Ihtirametna

جريدة ومظاهرة

Posted in Writings by johnnyhage on March 4, 2011

امسكت حالي اتوجّهت وع العراق …. ع كردستان….

كردستان..هيدا إقلبم بالعراق…آمن…وبيسكنوها الأكراد…..

هيدا المحلّ هوّي الوحيد..يللّي لا في تفجير ولا حرب ولا فرقيع….

لكن قبل ما أوصل لهونيك….قدّمت ع “فيزا”….

عالعراق بدنا “فيزا”؟

صح….

أخدت ال”فيزا” 17 نهار لطلعت…..

يعني لو اتأخّرِت بعد شويّ زيادي….كانت طلعت ال “فيزا” وطلعِت روحي سوا….

أنا كنت مفكّر إنّو العراقييّ بالوضع الأمني اللّي هنّي فيه….

يعني…شو بدّي قلكن..

رح يكونوا مستقتلين ليستقبلوا زوّار وسوّاح….

طلع إنّو لاه….

طلع إنّو مع كلّ الحرب والتعتير….

بعدن بيضربوا ألف حساب للبناني…

ف….اكرهت حالي…

ووطي باسبوري من عيني…..

 

لمنّ وصلْت عكردستان….

اكتشفت إنّو أهل البل….

العما بقلبن شو مناح..ومضيافين…

…فظيعين…..

يعني بخجّلوا اللّي ما بعمروا بيخجل قد منّن مناح…..

ف..كانوا الجماعة نازلين فينا عزايم ليوم العزايم….

كانو عم يعلفونا عالترويقة..وعالغدا… وعالعشا…بشكل مستمرّ….

واللحمة…تنطح الفوارغ…تنطح الدولما…..تنطح الدجاج….تنطح إالخ إالخ إالخ….  واسترجي ما تاكل….

ف….انفزرت….وطلعت روحي….

 

هونيك اكتشفت إنّو عندن مسلم…وعندن مسيحي….

وعندن أديان تاني ما حفظت شو هيّيّ…

واكتشفت إنّو بيهتمّوا ببعضهن بشكل مرعب….

وبيهتمّوا ببلدن بشكل فظيع…

..وأخر همّن شو هوّي دينو هيدا الكردي….طالما هوّي كردي….

هون…اكرهت بلدي…..ووطي بلدي من عيني….

 

ارجعت امسكت حالي ورحت ع “كندا”….

تاني أكبر بلد بالعالم…..

قبل ما روح…. زرت السفارة الكنديّة تلات مرّات…..

وفتّ بدهاليز تفتيش ونطرة ونطرة ونطرة…

وقدّمتلن موسوعة مستندات بتبلّش وما بتعود تخلص…

مستندات عنّي… وعن عيلتي … وعن سليلتي….. ومصريّاتي…. وعلماتي….. ومشاريعي…. ومستوى ذكائي…. ونمرة تيليفوني…. ونمرة إجري…. وكم مرّة بفوت عالحمّام بالنهار…..

 هيدا كلّو كرمال سافر 10 إيّام….

وللصراحة… فكّرت لوهلي إنّو إنشر هودي المستندات…كموسوعة مطبوعة عند شي دار نشر….لأنّو أخدوني شهر تحضير…وفيها بسهولي تطلع أطروحة دكتورة ل شرح تقنيّة السفر من لبنان  لكندا….

اخدت الفيزا لتطلع 16 نهار…وعرفت إنّي فيني سافر قبل 10 من موعد السفرة…

هون رجع وطي باسبوري من عيني أكتر شوّي,,, لدرجة صفّيت إنّو مش قاريه….

 

بكندا…..

شفت….كنديّي….

وشقت هنود فكرين حالن كنديّي…بهزّوا راسن هنّي…وبيرفّعوا صوتن هنّي وعم يحكوا….وبيحكوا إنكليزي ع هندي مكسّر…

بسّ كنديّي…..

كمان شفت صينيّي مفكرين حالن كندييّ…وعفكرة هودي أكتريّة….

وشفت يابانييّ فكرين حالن كنديّي… وعرب….وأفريقان….وأوروبييّ….

كلّن ….كلّن مفكرين حالن كندييّ….

وهنّي كنديّ…بسّ صارو كنديّي….

العما….

هودي مش دين واحد….هودي أديان ع حيلها…..

وهودي مش لون واحد….هودي ألوان ع حيلها….

وهودي مش لغّة وحدي….هودي لغّات ع حيلها….

وهودي مش عم بقبروا بعضن…

 هودي عايشين مع بعضن….متل السمنة عالعسل…. عايشين…ومبسوطين…وشاكرين ربّن….

كلّ واحد عطريقتوا…

وأربابن الهيئة متّفقين مع بعض….

هون…اكرهت بلدي أكتر…..ووطي بلدي من عيني اكتر….

وصفّيت…. عم شوف حالي أكتر بكندا….

و…. مش حالي طبيعيّة هيدي….

 

أنا وبكندا…..

شفت المصاروي…..عم “بسقطوا” نظام حسني مبارك…..

شقفت المصاروي وقلت نيّالن….

 

أنا وبكندا….

شفت البحرينيّي….واليمنيّي…..واللّيبييّ….والأردنيّي….

عم يتظاهروا ليسقطوا زعمائن وأنظامتن….

وشفتن….وقلت..يلاّ… عقبالن….

 

و…وأنا وراجع عالبنان…..

شفت دعوة من الشباب اللّبناني “لإسقاط النظام الطائفي”

اتحمّست….وفلت بدّي إنزل….

لكن لمّا وصلت عبلدي…. انعجئت وانشغلت بمشقّات الحياة…..

والعما بقلبي….انسيت إنّو هيدي المسيرة لازم أعطيها أولويّة….

لكن اعرفت بعدان إنّو 4000 شخص نزلوا تحت الطوفان….

وعبّروا عن رأين…

وقلت بيني وبين حالي…إنّو المسيرة التانية…أكيد رح إنزل….

 

يعطيهن العافية هودي الشباب…

وأنا يا تقبروني….

 مقتنع….

إنّو إذا ما أسقطنا النظام الطائفي عنّا….

رح منرجع منقبّر بعضنا….

ورح إكره بلدي…وباسبوري…وشعبي…وطائفتي بالمستقبل….

 

ف…اتفضّلوا انزلوا معنا ب 6 آذار…..

لأنّو ب 6 آذار…في دعوة ومسيرة جديدة…

الساعة تلاتة بعد الضهر…من الدورة لشركة الكهربا….

وياريت…..مننضم كلنا لهال 4000 شخص….

لأنّو هنّي الوحيدين بهالبد يُحترموا….

 

وأنا بتحدّاكن…..

إنّو تشاركوا هالرسالة مع أصحابكن وأهلكن….

وتعزموهن لتنزلوا معنا….لأنّو إذا ما نزلتوا….

رح ننزل كلنا، مع هالبلد انشاللّه… بخندق غميق…وعميق…

وقريباً رح بزتولّنا أسلحة… ورح يعلمونا نستعملهن ع بعض.. مع بعض…..

 

 

إحترماتنا….

Advertisements

حكم ديكتاتوري محط

Posted in Writings by johnnyhage on October 30, 2010

أنا اطلعت بحلّ جذري وقاطع للدولة اللّبنانيّة……

أنا هلّق اعرفت شو لازم نعمل لنصير بلد محترم وبيسوى…..

أنا القيت الجواب للحزّورة اللّي كل السياسيّين اللّبنانيين عم دوروا عليها….

أنا رح قلكن شو لازم نعمل….

 

نحنا لازم نطلب من شي دولة تانية…..

مسالمة…..محترمة حالها…..

وما حدا من اللّبنانيّ عندن مشكلة معها….

متل كندا مثلاً…أو سويسرا يمكن…..ما بعرف….

مش مشكلة…منلاقي دولة….

 ومنطلب منها تجي تحكمنا……حكم ديكتاتوري محط…..

 

ديكتاتوري محط….

واللّي بيعلّي راسوا يقطشولوا ياه…..

 

إيه… خلّيهن يجوا يعلّمونا عن جديد….. ويعملولنا “ترايننغ”……

كيف الإنسان ممكن إنّو بطريقة حضاريّة يدير بلد…..

لأنّو…نحنا عنّا مشكلة: بالإنسان، وبالطريقة الحضاريّة، وبالإدارة، وبالبلد.

 

خلّيهن يجوا…,ويفظّعوا فينا لنصير نفهم نحكي مع بعض…

ونتعاطى بالسياسي…خلّيهن يربّونا عإيديهن….

وخلّهن لمّا انصير اكبار

يعلمونا نمشي لوحدنا…..

ولمّا انصير نعرف نمشي لوحدنا…..

ساعتها فيهن يتركونا….

وأفضل  إنّو ما يتركونا فرد مرّة….أحسن عمراحل بكون….

بسّ ليتأكّدوا إنّو ما رح نرجع انخبّص…..

أفضل إنّو يخلّو عينن علينا…..

 

لإنّو غير هيك…. هيدا البلد…مش رح بصير بلد….

ولو بدّوا يصير…. كان صار….

 

إحترماتنا….

%d bloggers like this: