Ihtirametna

ولوّ قطّشو

Posted in Writings by johnnyhage on November 29, 2012

عم بتساير أنا ويّاها ع كاس نبيذ وصحن شنكليش مع لقمتين طاووق…

وعم خبّرها كيف إنّو الديفيديات اللّي بتشتريهن هييّ من الضاحية …  عم بقطشوا…

والديفيديات اللّي بشتريهن أنا من عند “ريمون” من برج حمّود ما بقطشو ولا شويّ…

بتقوم هيّي بيتغيّر لونا….وبتعبّق….

ب صفي لونا أحمر…من ثمّ أصفر… ومن بعدا أزرق…ومن بعدا أخضر….

مرقت عالألوان كلها أللّه وكيلكن….

وصفّت عم تاخد نفس بصعوبة متل كأنّو رح بتختنق…

ووعم تحكي حكي عم بشرشر منّا سمّ…

بتقلّي….

ليك…أوعك…إيّاك…ثمّ إيّاك… ثمّ إيّاك…

من اليوم ورايح تجيب إسم “ريمون” علسانك…

 

بقبرك…إي بلعن عرضك….واللّه العظيم بنتفك….

واحد خيخا… ما عندو بيضات (عن تحكي عن ريمون هيّي هون)…

 

انبلعت… أنا…

صفّيت أنا عم باخد نفس عميق….

… العما ليّ شو…شو صاير مع ” ريمون ” تخمين؟….أنا سألتها…

 

مش هيدا ” ريمون ” نفسو.. جاوبتني…

 

صاير إشيا مع هونيك ” ريمون” إنت ما بتعرفوا….

فصار عندي عقدي من كلّ حدا إسمو “ريمون” بهالعالم….

 

فإذا بتريد اسمحلي…

ديفيدياتي رح ضلني جيبن من الضاحية… ولوّ قطّشوا…

 

 

إحترماتنا….

Advertisements

اتركيهن يختلطوا

Posted in Writings by johnnyhage on November 1, 2012

ليكي إنتِ عارفة إنّو الشفاف إلهن تلات طرق إستعمال…

هودي اللّي أنا بعرف فيهن…

ممكن يكونو أكتر من هيك…

 

أوّل طريقة…

إنتِ بتستعملي الشفاف… لتحكي….

 في يحكي من دون شفافو يعني؟…

….صعبة….مش على علمي….

بدِّك شفاف لتحكي…لتقرطي حكي…

وهيدا شي شاطرة كتير فيه حضرة جنابِك..

وأنا شاهد على ذلك….. بشهد عبياض إذا في لزوم….

هيدا كامشتي بحرفنة إنتِ….

ما بدّا اتنين يحكو فيها…

 

تاني استعمال للشفاف…

هوّي لتطلسي حمرا عليهن…لمّن بدّك تزينيهن….

لتحسّي إنِّك جذّابة مثلاً…

أو لمّن بدّك تغيريلهن لونن…

ليلبقو مع اتيابك… أو مع محنِك مثلاً….

أو بركي أوقات بتلونيهن … لما يبينو إنن بلا لون….

ولتصيري أكتر كوول…بتجي بتطلسيلن حمرا …

بتزينيهن شويّ…

 

وتالت إستعمال يا….تقبريني….

وهيدا الأهمّ من بين التلاتي….

الشفاف لازم تعرفيهن على اشفاف تانيين….

ليختلطوا….ل..ل… ليتفاعلوا….ليندمجوا….لينصهروا…

لأنّو ما بجوز يضلّن لوحدن…

حرام….

ما هنّي انخلقوا لهيدا الهدف…

ليتشاركو مع شفاف تانية…

ما بدن …بدّن …بدّن ياخدو ويعطوا يعني….

 

إي اعطيهن مجال….اعرفتي كيف…

اعطيهن…

 

وأنا شفافي ما بيشكو من شي يعني…

عرِفتِ كيف؟

وما….مش معرّفين عشفاف كتيرة كمان….

فا….فيهن…فيهن… يتعرّفوا مثلاً…

 

ليكي أيمتها إنتِ… آخر مرّة عرّفتي شفافك عشفاف تانيي…

واستعملتيهن لغير قرط الحكي وطلس الحمرا مثلاً؟

يا ريت بنوريني ع….هيكِ معلومة دخيل عرضِك….

 

شو قلتِ؟

 

إي إحترماتنا…

 

مفكرا حالها عم بتفكّر

Posted in Writings by johnnyhage on May 23, 2011

إنتو ملاحظين شو إنّو اللّيل قاسي بكون….

لمّا بتصفّي ناطرو ليقطع….

وبتصفّي سهران… مش لأنّو حابب تسهر…

بسّ لأنّو… منّكش قادر تنام….

 

خصوصي إنّو قبل ما يجي هيدا اللّيل….

بتكون شفت حضرة جنابها…..

 وفتحت معها حديث….

حديث دقيق شويّ….

…ودقيق كتير بركي….

لدرجة بتصفّي….

حاطط قلبك عإيدك يعني….

وعم بتزين كلماتك…..

تما يجي يزقّ لسانك….

وتعملّك شي غلطة قاتوليّة….

 

وبعلمك عأساس… إنّو وصلت لآخر الحديث معها….

وناطر منّها شي جواب…

 

بتجي هيّ… وبتنتعك جواب….

متل يعني…كيف بدّي قلّك….

“اعطيني شويّة وقت….

خلّيني فكّر شي كم يوم…..”

 

العما…..شو  “شي كم يوم؟”

ولي وما قاعد عأصابي أنا….

…قاعد وعم بتعنزق عليهن رح يتفتّقوا…..

 

و….بيجي اللّيل…..

 

وبدل ما تكون حضرة جنابها قاعدي وعن جدّ عم بتفكّر…..

بتروح هيّي….

وبتنام…

وعقلبها متل العسل…..

وبصفّي أنا….

سهران….مش لأنّو حابب إسهر…..

بسّ لأنّو قلقان….ناطر منها شي جواب….

 وعم فكّر….

بشو معقولي هييّ تكون عم بتفكّر…..

 

العما…

 

وبعد كم ليلة….

بتجي بتسألها….”شو صار معِك؟….”

بتقلّك…. بعدني عم فكّر…..

 

هيّي مفكرا حالها عم بتفكّر….

وأنا….برضوا…..

مش عم بعمل شي غير إنّو عم بفكّر…..

 

 

إحترماتنا…

%d bloggers like this: