Ihtirametna

عزلو يا جماعة

Posted in Writings by johnnyhage on April 3, 2016

قمت عزّلت البيت اليوم…

تعبت… لأنّو جديدة عليي هيدي….

 

لمن كنت عايش بلبنان….

هيك شغلات ما كنت فكّر فيها…

عزّل البيت…

 

هيّي لأنّو العقلية اللبنانية زفت من هالناحية…

منّاش معوّدتنا عهيك شغلات…

عالم اتّكالية اطلعنا… خصوصي الشباب والرجال…

عصغر… منتّكل عإمياتنا….

وعكبر لمن نطيلع مصاري شوية… منتّكل ععالم تانيي مندفعلها لتجي تعزّل جيّتنا…

 

إنتو عارفين إنّو لماّ الواحد يعزّل جيتو… بيصير يجوي أقل؟

مش بسّ بتصير تجوي أقل…بتصير تنضّف أكتر كمان…

وبتصير كلّ ما ينجوي البيت.. أو كل ما تطلع غبرة مثلاّ…

بتنفئس….

وبتصفي إنّو لأ… ما بيصير هيك…

 

باليابان… في حصّة بالمدرسة بينضفوا فيها الطلاب صفوفن وحمّماتن…

بتتخايلو شو يعني….

يعني هيدا اللي بيتعلم ينضف عصغر… رح بيصفي عم بنضف عكبر….

منو معوّد صار… مش رح يتعب متل حضرة جنابي…

ومش بس رح  ينضف مدرستو… رح بينضف بيتو …وحيّو…ومدينتو العايش فيها كمان…

 

رح بيصير إذا إجا وزير لعندو وقلّو بدنا نعمل مطمر بالمدينة…

رح ينفئس….ويصفي إنّو لأ… ما بيصير هيك…

رح بتصفي علاقتو مع الزبالة حميمة…

ورح يتعلّم يحترمها… ويفرزها… ويعيد تأهيلها ليرجع يستعملها…

 

ما هوّي إذا اتعودّ ينضّف عصغر… في ينضّف كلّ شي عكبر…

ما الزبالة بتجي من العالم هيّي…

جييّ زبالة… وعيشي زبالة… وقرارات زبالة.. وفي عالم زبالة كمان….

ولا لأ؟…

 

إحترماتنا…

إحترماتنا…من هونيك مدينة بكندا…

Advertisements

رسومات أللّه يرحمو

Posted in Writings by johnnyhage on December 7, 2012

 ليك …

عم فكّر إفتح شي غاليري…

غاليري رسومات….

يا خييّ…

حاسس إنّو الغاليري فيها ربح كتير….

العما كيف ما بعمري فكّرت فيهاأنا من قبل؟

شو بدّك كلّ العالم فلتاني عالرسمّ بهالإيّام….

رسومات على حيلها….

 

 

فيك تعرض مثلاً رسمّ الإيجار…

يا ما بيعرضو رسم الإيجار…

متخايل شكلو رسم الإيجار كيف بكون؟

 

رسم البيع….

هيدا أقوى من رسم الإيجار….

 

بعدان في عندك رسم دولة…

مش حبّة وحبتين…دولة هون عم تحكي…

راسم شي مرّة دولة؟

 

وفي عندك رسم مالي….

لا بيكاسّو ولا طلّ خبروا هون….

رسومات ماليّة هينة هيدي؟….

 

وفي عندك رسم إنتقال….

هون لمّن بينقل الواحد….

متل إيّام المدرسة يعني…

 

بعدان في عندك رسم مرور….

وفي عندك رسم وقوف كمان…

يين ويان هيدي…

 

 

وفي الرسوم متحرّكة…

هيدا بتجي بالجمع ومتحرّكة…

جيبها خلّيها تفلت بهالغاليري…

 

 

بعدان في رسم الإعارة…
مش الدعارة …الإعارة…

 

أه.. عفاك وفي رسم الدعارة كمان…

 

 

رسم بياني….

هيدي بياني وبينك….

مش فهمان شو يعني….

 

 

في عندك رسم رجل الدين…

ما بقولو رسموا كاهن مثلاً…؟

هيدا كمان منحطّو بالغاليري…

بعدان مش سامعين بحدا لابس رسمي؟…

بيترسّم يعني…. لابس رسمي…

إي ويني الرسمي…جابوها عالغاليري…

 

 

شايف شو في عندك رسومات….

وهودي اللّي لفتولي نظري….

في عندك عدد رسومات بيفلج….

 

يعني فيني جيب رسّام …

يرسمني  باللّحظة اللّي عم بنفلج فيها….

وفيني إرجع حطّ هيدي الرسمي…بالغاليري كمان…

 

وخدلك عرسومات….. أللّه يرحمو…

 

إحترماتنا….

عروسة جبنة

Posted in Writings by johnnyhage on November 7, 2011

قلّلو:            بدّي عروسة جبنة إذا بتريد….

جاوبو:        ع شو بدّك ياها….

قلّلو:         بديّ وحدي جبنة….ع عروس بدّي ياها….ملفوفة…

قلّلو:         فهمت فهمت…..بسّ عشو بدّك ياها….

جاوبو:      مش عشي…بدّي إحملها وإمشي…. باكلها هلّق دغري….

قلّلو:         عظيم…احملها وإمشي شو فرقاني معي أنا…..بسّ عشو بدّك ياها…..ع قشقوان….ع حلّوم…..ع مجدولة…ع عكّاوي…عكيري….عبيكون…..عشو بدّك ياها…..

جاوبو:      أه ه ه ه …هلّق فهمت عليك…..أوف ف ف ف…..عشو بدّي ياها؟……..شو بعرّفني….. شو قولك عشو بدّي ياها؟….

قللّو:        أنا شو بعرّفني…..إنت قللّي وأنا بلفّ….

جاوبو:      يلاّ إنت نقّي عنّي…عزوقك….

قلّلو:         لاه يااااااا خييّ….مش عزوقي….أنا بعملّ شو ما بدّك….عزوقك… ما تقلّلي قرّر عن حدا…..أنا كلّ ما يكون عندي خيار بين شغلتين بتللّت بضيه اللّه تبعولي…………بدّك ياني آخد قرار عنّك….. أنا قراراتي مش عارف كيف بآخدها… مرتي تركتني لأنّو ما عندي رأي قال….. عيفني خيّي عيفني دخيل عرضك….

جاوبو:      ليك ليك هالعلقة….ورك أنا جايي آخد عروس جبنة…ما كنتش ضارب حساب بدّي نقّي من عشر أصناف هلّق….بتعرف لو عارف هيك… ما كنتش جيت… ولا كنت طلبت جبنة ولا كنت عزّبت راسي….ما إلش جلادة حالي أنا اليوم….

قللّو:         طيّب شو هلّق…أيا جبنة بلفلّك…

جاوبو:      ما بعرف…بتعرف شو….بلا الجبنة….لفّلي زعتر….

قللّو:         أيوااا…..عظيم…. هيك أفضل شي….زعتر …زعتر…….أيا زعتر بلفلّك؟

جاوبو:      كيف؟

قللّو:         في زعتر بلدي…في زعتر حلبي…في زعتر جبلي….في زعتر كوري…من الكورة يعني….في زعتر العادي…ليك هودي الأنواع كلّن قدّامك….نقّي واختار….

جاوبو:      ليك ….ما تلفلّي شي…..لا زعتر ولا جبنة…أصلاً هيدا الحديث من أساسو مش عاجبني….. بخاترك…

قللّو:         أنا كمان الحديث مش عاجبني…لا عاجبني…ولا عزعتر…. أهلين…

إحترماتنا….

%d bloggers like this: