Ihtirametna

عزلو يا جماعة

Posted in Writings by johnnyhage on April 3, 2016

قمت عزّلت البيت اليوم…

تعبت… لأنّو جديدة عليي هيدي….

 

لمن كنت عايش بلبنان….

هيك شغلات ما كنت فكّر فيها…

عزّل البيت…

 

هيّي لأنّو العقلية اللبنانية زفت من هالناحية…

منّاش معوّدتنا عهيك شغلات…

عالم اتّكالية اطلعنا… خصوصي الشباب والرجال…

عصغر… منتّكل عإمياتنا….

وعكبر لمن نطيلع مصاري شوية… منتّكل ععالم تانيي مندفعلها لتجي تعزّل جيّتنا…

 

إنتو عارفين إنّو لماّ الواحد يعزّل جيتو… بيصير يجوي أقل؟

مش بسّ بتصير تجوي أقل…بتصير تنضّف أكتر كمان…

وبتصير كلّ ما ينجوي البيت.. أو كل ما تطلع غبرة مثلاّ…

بتنفئس….

وبتصفي إنّو لأ… ما بيصير هيك…

 

باليابان… في حصّة بالمدرسة بينضفوا فيها الطلاب صفوفن وحمّماتن…

بتتخايلو شو يعني….

يعني هيدا اللي بيتعلم ينضف عصغر… رح بيصفي عم بنضف عكبر….

منو معوّد صار… مش رح يتعب متل حضرة جنابي…

ومش بس رح  ينضف مدرستو… رح بينضف بيتو …وحيّو…ومدينتو العايش فيها كمان…

 

رح بيصير إذا إجا وزير لعندو وقلّو بدنا نعمل مطمر بالمدينة…

رح ينفئس….ويصفي إنّو لأ… ما بيصير هيك…

رح بتصفي علاقتو مع الزبالة حميمة…

ورح يتعلّم يحترمها… ويفرزها… ويعيد تأهيلها ليرجع يستعملها…

 

ما هوّي إذا اتعودّ ينضّف عصغر… في ينضّف كلّ شي عكبر…

ما الزبالة بتجي من العالم هيّي…

جييّ زبالة… وعيشي زبالة… وقرارات زبالة.. وفي عالم زبالة كمان….

ولا لأ؟…

 

إحترماتنا…

إحترماتنا…من هونيك مدينة بكندا…

“كيفو “بوشي

Posted in Writings by johnnyhage on July 3, 2015

وقفت بوجّي ومبينة كاينة إنهّا مقبعة معا…

وعم تحكيني بكل قهر وجدّية وطاقة…

ولونها معبّق…احمر كاين… مقهورة…

وعم بتقلي بكلّ عزيمة وعنفوان

إنّو نحنا لازم نكون عم نحط جهد أكتر لندافع عن حقوق الحيوان…

روقي لحظة مش متابعك يمكن أنا… حقوق الحيوان؟

 

شو ذكرك هلّق بحقوق الحيوان؟…

 

“ما هاي هيي المشكلة… هايي المشكلة الأساسية…

إنّو ناسيين نحنا… ناسيين وناطرين حدا يجي يذكرنا…”

لأ… حاطة أمل وثقة إنّو أنا قادر إنّو ساعدها…. وهلّق… بسرعة…

يعني حسستني لوهلي إنّي…أنا بفك وبرط بحقوق الحيوان…

هييّ لي إجت لعندي لندافع عن حقوق الحيوان بالأساس…

حطّي جهد إنتِ…يا إختي شو بدك فيي؟

لي أنا بدّي حطّ جهد أكتر لدافع عن حقوق الحيوان…؟

 

دخلك هيدا الحيوان… عارفهوّي  إنك مفبركتيلو مسوّدة حقوق وراكضي فيها؟..

ليكي هيدا عارف إنك عم تحكي بإسمو يا تقبريني؟

هوّي شوهني هودي الحقوق؟… إنتِ أكيدي إنّو هوّي بدو ياهن يعني؟

 

ليكي في صديقه لئلي….

عندها كلب، ذكر…

اشترتو من محّل ببيع كلاب…

وصارت تملكو… (سلايفري العادة يعني)

سمّتو “بوشي” ليصير مهضوم بعينها أكتر…

 

بعدان صارت اتطعميه أكل معلّب…

جانك فود كلاب يعني…

بعدان إجت وخصيتو….

خصيتو كرمال ما يصير يعندو إحباط لأنّو ما عم بشوف كلاب، اناتة..

وبحال شاف كلاب أناتة بالغلط، خصيتو كرمال ما يحبّلن…

لأنّو ممنوع يحبّلن.. هوّي أصلاً ممنوع يشوفن بالأساس…

 

ما هيي زاربتو عندا من عبكرا لعشيّة…

حابستو بالبيت كلّ النهار…

لأنّو هيي بالشغل بتكون…

وهّوي بصفّي عم بدور بين الصالون والبالكون…

بتضهرو مرّة الصبح ومرة المسا…

بتربطلو شريطة برقبتو … وبتجرّو وراها…

ليضهر يفضي حاجتو… أحسن ما يعمل تحتو…

هلّق هيي بتضحك عليه…. وبتقلو إنّو رايحين نعمل كزدورة….

بس للحقيقة إنّو رايحين كرمال “بوتشي” ما يعمل تحتو..

 

ولمن يرجعو عالبيت….

بتصفّي حاطتو حدّا وهوّي قاعد دعم بلحوسها…

وهّي عم تضحّك وعم تتغنج… وعم تستمتع بتلحوس “بوتشي”…

ومقتنعة إنو الكلب مبسوط بحياتو…

ومرتاح وشاكر ربّو إنّو عندو حدا متلها..

جايي عم تستعبدو…

 

بتعرفي صارت الصورة واضحة براسي…

يمكن مظبوط نحنا لازم نعطي الحيوانات حقوقها…

بركي فينا نلاقي طريقة نسألهن هنّي شو رأيهن…

خليهن هنّي.. الحيوانات يخبرونا…

بركي هنّي بيعرفو يدافعو عن حقوقن  أكتر منّا يا إختي….

 

وركزي عالإنسان إنتِ…

شو بدّك بالحيوان…

شودخّلك بالحيوان…

شو فهمّك بالحيوان إنتِ…

 

اعرفتي كيف؟

 

دخلِك كيفو “بوتشي”؟…

 

إحترماتنا…

المخطط الأرتوذوكسي

Posted in Writings by johnnyhage on January 21, 2013

عمّ بتشمّوا العفن؟….

العما شو هيدا….

الهيئة الجماعة اتفقوا على قانون إنتخاب طالعة ريحتو…

قال بما إّنو أنا مسيحي….

ممنوع صوّت لحدا إلاّ إذا كان مسيحي….

عأساس إنّو أنا السياسي المسيحي بمثّلني….

والمش مسيحي بمثّل غيري….

السياسي اللّبناني، شيل دينو عجنب، ما بمثّلني… ما بمثّل حدا….

السياسي اللّبناني، شيل دينو عجنب، بمثّل علينا كلنا يا بابا…

هلّق الخبريّة المهمّة….

إنّو الزعما انقبروا… واتّفقوا…

على إنّو لبنان رح بصير رسميّاً بلد طائفي….

مبروك…

يعني إذا كان في أمل إنّو نطلع من الطائفيّة…

معدش فيه…

هلّق صار وقت نغطس بالطائفيّة…

هيك هيك طلوع مش عم نقدر نطلع منّا…

انزلوا فيها انزول… اغطسوا… شكّوا…

بكرا بعد الإنتخابات الجاية…

حضروا حلكن لنبلّش نبني لبنان عن بو جديد…

حضروا حالكن… بكرا لأنّو …

المروانة رح بصفّوا ممنوع يسجّلوا بقا إلاّ بجامعات تابعة للبطريركيّة…

الدروز مش مقبول إنّو يشتروا حليب وكورنفلس إلاّ من عند الدروز بقا…

الشيعة مش مقبول يشتروا كحول إلاّ من عند الشيعة… شوفو شو بدكن تعملوا…

والسنّة مش مسموح يشجعوا إلاّ الريّاضي بقا…

السياسيّي اللّي بيحكوا عالتلفزيون….ممنوع يحكوا مع حدن من برّات دينن…

أنا مابعدش فيني إسمع لناصر قنديل أو وئام وهّاب أو الشيخ الأسير أو عقاب صقر لأنّو مننّش مننّا….

يمكن هيدا الشي الوحيد الإيجابي بالموضوع…

هيك كلنا منرتاح من إنّو نسمع  ل% 90 من السياسيّي المعفنين اللّي من برات الطايفة….

ومنضلنا مبلوفين بال 10% من السياسيّي المعفنين اللّي من جوّات الطايفة…

بسّ بتعرفوا شو؟…

انقطرنا فيها هيدي….

إذا صار ممنوع نسمع لحدا إلاّ إذا كان من طايفتك…

شو يعني فيروز ما بيعود يسمعها حدا غير الأرتوذوكس؟

أه ه ه ه … ما مفهومة… هيدا مخطّط أرتوذوكسي شكلو… ليحتكروا فيروز لئلن…

منشان هيك سمّوه القانون الأرتوذوكسي…

وأنا.. بما إنّي ماروني مسجّل بدايرة النفوس….

ممنوع بقا تعملولي لايك عالفايسبوك إلأّ إذا كنتو موارنة مسجّلين بدايرة النفوس…

كلّ حدن علماني LAIQUE بهالبلد…

اشطبوه … إلعنو عرضو…

لأنّو بهيك قانون يا تقبروني…

ما بقاش فيه حدن رح بمثلو…

تحيا الطائفيّة…

عشتم وعاش لبنان…

بلدّ…

طائفي…

مقسّم…

محروق دينو…

إحترماتنا…

%d bloggers like this: