Ihtirametna

كتير بوزيتيف

Posted in Writings by johnnyhage on November 26, 2012

في شي حابب قلّك ياه من فترة…

ومش عارف كيف بدّي…ظبطو…ورستقو..

وقولو بطريقة ما تطلع إنّو سمجة…

 

المشكلة فيكي إنِّك ما بتفهيني أبدأً….

مش على نفس الموجة أنا ويّاكي….

يعني إذا أنا  عال “أف أم”….إنتِ عل “أي أم” بتكوني….

 

المشكلة التاني اللّي فيكي….

إنِك كتير بوزيتيف…..

 متفائلي كتير…

أنا بوزيتيف من وقت للتاني….

بسّ إنتِ…دايماً بوزيتيف…

إيّام بكون عم بقلّك إشيا منّاش منيحة أبداً….

مدري كيف بتقلبيها إنتِ..

وبتصفّي عظيمة…

 

لمّا إجي قلِّك إنّو إنتِ…بتعقدي…..

هيدا ما بيعني إنِّك رائعة…

هيدا يعني إنِّك بتعقدي…اللّي ما بيتعقّد…

هيدا الشي بيعني…

إنّو أنا صفّيت كلني عقد من ورا معاشرتِك…

 

 

لمّا إجي وقلّك إنِّك بتجنّني…

هيدا ما بيعني شي منيح أبداً…

هيدا بيعني إنّك بتجنّني اللّي ولا ممكن إنّو يجنّ…

إذا بدّك يعني … إنتِ من الأسباب…

اللّي عم بيرفعوا نسبة المجانين بالعالم مؤخّراً…

 

لمّا قلّك بتسطلي….

هيدا يعني إنتِ بتسطلي…

بتوقفي وبتطّلعي فييّ متل الموميا…وما بتعودي تتحرّكي…

بتسطّلي….

 

 

ولمّا قلّك تقبريني انشاللّه….

يعني يا ريت بتجي وبتقبريني انشاللّه…

أنا وعم بتنفّس بتقبريني…

كرمال …إرتاح….وإخلص بقا…

 

ولمّا قلِّك إنِّك سلبي….

عكس إيجابي هيدي….

ما فيكي تاخديها بوزيتيف…

ما سلبي يعني نيغاتيف….

 

 

اعرفتي شو قصدي بإنِّك كتير بوزيتيف….

يا ريت بتخفّفي شوي…

يا ريت… يا ريت بتتشائمي شي نتفي…

ليصير في توازن بحياتك….

لأنّو لماّ حياتك تصير كلّها تفائل…..

بتصفّي بتطّير العقل…

…و هيدي كمان.. “بتطيّر العقل”…

مش بالضرورة تكون شي منيح….

 

 

إحترماتنا….

Advertisements

ليّ هالغموض كلّو؟

Posted in Writings by johnnyhage on November 15, 2012

لمّن كون عم بتحدّث معِك….

بلاحظ عحالي…. إنّو أنا واضح يا إختي…

و… و… دغري بحديثي…

يعني…. لمّن تسأليني سؤال…

بجاوب بطريقة…إنّو….

ما بترك مجال للشكّ…أو للتحليل… أو للتوقّع

….أو للتسائل….أو للتبصير…أو للتخمين..أو لأيّ شي تاني…

يعني بجاوبك… بشو بعرف..

ولمّن بكون ما بعرف….

بقلّك ما بعرف…

لأ..

وبرشدك على حدن ممكن إنّو يكون بيعرف الجواب…

 

إنتِ… غير….

 

إنتِ كلما بجي بسألِك سؤال بسيط…

بيطلعلي جواب… مقعد…

محبوك…

مقعد لدرجة أوقات أنا بتعقّد…

ومحبوك بعبارات ..ما.. مش صحبة أنا ويّاها أبداً يعني…

عبارات متل…

بفتكر….

وبعتقد….

ومفروض….

ومفترض… هيدي منشقّة منّها هي….

ومبدئيّاً….

ويجوز…

وفي إحتمال….

وبركي….

ومعقول……

طيّب مش معقول…..ليّ هيك؟…

 

ليّ هالغموض كلّو…؟

 

ما هوّي…أنا حابب إفهم عليكي شوّي….

بسّ مؤخّراً… مصفّى متل الهبيلة…

ما عم بفهم شي من شي….

مصفّى إنّو … كعيت….

 

إحترماتنا…

مفكرا حالها عم بتفكّر

Posted in Writings by johnnyhage on May 23, 2011

إنتو ملاحظين شو إنّو اللّيل قاسي بكون….

لمّا بتصفّي ناطرو ليقطع….

وبتصفّي سهران… مش لأنّو حابب تسهر…

بسّ لأنّو… منّكش قادر تنام….

 

خصوصي إنّو قبل ما يجي هيدا اللّيل….

بتكون شفت حضرة جنابها…..

 وفتحت معها حديث….

حديث دقيق شويّ….

…ودقيق كتير بركي….

لدرجة بتصفّي….

حاطط قلبك عإيدك يعني….

وعم بتزين كلماتك…..

تما يجي يزقّ لسانك….

وتعملّك شي غلطة قاتوليّة….

 

وبعلمك عأساس… إنّو وصلت لآخر الحديث معها….

وناطر منّها شي جواب…

 

بتجي هيّ… وبتنتعك جواب….

متل يعني…كيف بدّي قلّك….

“اعطيني شويّة وقت….

خلّيني فكّر شي كم يوم…..”

 

العما…..شو  “شي كم يوم؟”

ولي وما قاعد عأصابي أنا….

…قاعد وعم بتعنزق عليهن رح يتفتّقوا…..

 

و….بيجي اللّيل…..

 

وبدل ما تكون حضرة جنابها قاعدي وعن جدّ عم بتفكّر…..

بتروح هيّي….

وبتنام…

وعقلبها متل العسل…..

وبصفّي أنا….

سهران….مش لأنّو حابب إسهر…..

بسّ لأنّو قلقان….ناطر منها شي جواب….

 وعم فكّر….

بشو معقولي هييّ تكون عم بتفكّر…..

 

العما…

 

وبعد كم ليلة….

بتجي بتسألها….”شو صار معِك؟….”

بتقلّك…. بعدني عم فكّر…..

 

هيّي مفكرا حالها عم بتفكّر….

وأنا….برضوا…..

مش عم بعمل شي غير إنّو عم بفكّر…..

 

 

إحترماتنا…

%d bloggers like this: