Ihtirametna

بوظة ع مغلي

Posted in Writings by johnnyhage on December 24, 2010

 

مبارح كان آخر نهار شغل ….قبل الأعياد….

ف…اجتمعنا بالمكتب أنا وزملائي…..

لنتغدّا ونعيّد سوا….

 

تغدّينا…..ومن بعد الغدا….

وحدي من زميلاتنا….منّاش لبنانية…

يابانيّة هيي…. من اليابان يعني….

 جاية وجايبي معها بوظة…..للتحلاية…

 

صرلها هيّي أكتر من عشر سنين عايشة بلبنان….

ولبنانيّتها بعدها عقدّها….

بودّها تتعلم لبناني…

لكن اللّبنانييّ مننش عم يسعفوها….

لأنّو لمّن يشوفو شكلها ياباني….

بيجو حكو معها بالإنكليزي….مش باللّبناني….

فطلعت البنت فحلة بالإنكليزي…

لكن هيّ بينها وبين حالها….

بعدها عم بتحاول تركّ عحالها لتتعلّم لبناني…

 

 

هلّق جايي هيّي ومبسوطة….

وجايبة معها عالمكتب جاط…

في بوظة….

في بوظة ع مغلي…..

بوظة ع مغلي؟

أنا صرلي أكتر من 28 سنة لبناني….

وما معيش خبر إنّو في شي إسمو بوظة عمغلي…..

 

 فسألتها أنا…قلتلها بتعرفي شو يعني مغلي؟….

قالتلي هيّي بالإنغليزي..أكيد…..

“أي لوف مغلي….إت إذ لايك كنافة أند بوظة

I love Meghli, it is like knefeh and bouza”…

قلتلها: “أنا بعرق شو هوّي المغلي….

بسّ إنتِ بتعرفي شو يعني “مغلي” باللّبناني؟”

قالتي: “لأ..”

قلتلها: “إي… بعرف…

مغلي يعني boiling….

وبوظة…يعني متلّج…..freezing يعني

وبوظة ع مغلي….يعني إنتِ هلّق عم تاكلي……

Freezing  ع  Boiling…..

عرفتي كيف؟….”

 

اتطلّعت فيّي هييّ وسطّلت….

وضلّت مسطلة شي دقيقتين…تلاتي…

عم بتجرّب تفهم شو قلتلّها….

 

رجعت دغري قلتلّها:

“ليكي…

طالما نحنا عايشين بمجتمع إستهلاكي…

طالما في عالم رح بتضلها عم بتحكّ راسها….

لتفبرك اختراعات جديدة….بتسطّل….

لتجي العالم اللّي متلي واللّي متلِك…

تسطّل وتشتريها….

متل ما صار فيكي هلّق….

 

ف…ينعاد عليكي…وعليكن جميعاً…..

وخلّينا نشوف سنة الجايي متل اليوم…..

ع شو رح منسطّل…..

 

إحترماتنا…..

 

Advertisements

من مين مستقلّين؟

Posted in Writings by johnnyhage on November 21, 2010

بكرا عيد اللإستقلال…..

 

دخلكن نحنا مستقلّين؟….من مين مستقلّين؟

هيئتنا مستقلّين عن البلد نحنا…كلّ واحد فاتح عحسابو واللّه…..

 

 

هلّق بدكن تقلولي إنّو بعيد الإستقلال….

كلّ العالم عارفي إنّو هيدا ضحك عالدقون….

والسياسيّي وحدن..ما معن خبرشي؟؟

 

أكيد لأ….

 

ليكو السياسيّي وضعن حرج يا خيّي….

 

 تخايلو…إنّو يجو يقولولنا….

السنة مش رح منعيّد الإستقلال…

لأنّو نحنا منّاش مستقلّين مظبوط….

لأنّو ما حدنش منّا قادر ياخد قرار من دون ما نرجع ل…

أميركا…وسوريّا….وفرنسا….والسعوديّة……وإيران….

(ومش رح عدّ بقيّة البلدان ..لأنّو في كتير…..)

إي اتخايلوا يجوا يقولولنا هيك….

لاه…ما عيب….مش منيحة بحقّن هيدي….جرصة يعني……

 

 

طيبّ…..من تاني ميل…….

وهيدي الحالة اللّي نحنا واقعين فيها بردو….

 

اتخايلو … إنّو يجوا يعيّدو الإستقلال…..

وهنّي…من دون ما يقولولنا….نحنا عارفين….

إنّو ما فيهن ياخدوا ولا قرار…من دون

أميركا…وسوريّا….وفرنسا….والسعوديّة……وإيران….

 

هيدي كمان لاه…عيب…وكمان مش منيحة بحقّن…وكمان جرصة يعني….

 

طيبّ هات لشوف حلّهّا بقا……

 

أنا بقلكن كيف منحلّها……

شو هنّي وحدن بيطلعوا بمبادرات حلّ….

 

أنا…بشوف…..

وألله يسترني من كلمة أنا….

إنّو ما بقش نعيّد عيد الإستقلال بهيك وضع….

لأنّو أفيش إستقلال…..

لكن…وبما إنّو……

الشعب معوّد إنّو يعيّد ب 22 تشرين التاني….

وبما إنّو…

عيد ميلاد الرئيس الجمهوريّة الحالي ميشال سليمان….

مسائب ب 21 تشرين التاني……

خلّينا نعيّد عيد رئيس الجمهوريّة……

مش عيد الإستقلال…

عيد رئيس الجمهوريّة….

 

وبالمستقبل…..لمّن تخلص ولاية أو ولايات الرئيس الحالي….

….بينتقل  العيد لنهار تاني….حسب عيد الرئيس الجديد….

 

هيك…منكون….حلّينا عيد الإستقلال…..

 

وهيك بكون بقيو الإعياد السنويّة الرسميّة على عددهن….

وما حدا من الشعب الكسلان بيزعل……

 

وهيك السياسيّي…..ببطلوا عتلانين هم كيف رح….

بيتضّحكوا عحالن…وعبعض…وعالشعب….كلّ 22 تشرين التاني…

 

 

شفتوا كيف؟….

 

ف…مبروك يا جماعة….

وينعاد عليك فخامة الرئيس…..

 

 

وإحترماتنا….

فهموا علينا غلط الجماعة

Posted in Writings by johnnyhage on November 2, 2010

 

من أسبوع كتبنا…كيف إنّو لبنان….

رح بصير أكتر بلد نازل بغينيس بوك….

 

وشي إنّو كتبناها هيدي المقالة…

وبعتنالكن ياها…

بيوصلّي خبر سريع….جدّاً سريع…..

إنّو رح بصير في مهرجان للنبيد…

أكيد عنّا بلبنان…لنعمل أكبر كاس نبيذ بالعالم…

ونفوت…. كمان مرّة… عن جديد…بكلّ فخر….

بالغنيس بوك….

 

أهلين….

 

ما بعرف…يمكن فهموني غلط الجماعة…

ويمكن فكّروني إنّي مبسوط بالموضوع وعم شجّع عليه….

فقطّ للتوضيح…

لأ…..

أنا مش مبسوط…..ومستحي عفكرة….من هالفكرة…..

 

كمان وصلّي…إنّو جماعة الغينيس بوك….

عم يبحثوا بشكل رسمي…

إنّو ينقلوا مكاتبن ع لبنان….وينشروا الكتاب من عنّا من هون…..

لأنّو مقضّايين وقتهن….عم بخيّلوا….. راحيين جايين الجماعة…

وصايرا الشغلة….كيف بدّي قلكن ….مش عم بتوفّي معن يعني…..

 

الحاصلوا…..

 

رحنا …شفنا أكبر كاس نبيد…..بسبق الخيل كانوا عاملينوا…..

وشتّت الدنيي علينا…… وطبّسنا بالوحلات كمان…….

 

منيح إنّو ليلتها عقّينا بهالنبيد…لسطّلنا….

وشربنا كاس صبيّة….

صوتها حلو…. مشّ بسّ حلو…بزهزه….

كانت عم بتغنيّ…..

واللّي هوّي بيناتنا…إذا في شي بيستاهل ينزل بغينيس بوك…..

هوّي هيدا الكاس تحديداً…

 

 

إحترماتنا….

%d bloggers like this: