Ihtirametna

ليش ما منرقّم؟

Posted in Writings by johnnyhage on December 31, 2012

بمدينة نيويورك… بأميركا…

الحياة ما بتشبه الحياة بمدينة بيروت بلبنان….

بالمرّة ما بتشبهها…

ولا حتّى قريبة منّها…

صرلي شي أربع إيّام بنيويورك…

وحاسس حالي ما بسوى…

حاسس حالي ولا أهبل…

مش بسّ هيك.. حاسس إنّو نحنا اللّي عايشين بلبنان كلنا هبل…

دخلكن ليش بعد ما رقّمنا البنايات ببيروت…

ليش ما رقّمنا الشوارع…

ليش إذا بدّي دلّ حدن عبيت صديقتي براس بيروت….

لازم إذكر بربر أوكابابجي أوكوستا أوستاربكس أوكاريبو…

أوليناز… أوهارديز أو مكدونالدز أو برغركينغ أو سوكلين؟

ليش ما فينش قلّن شارع 11 عبدالعزيز بناية رقم 320

أو شارع 12 مكحول بناية رقم 6

أو شارع 10 بلس بناية رقم 102 الطابق رقم 3 شمال

ليش كلّ ما بدّي دلّ حدن عبيتي بالنقّاش…

لازم قلّن إنّي ساكن حدّ كنيسة بوجّ ترومبة..

مفرق عليه آرمة مجلّة أجنبيّة… بتفوت فيه بشارع ضيّق مقفي بلا إسم…

 آخر بناية عاليمين؟

ليش الّلبنانيّة بعد ما وصلولا هيدي…

شو هالقدّ بدها شطارة الخبريّة؟

ولاّ إنّو ما منعرف نعدّ تخمين؟

طيّب بركي المجلّة الأجنبيّة سكّرت…

 أو بركي الآرمة وقعت بشي عاصفة هوائية؟

أو بركي برميل سوكلين رجعوا شي 100 متر لورا..

شو بصير ساعتها….

… بيتغيّر عنوان بيتي…؟

بعد كم ساعة منفوت بال 2013…

هيك هيك ما في أشطر منّا بعدّ السنين…

خلّينا نبلّش نعدّ هالبنايات والشوارع…

ونرقمن إذا بتريدو…

وانشاللّه كلّ سنة بضلّ عنوان بيتكن هوّي نفسو….

وم يتغيّر…

إلاّ إذا إنتو قرّرتوا تغيرو بيت مثلاً….

هابّي نيو يير…

إحترماتنا….

ينعاد عغيركن انشاللّه

Posted in Writings by johnnyhage on December 24, 2012


دخلكن ليش كلّ سنة …
لمّن بدنا نعيّد بعض….
منقول ينعاد عليك….
 

منّوش حلو إذا بينعاد علينا…..
 

ما إذا انعاد علينا… يعني شايفينو من قبل….
وإذا كلّ سنة هوّي نفسو بدّو ينعاد علينا…
بزهّق بصير….
 

لازم بدل ما ينعاد عليك….
نقول…. انشاللّه…بينعاد عغيرك بركي…
وبركي اللّي صار مع غيرك… ب ينعاد عليك…
هيك بصير في تنوّع…
وكلّ سنة…. ما بينعاد علينا شي….
كلّو جديد بصفّي…
 

ينعاد عغيركن انشاللّه….
 

إحترماتنا…

قبل العمليّة ولاّ بعد العمليّة؟

Posted in Writings by johnnyhage on December 20, 2012

في إشيا غريبة عجيبة…. بتخطرعراسي…

من حيث لا يدري أحد…. بتخطر هيك…

من دون أيّ مقدّمة… أو أيّ مؤخّرة…

بتنزل… وبصير أنا حابب إستشير حدن عنّها…

طلعت بوجّي ومبيّنة إنّها عاملي…

بالقليلة شي عمليتين تجميل….

من اللّي بيعجبوكن…

العما بقلبها شو إنّو طالعة حلوي….

حلوي…لدرجة إنّو ما عرفتها…

ولك ما أنا كاين بعرفها من قبل….

… إي … ولا بتقول إنّو هيدي هيّي…

يعني صايرها ما بتشبه حالها أبداً…

وهيدا شي منيح…

افضل للبشريّة يعني….

لكن السؤال… اللّي نخرلي راسي…

واللّي ناطر مين إنّو يجاوبني عليه…

بكرا لمّن تتجوّز…

لأنّو هلّق صار فيها تتجوز…

صار في كتير بيستمنّوا عليها بهيك شكل…

إي… ف.. بكرا لمّن بتتجوّز…

وتجيب ولاد….

ولادها رح يطلعوا بشعين ولاّ حلوين؟…

ولادها رح يطلعوا بيشبهوها…

 قبل العمليّة….

ولاّ بعد العمليّة؟…

إحترماتنا…

%d bloggers like this: