

(بلا معنى أكيد)

متل ما يعملوا هلّق….

 

ع فكرا…

ما رح بصير البلد ل “اللّبنانيّي”….

إلأّ إذا أخدنا إستقلالنا بإيدنا…..

 

منستقّل….
من البلدان اللّي براّ…

ومنستقلّ….

من فساد الوزرا والنوّاب اللي الجوّا… كلّن….

 

بقولولي بدّك تاخد موقف….

بدّك تكون مع حدا….

إي لأ….اسمحولي…

ما بدّيش كون مع حدا…

بدّي إنّو ينزل الشعب عالأرض ويقشّن تنيناتن…

 

بس إذا الشعب اللّبناني ما انقبر وانهزّ…..

مش رح نستقل….

إذا ما نزل عالشارع….

وعمل ثورة ضد المعارضة والموالات….سوا…

لأنّو كلنّ كذّابين…وسرّاقين…وعندن “أجندات” خارجيّة….

مش رح نستقل…

 

رح يرجعوا…

من برّا…ومن جوّا….

يلفّولنا ياه هدية…..

ويهدونا الإستقلال….

…عن جديد….

 

من عيد….لعيد…..

 

 

إحترماتنا…

 

تحيّاتي

Posted in Writings by johnnyhage on January 21, 2011

إجت لعندي وقالتلي:

ليك يا تقبرني…

صرنا بال 2011….

وال 2011…غير ال 2010…..

سامع….

ف…..إذا بتريد…

اللّيلة قبل بكرا….لازم تشوف شو بدّك تعمل…

لأنّو هيك ما بصير…..

أنا اللّي بعرفو شغلة وحدي….

إنت لازم تغيّر حياتك……

سامع……؟

 

سامع…..؟

 

 

جاوبتها ساعتها أنا…..قلتلها:

سامع….

 

 

قالتلي:

 كتير منيح….

ف….

….شو بدّك تعمل؟

 

قلتلّها:

شو….؟

 

قالتلي:

شو…..شو؟

عم قلّك لازم تغيّر حياتك……

 هلّق قلّي هلّق….شو بدّك تعمل؟

 

صفنت شويّ…..وفكّرت شويّ…..

و…..قلتلها:

يا حياتي….

ما دامِك إنتِ عم تقولي….

إنّي لازم غيّر حياتي……

وبما إنّو ….يا حياتي….

ما في حدا قدّك حياتي….

يعني شو بدّي أعمل…..

مصفّى أنا إنّو مجبور إسمع منّك…..

لأنّو على ما يبدو…إنّو الأمر جدّي ومستعجل….

اللّيلة قبل بكرا عم بتقولي…

 

ف….متل ما بدّك…..

 

أنا….بقدّملك….تحيّاتي…

وبعتقد إنّو ضروري صار

لشوف شو لازم أعمل …

اللّيلة قبل بكرا…..

ت…

لاقي حدا غيرك بحياتي…

 

إي…؟

إحترماتي….

 إه….

 

إحترماتنا….

Tagged with: , , ,

شو إنتو كمان؟

Posted in Writings by johnnyhage on January 12, 2011

 

أنا كان بودّي إكتب شي غير هيك باوّل ال 2011….

لكن سائبت…إنّي هيك رح إكتب…..

 

من نتفي استقالة الحكومة بلبنان…..

 

بيناتنا….. هيدي حكومة كانت؟…..

هيدي كانت….مشروع حكومة فاشل…

مع وزراء… شو بدّي خبّركن يعني…. ولا أفشل من هيك…..

 

هلّق كانو تلاتين وزير فاشل……

اليوم صاروا تلاتين وزير سابق فاشل……

ما تفوتوني ب 8 أذار و 14 آذار ….

كلّن فاشلين…

وما حدا عارف كيف إنّو يدير هيدا البلد….

كلّن عم بدوروا داير من دار هيدا البلد…

وداير من دار هالبلدان كلها…

 

إي العما بقلبن دوخونا….

وكترة الدوخان….

بتقدّي ل…لعيان النفس….

والإستفراغ…..

إي….الإستفراغ العشوائي….

لدرجة إنّو صفّينا عم نطرطش عن بو جنب….

 

 

بتونس……

ولّعوا حالن…وفلتوا عالطرقات….

 

بالجزائر….

فقعوا….نزلوا عالطرقات…..

 

من المتوقّع ب موريتانيا….

إنّو يبجّوا بكرا…وينزلوا عالطرقات….

.

بالأردن…

مترمين البججان لنهار الجمعة….ليفلتوا الجماعة….

 

نحنا…بلبنان……رح نعرف نبجّ بقا…..

 

ولا صفّوا معيّرينا… وما منبجّ….

إلاّ لما 8 و 14 بدّن يانا إنّو نبجّ…..

 

بس لخبرّكن إنّو إذا ما بجّينا…..

رح يرجع يجي لعنّا 30 وزير فاشل جديد….

على الأرجح هنّي زاتن…

مع شويّة تغيير شنط (حقائب يعني)…

 

والبنزين….رح بضلّوا ساحب طلوع….

 

والكهربا رح بيجي عبالنا إنّو تجي…..

رح منصفّي إنّو عم نشتقلها أكتر….

 

ربطة الخبز…رح ببطلّ إسمها ربطة خبز….

رح بصير فيها رغيف واحد لا غير…..

 

وبدل حليب البودرة اللّي صار ب 30 دولار…

رح منصفّي عم منروّب حليب النوَر….

 

فأنا بقترح…..إنّو….

تبجّوا….تفقعوا…..

تفلتوا…..تطرطشوا….

ما بعرف شو بدكن تعملوا…..

بسّ هزّوا طيزيكن …

يحرق حريشكن اعملوا شي…..

 

ولاّ شو؟….

إنتو كمان قدّمتوا إستقالتكن؟……

 

 

 

إحترماتنا…. 

%d bloggers like this: