Ihtirametna

لازم نقررّ

Posted in Writings by johnnyhage on March 20, 2011

أنا مع إسقاط النظام الطائفي….

ولأنّي مع إسقاط النظام الطائفي….

حاسس إنّو في شي ناقص….

 

حاسس إنّو في أكتر من  30000 شخص نزلوا اليوم عالطريق…..

بدّن يسقطوا النظام الطائفي….

وعندن شعارات وإندفاع… ومطالب محقّة…

كلّ مطالبهن محقّة…

بس ما عندن “خطّة عمل”…..

 

عندن هدف….هوّي….إسقاط النظام الطائفي….

هيدا حلو عالورقة والقلم….

بسّ ما عندنا طريق لنوصل عالهدف….

 

بمصر وتونس وليبيا……كان في عندن راس….

وكان الشعب عم بطالب إسقاط راس النظام…

ولمّا أسقطوا الراس…سقط النظام ع مراحل…..

 

عنّا غير شي……

عنّا ما في راس…في روس…..

عنّا عم منطالب سقوط نظام سياسي طائفي بإمّو وأبوه…..

ف….لأزم نعرف بوضوح…..

إذا بدنا نوصل لهدفنا النهائي…اللّي هوّي “إسقاط النظام الطائفي”…

شو هويّ الهدف الأول أللّي بدنا نوصلّوا….

بعدان…شو هوّي الهدف التاني…

بعدان شو هويّ الهدف التالت والرابع والخامس…..

وأيمتا منوصل لإسقاط النظام….

 

لازم يكون في أهداف ملموسة وصغيرة لازم نحقّقها…..

….شو هيّي هالأهداف؟

 

هلّق…نحنا الشباب… شايفين الهدف النهائي…من بعيد…

بسّ بعد ما قرّرنا….أيا طريق لازم ناخد لنوصل….

 

إيه..لازم نقرّر….

لأنّو تأخرنا…..

وإذا ما قرّرنا….

العالم رح تزهق…..

ورح تسبقنا الثورة…

ورح يجي حدا تاني…..يركب الثورة….

ويسوق….

 

إحترماتنا….

لازم تنزلوا معنا عالطريق

Posted in Writings by johnnyhage on March 14, 2011

الأحد 6 آذار كانت  في مظاهرة…

وكانت مظاهرة جيدة…..

على أمل المظاهرة اللّي جايي تكون جيدة جدّاً…..

والمظاهرة اللّي بعدها تكون ممتازة….

والمظاهرة اللّي بعدها تكون فظيعة……

والمظاهرة اللّي بعدها تكون إخت محلوشي….

واللّي بعدها…على أمل إنّو يسقط النظام الطائفي….

 

بسّ ليسقط النظام الطائفي….

 لازم تنزلوا معنا عالطريق…..

 

الأحد 6 آذار كناّ شي عشرة ألاف شخص……

عشرة ألاف شخص مش كلمة بالتمّ…..

يعني إذا بدّك تعدّن واحد واحد….. بتعدّنّ…

عشرة ألاف مرّة…..

 

مش رح يسقط النظام من مرّة وحدة…

ولا من مرتين….ولا من تلاتة……

بدّوا يسقط لمّا مننزل عالطريق…

ومنرجع ننزل عالطريق….ومنرجع ننزل عالطريق….

لألله يفرجها……

 

بسّ ليسقط النظام الطائفي….

 لازم تنزلوا معنا عالطريق…..

 

جيت أسبوع الماضي عالشغل……

وسألت زملائي……ليش ما نزلتو عالمظاهرة ب 6 آذار؟

وحدة قالتي :”ما كان الي خلق”…..

وواحد قللّي: ” كنت عم ببرم ع بيت”

ووحدي تانية قال “كان عندي رقص”

ف…سألتن إذا هنّي بدّن إنّو يسقط النظام….

وطلع إنّو إي بدّن…..

قلتلن أنا ساعتها……

” بسّ…. ليسقط النظام الطائفي….

 لازم تنزلوا معنا عالطريق…..”

 

إذا بتريدو…

يا مين ما كنتو…عم تقروا عالرسالة….
هيدا  النظام اللّي عايشين في…ما بيسوى…..

تيصير بيسوى …لازم نغيروا….

ولنغيروا…. بدنا ….هيه…

نعمل شويّة جهد…..

بدنا ننزل عالطريق…لمّا يكون في مظاهرة…

ولمّا يكون في مظاهرة….

بدنا ننسى الرقص….والبيوت…..والقهوة….والتلفزيون….

والسينما…..والمشاوير….والغدوات… والعشوات…وطقّ الحنق…..

بدنا…. بسّ ننزل عالطربق……

 

يمكن تقولوا إنّو المظاهرة ما إلها طعمة وبلا فايدة…

أنا بقلكن إنّو مبلا …المظاهرة إلها فايدة…

بسّ فايدتها ممكن تكون “مو ظاهرة” من أوّل مرّة…

مرّة عمرّة…بتبتبيّن فايدتها….

 

 

زيّاد الرحباني بزماناتو قال:

“شايفوا عالنظام مش عم يمشي …غيّرلو النظام….

بركي إذا غيّرتلّوا بيمشي….عالنظام”

 

إي بسّ ت نغيّرلو النظام…..

لازم إنتو تنزلوا عالطريق…. بإنتظام…..

 

والنزلة المقبلة عالطريق هيّي ب 20 آذار….

ف…همّوها….

 

 

إحترماتنا…

 

جريدة ومظاهرة

Posted in Writings by johnnyhage on March 4, 2011

امسكت حالي اتوجّهت وع العراق …. ع كردستان….

كردستان..هيدا إقلبم بالعراق…آمن…وبيسكنوها الأكراد…..

هيدا المحلّ هوّي الوحيد..يللّي لا في تفجير ولا حرب ولا فرقيع….

لكن قبل ما أوصل لهونيك….قدّمت ع “فيزا”….

عالعراق بدنا “فيزا”؟

صح….

أخدت ال”فيزا” 17 نهار لطلعت…..

يعني لو اتأخّرِت بعد شويّ زيادي….كانت طلعت ال “فيزا” وطلعِت روحي سوا….

أنا كنت مفكّر إنّو العراقييّ بالوضع الأمني اللّي هنّي فيه….

يعني…شو بدّي قلكن..

رح يكونوا مستقتلين ليستقبلوا زوّار وسوّاح….

طلع إنّو لاه….

طلع إنّو مع كلّ الحرب والتعتير….

بعدن بيضربوا ألف حساب للبناني…

ف….اكرهت حالي…

ووطي باسبوري من عيني…..

 

لمنّ وصلْت عكردستان….

اكتشفت إنّو أهل البل….

العما بقلبن شو مناح..ومضيافين…

…فظيعين…..

يعني بخجّلوا اللّي ما بعمروا بيخجل قد منّن مناح…..

ف..كانوا الجماعة نازلين فينا عزايم ليوم العزايم….

كانو عم يعلفونا عالترويقة..وعالغدا… وعالعشا…بشكل مستمرّ….

واللحمة…تنطح الفوارغ…تنطح الدولما…..تنطح الدجاج….تنطح إالخ إالخ إالخ….  واسترجي ما تاكل….

ف….انفزرت….وطلعت روحي….

 

هونيك اكتشفت إنّو عندن مسلم…وعندن مسيحي….

وعندن أديان تاني ما حفظت شو هيّيّ…

واكتشفت إنّو بيهتمّوا ببعضهن بشكل مرعب….

وبيهتمّوا ببلدن بشكل فظيع…

..وأخر همّن شو هوّي دينو هيدا الكردي….طالما هوّي كردي….

هون…اكرهت بلدي…..ووطي بلدي من عيني….

 

ارجعت امسكت حالي ورحت ع “كندا”….

تاني أكبر بلد بالعالم…..

قبل ما روح…. زرت السفارة الكنديّة تلات مرّات…..

وفتّ بدهاليز تفتيش ونطرة ونطرة ونطرة…

وقدّمتلن موسوعة مستندات بتبلّش وما بتعود تخلص…

مستندات عنّي… وعن عيلتي … وعن سليلتي….. ومصريّاتي…. وعلماتي….. ومشاريعي…. ومستوى ذكائي…. ونمرة تيليفوني…. ونمرة إجري…. وكم مرّة بفوت عالحمّام بالنهار…..

 هيدا كلّو كرمال سافر 10 إيّام….

وللصراحة… فكّرت لوهلي إنّو إنشر هودي المستندات…كموسوعة مطبوعة عند شي دار نشر….لأنّو أخدوني شهر تحضير…وفيها بسهولي تطلع أطروحة دكتورة ل شرح تقنيّة السفر من لبنان  لكندا….

اخدت الفيزا لتطلع 16 نهار…وعرفت إنّي فيني سافر قبل 10 من موعد السفرة…

هون رجع وطي باسبوري من عيني أكتر شوّي,,, لدرجة صفّيت إنّو مش قاريه….

 

بكندا…..

شفت….كنديّي….

وشقت هنود فكرين حالن كنديّي…بهزّوا راسن هنّي…وبيرفّعوا صوتن هنّي وعم يحكوا….وبيحكوا إنكليزي ع هندي مكسّر…

بسّ كنديّي…..

كمان شفت صينيّي مفكرين حالن كندييّ…وعفكرة هودي أكتريّة….

وشفت يابانييّ فكرين حالن كنديّي… وعرب….وأفريقان….وأوروبييّ….

كلّن ….كلّن مفكرين حالن كندييّ….

وهنّي كنديّ…بسّ صارو كنديّي….

العما….

هودي مش دين واحد….هودي أديان ع حيلها…..

وهودي مش لون واحد….هودي ألوان ع حيلها….

وهودي مش لغّة وحدي….هودي لغّات ع حيلها….

وهودي مش عم بقبروا بعضن…

 هودي عايشين مع بعضن….متل السمنة عالعسل…. عايشين…ومبسوطين…وشاكرين ربّن….

كلّ واحد عطريقتوا…

وأربابن الهيئة متّفقين مع بعض….

هون…اكرهت بلدي أكتر…..ووطي بلدي من عيني اكتر….

وصفّيت…. عم شوف حالي أكتر بكندا….

و…. مش حالي طبيعيّة هيدي….

 

أنا وبكندا…..

شفت المصاروي…..عم “بسقطوا” نظام حسني مبارك…..

شقفت المصاروي وقلت نيّالن….

 

أنا وبكندا….

شفت البحرينيّي….واليمنيّي…..واللّيبييّ….والأردنيّي….

عم يتظاهروا ليسقطوا زعمائن وأنظامتن….

وشفتن….وقلت..يلاّ… عقبالن….

 

و…وأنا وراجع عالبنان…..

شفت دعوة من الشباب اللّبناني “لإسقاط النظام الطائفي”

اتحمّست….وفلت بدّي إنزل….

لكن لمّا وصلت عبلدي…. انعجئت وانشغلت بمشقّات الحياة…..

والعما بقلبي….انسيت إنّو هيدي المسيرة لازم أعطيها أولويّة….

لكن اعرفت بعدان إنّو 4000 شخص نزلوا تحت الطوفان….

وعبّروا عن رأين…

وقلت بيني وبين حالي…إنّو المسيرة التانية…أكيد رح إنزل….

 

يعطيهن العافية هودي الشباب…

وأنا يا تقبروني….

 مقتنع….

إنّو إذا ما أسقطنا النظام الطائفي عنّا….

رح منرجع منقبّر بعضنا….

ورح إكره بلدي…وباسبوري…وشعبي…وطائفتي بالمستقبل….

 

ف…اتفضّلوا انزلوا معنا ب 6 آذار…..

لأنّو ب 6 آذار…في دعوة ومسيرة جديدة…

الساعة تلاتة بعد الضهر…من الدورة لشركة الكهربا….

وياريت…..مننضم كلنا لهال 4000 شخص….

لأنّو هنّي الوحيدين بهالبد يُحترموا….

 

وأنا بتحدّاكن…..

إنّو تشاركوا هالرسالة مع أصحابكن وأهلكن….

وتعزموهن لتنزلوا معنا….لأنّو إذا ما نزلتوا….

رح ننزل كلنا، مع هالبلد انشاللّه… بخندق غميق…وعميق…

وقريباً رح بزتولّنا أسلحة… ورح يعلمونا نستعملهن ع بعض.. مع بعض…..

 

 

إحترماتنا….

%d bloggers like this: