Ihtirametna

المخطط الأرتوذوكسي

Posted in Writings by johnnyhage on January 21, 2013

عمّ بتشمّوا العفن؟….

العما شو هيدا….

الهيئة الجماعة اتفقوا على قانون إنتخاب طالعة ريحتو…

قال بما إّنو أنا مسيحي….

ممنوع صوّت لحدا إلاّ إذا كان مسيحي….

عأساس إنّو أنا السياسي المسيحي بمثّلني….

والمش مسيحي بمثّل غيري….

السياسي اللّبناني، شيل دينو عجنب، ما بمثّلني… ما بمثّل حدا….

السياسي اللّبناني، شيل دينو عجنب، بمثّل علينا كلنا يا بابا…

هلّق الخبريّة المهمّة….

إنّو الزعما انقبروا… واتّفقوا…

على إنّو لبنان رح بصير رسميّاً بلد طائفي….

مبروك…

يعني إذا كان في أمل إنّو نطلع من الطائفيّة…

معدش فيه…

هلّق صار وقت نغطس بالطائفيّة…

هيك هيك طلوع مش عم نقدر نطلع منّا…

انزلوا فيها انزول… اغطسوا… شكّوا…

بكرا بعد الإنتخابات الجاية…

حضروا حلكن لنبلّش نبني لبنان عن بو جديد…

حضروا حالكن… بكرا لأنّو …

المروانة رح بصفّوا ممنوع يسجّلوا بقا إلاّ بجامعات تابعة للبطريركيّة…

الدروز مش مقبول إنّو يشتروا حليب وكورنفلس إلاّ من عند الدروز بقا…

الشيعة مش مقبول يشتروا كحول إلاّ من عند الشيعة… شوفو شو بدكن تعملوا…

والسنّة مش مسموح يشجعوا إلاّ الريّاضي بقا…

السياسيّي اللّي بيحكوا عالتلفزيون….ممنوع يحكوا مع حدن من برّات دينن…

أنا مابعدش فيني إسمع لناصر قنديل أو وئام وهّاب أو الشيخ الأسير أو عقاب صقر لأنّو مننّش مننّا….

يمكن هيدا الشي الوحيد الإيجابي بالموضوع…

هيك كلنا منرتاح من إنّو نسمع  ل% 90 من السياسيّي المعفنين اللّي من برات الطايفة….

ومنضلنا مبلوفين بال 10% من السياسيّي المعفنين اللّي من جوّات الطايفة…

بسّ بتعرفوا شو؟…

انقطرنا فيها هيدي….

إذا صار ممنوع نسمع لحدا إلاّ إذا كان من طايفتك…

شو يعني فيروز ما بيعود يسمعها حدا غير الأرتوذوكس؟

أه ه ه ه … ما مفهومة… هيدا مخطّط أرتوذوكسي شكلو… ليحتكروا فيروز لئلن…

منشان هيك سمّوه القانون الأرتوذوكسي…

وأنا.. بما إنّي ماروني مسجّل بدايرة النفوس….

ممنوع بقا تعملولي لايك عالفايسبوك إلأّ إذا كنتو موارنة مسجّلين بدايرة النفوس…

كلّ حدن علماني LAIQUE بهالبلد…

اشطبوه … إلعنو عرضو…

لأنّو بهيك قانون يا تقبروني…

ما بقاش فيه حدن رح بمثلو…

تحيا الطائفيّة…

عشتم وعاش لبنان…

بلدّ…

طائفي…

مقسّم…

محروق دينو…

إحترماتنا…

Advertisements

إنتخابات الجامعة الأميركيّة…متوّتة

Posted in Writings by johnnyhage on November 25, 2010

 

بتذكّر لمّا كنت طالب بالجامعة الأميركيّة بال 2002….

كنت طالب علم متلي متل غيري…..وطالب تغيير كمان….

كنّا بليلة الإنتخابات… نتسكّع شي 2000، 3000 طالب….

ناطرين النتايج…اللي كانوا عادةً يطلعوا ب نصّ اللّيل…..

 

 

مبارح….طلعوا النتايج الساعة 9:30 المسا…

وكان في شي 200 راس… بسّ…. ناطرينن….

العما ويننّي…..؟

مع إنّو أنا بعرف…

إنّو عدد طلاّب الجامعة عم بزيد….مش عم بقلّ….

العما ويننّي….؟

واللّي بعرفوا كمان…إنّو إنتخابات الجامعة…..

هيدي إنتخابات أحزاب… مش إنتخابات طلاّب عادةً بتكون….

والأحزاب…بتتبّع سيستام الكاموفلاج…..

على أساس إنّو ما حدا داري بوضعها….عرفتو كيف…

إي…العما ويننّي؟…..

 

جينا دوّرنا وفتّشنا……

القينا إنّو فيلو شي 2000، 3000 راس….

حاطّين راسن براس هالكومبيوترات…واللابتوبّات….والتيليفونات…..

وعم بتابعوا النتايج بشغف…..عبر التتويت…..

عفواً…يللّي ما بيعرف شو هوّي التتويت….

(بعد في حدا ما بيعرف شو هوّي التتويت؟)…..

التتويت… يا تقبروني جايي من تويتر……

فكانوا الجماعة متسكعين…عضوّ ال سكرين (screen) ونازلين….

تكبيس بالتويتر والفايسبوك……

 

ويعني متل ما بتوقّع أنا…..

بكرا…. مع الوقت….

بصيروا يصوتوا وينتخبوا…

ويكتشفوا النتايج ويتظاهرو…

ويهَيصوا هالطلاّب….

من البيت…

ويدرسو من البيت..

وينجحوا من البيت……

زبيصيروا يجوا عالجامعة…بسّ ليخادو الشهادة مش أكتر…

ولاّ قلكن…فيهن يبعتولن ياها بالإي مايل…

وهنّي بيطبعوها كمان بالبيت….

 

وبالآخر….بتصفّي الجامعة…..

محميّة طبيعيّة….

عم بتصوفر………..فيها العصافير……

تويت تويت…تويت تويت……

 

إحترماتنا………

%d bloggers like this: