Ihtirametna

ولوّ قطّشو

Posted in Writings by johnnyhage on November 29, 2012

عم بتساير أنا ويّاها ع كاس نبيذ وصحن شنكليش مع لقمتين طاووق…

وعم خبّرها كيف إنّو الديفيديات اللّي بتشتريهن هييّ من الضاحية …  عم بقطشوا…

والديفيديات اللّي بشتريهن أنا من عند “ريمون” من برج حمّود ما بقطشو ولا شويّ…

بتقوم هيّي بيتغيّر لونا….وبتعبّق….

ب صفي لونا أحمر…من ثمّ أصفر… ومن بعدا أزرق…ومن بعدا أخضر….

مرقت عالألوان كلها أللّه وكيلكن….

وصفّت عم تاخد نفس بصعوبة متل كأنّو رح بتختنق…

ووعم تحكي حكي عم بشرشر منّا سمّ…

بتقلّي….

ليك…أوعك…إيّاك…ثمّ إيّاك… ثمّ إيّاك…

من اليوم ورايح تجيب إسم “ريمون” علسانك…

 

بقبرك…إي بلعن عرضك….واللّه العظيم بنتفك….

واحد خيخا… ما عندو بيضات (عن تحكي عن ريمون هيّي هون)…

 

انبلعت… أنا…

صفّيت أنا عم باخد نفس عميق….

… العما ليّ شو…شو صاير مع ” ريمون ” تخمين؟….أنا سألتها…

 

مش هيدا ” ريمون ” نفسو.. جاوبتني…

 

صاير إشيا مع هونيك ” ريمون” إنت ما بتعرفوا….

فصار عندي عقدي من كلّ حدا إسمو “ريمون” بهالعالم….

 

فإذا بتريد اسمحلي…

ديفيدياتي رح ضلني جيبن من الضاحية… ولوّ قطّشوا…

 

 

إحترماتنا….

كتير بوزيتيف

Posted in Writings by johnnyhage on November 26, 2012

في شي حابب قلّك ياه من فترة…

ومش عارف كيف بدّي…ظبطو…ورستقو..

وقولو بطريقة ما تطلع إنّو سمجة…

 

المشكلة فيكي إنِّك ما بتفهيني أبدأً….

مش على نفس الموجة أنا ويّاكي….

يعني إذا أنا  عال “أف أم”….إنتِ عل “أي أم” بتكوني….

 

المشكلة التاني اللّي فيكي….

إنِك كتير بوزيتيف…..

 متفائلي كتير…

أنا بوزيتيف من وقت للتاني….

بسّ إنتِ…دايماً بوزيتيف…

إيّام بكون عم بقلّك إشيا منّاش منيحة أبداً….

مدري كيف بتقلبيها إنتِ..

وبتصفّي عظيمة…

 

لمّا إجي قلِّك إنّو إنتِ…بتعقدي…..

هيدا ما بيعني إنِّك رائعة…

هيدا يعني إنِّك بتعقدي…اللّي ما بيتعقّد…

هيدا الشي بيعني…

إنّو أنا صفّيت كلني عقد من ورا معاشرتِك…

 

 

لمّا إجي وقلّك إنِّك بتجنّني…

هيدا ما بيعني شي منيح أبداً…

هيدا بيعني إنّك بتجنّني اللّي ولا ممكن إنّو يجنّ…

إذا بدّك يعني … إنتِ من الأسباب…

اللّي عم بيرفعوا نسبة المجانين بالعالم مؤخّراً…

 

لمّا قلّك بتسطلي….

هيدا يعني إنتِ بتسطلي…

بتوقفي وبتطّلعي فييّ متل الموميا…وما بتعودي تتحرّكي…

بتسطّلي….

 

 

ولمّا قلّك تقبريني انشاللّه….

يعني يا ريت بتجي وبتقبريني انشاللّه…

أنا وعم بتنفّس بتقبريني…

كرمال …إرتاح….وإخلص بقا…

 

ولمّا قلِّك إنِّك سلبي….

عكس إيجابي هيدي….

ما فيكي تاخديها بوزيتيف…

ما سلبي يعني نيغاتيف….

 

 

اعرفتي شو قصدي بإنِّك كتير بوزيتيف….

يا ريت بتخفّفي شوي…

يا ريت… يا ريت بتتشائمي شي نتفي…

ليصير في توازن بحياتك….

لأنّو لماّ حياتك تصير كلّها تفائل…..

بتصفّي بتطّير العقل…

…و هيدي كمان.. “بتطيّر العقل”…

مش بالضرورة تكون شي منيح….

 

 

إحترماتنا….

ou vous partez “أو فو بارتيه “

Posted in Writings by johnnyhage on November 22, 2012

أو فو بارتيه؟ Ou Vous Partez….

دخيل عرضكن  أو فو بارتيه؟ Ou Vous Partez …وين رحتوا…

وين رحتوا وتركتونا عم منخبّص ونجلغم….

ارجعوا…

مش عارفين إنوّ نحنا جماعة…ما منعمل شي غير إنّو منقرط حكي؟

إنّو إذا قلنالكن بدنا الإستقلال… دغري بتعطونا ياه….

دغري هيك بتصدقوا يعني؟

إنّو ضروري تكونوا غالان…

مزبوط فرنساويّي ومتحضرين…بسّ مش ضروري هالقد يا خييّ…

ولك كنتو عزّبتونا شويّ…

ليكو العثمانييّن شو عملو فينا….. شوفو قدّيش ضاينو…

ليكو السوريّي شو عملو… حرقو ديننّا قبل ما يفلّو….

بيناتنا كان فيكن تمطّوها بالقليلة شي 100 سنة بعد لقدّام…

ولوّ ولو…

ليكو ارجعوا….

واللّه العظيم ارجعوا…

ليكو صار عنّا نفط بالبحر هلّق… ارجعوا…

ارجعوا بركي بيطلعلنا شي منّو…

ارجعوا…بركي منرجع منعمّر الترامواي سوا…

ارجعوا …

ليكو… لبنان… لبنان…

بلد كتير حلو….

فيكن تعملو “سكيski  “ عالجبل وتسبحو بالبحر…

بنفس النهار…

ارجعوا…

لبنان…. لبنان….

في 18 طايفة… وكل طائفة إلها 18 زعيم….

وكلّ زعيم إلو 18 حفيد…..

هلكوا ألله تبعولنا…. ارجعوا…..

ارجعوا…. وما تردّوا عحدا….

ارجعوا…

ولمّن يطلعلكن واحد غشيم عم يطالب بالإستقلال..

احلقولو… احلقولو…

أوعا تحسّوا حالكن غلط إذا بتحلقوا لكم واحد….

ليكو الزعما عنّا هلّق… بيحلقوا للشعب اللّبناني كلّ يوم مرتين….

مرّة عبكرا ومرّة عشية…

والشعب راضي… ما تعتلوا همّ…..

ارجعوا بركي منلغي عيد الإستقلال…ارجعوا…

أنكى شي واحد يعيّد عيد الإستقلال…

لمّن ما يكونش فيه إستقلال….

هيدي متل خبريّة بابانويل…..

بتعرفوها لخبريّة بابا نويل؟…

قد ما نجي ونتصوّر معو…

بضلّ إنّو أفيش بابا نويل….

إحترماتنا….

%d bloggers like this: