Ihtirametna

بسّ اتخايلو

Posted in Writings by johnnyhage on February 15, 2012

اتخايلو إنّو اللّه…بحدّ ذاتو….

نزل…ومحي فكرة المسيحيي والإسلام من رووس العالم…

اتخايلو إنّو اللّه….

نزل…ومحي فكرة الأديان كلّها…

اتخايلو إنّو اللّه…بحدّ ذاتو….

نزل…ومحي من رووس العالم….

فكرة إنّو في أللّه من الأساس….

اتخيلوا إنّو اللّه ….بحدّ ذاتو….

نزل…وزرع بروس الخليقة كلّها…

إنّو الإنسان ما في عندو غير الإنسان….

ما في عندو غير الإنسان

يتكبّش في….ويتعمشق في…ويتّكل عليه….

وكلّ فكرة الإديان….والدينونة…والمحاسبة….الألوهيّة….وجهنّم…

بطّلت…

أولكن… بهيدي الحالة….

بيصيروا البشر يهتمّوا ببعض ويحبّوا بعضن أكتر؟

اتخيلوا إنّو اللّه ….بحدّ ذاتو….

نزل وعمل كلّ عالإشيا….

لأنّو… لو في اللّه….

و…من بعد ما يشوف …من عندو من فوق….

شو إنّو العالم عم ينقبروا يعملو بالعالم….

كان…هلّق….بيترك كلّ شي….

وبينزل…. يعمل هيدا الشي….

وليكون في أمل إنّو هيدا الشي يصير…

لازم أللّه بحدّ ذاتو….

ينزل….ليصيّرو….

أللّه كبير…

إحترماتنا…

Advertisements

تقبرني ما أهضمك

Posted in Writings by johnnyhage on January 26, 2012

نحنا اللّبنانيّي…..

أيّ…إنّو نحنا يللّي عايشين بلبنان….

أو… إنّو يللّي معنا جنسيّي لبنانيّة….

مهضومين….

 

يمكن جنسيّتنا أو جنسنا…

فيهن كم جينة هضمنة…زايدة…

ما بتلاقيها بجنسيّات وأجناس تاني….

 

هودي الجينات المهضومة….

 عم بوَلدو أو عم بفَرزو خصلات مهضومة…

كيف يعني؟…

يعني وحدي من الخصلات …كيف بدّي قلّك…

لمّا تجي توقّع ركهوة القهوة…عحدا…

عحضنو مثلاً…

ركوة بإمّها وأبوها….

وتطرطشلوا تيابو أو تيابها…

وتحرقلن شو في تحت الجينس أوالتنّورة….

وتنزعلن نهارن….

وتطعميهن نقزة يمكن من وراها يصير معهن سكّري مثلاً…

وترجع من بعدها…. بكّل بساطة وبكلّ براءة…

تخبّرهن..وتطمّنن إنّو بسيطة “ما صار شي”…وإنّو “هينة”….

 

هيدا كلّو “مهضوم” لأنك…

طيب ما عبّرن للجماعة….

خلّيها تطلع مننّ إنّو “ما صار شي”… مش منّك…

طيب بركي… صار شي….

بركي آخر مرّة وقعت فيها الركوة عحدا… ما صار شي….

لكن هيدي المرة صار شي عويص مثلاً….

ما هيّي الركوة مش كلّ مرّة بتوقع نفس الشي…

“مهضومين”….

وبكلّ حرفيّة بتروح بتلمّ ورقتين كلايناكس ويتجي بدّك تمسّح القهوة عن تيابن…

وبتضّحكلن…وبتفتح موضوع تاني وبتمشي….

مهضوم لأنّك….

 

 

وخود بقا لمّا يجي الحلّاق ويكون عم يحلق للمدام…

وبدل ما يحلقلها…يقوم… و”يحرقلها”….جبينها…

أو يحرقلها شي خصلة من خصلات شعراتها مثلاً…

وبدل ما يقلّها “عفواً مدام ما تواخزيني سوري”….

بيجي بطمّنها إنّو “معليش ما صار شي”….

يحرق دين هالخصلي طيّب….

ولا كيف ما صار شي؟…صار شي….

حرقت دين الخصلة اللّي عندها ياها….

 

مهضومين…

مهضومين لأنّو مناخدن العالم كأشكال وكأحجام وكأعداد وكأرباح….

أكتر من ما مناخدهن كبشر وأفكار وأحاسيس وإحترام….

إلاّ إذا كانو بيقربونا…..

لمّا يصيرو العالم بيقربونا….بيتغيّر الموضوع…

لمّا تصفّي إنت بتقربني….بتصفّي كمان تقبرني….

تقبرني أحاسيسك…وتقبرني أفكارك…وتقبرني ما تزعل…

وتقبرني ما تنوجع….وتقبرني ما أهضمك…

ولمّن يصيروا يقربونا كتير…بيصيروا يقبرونا كتير….

 

 

إحترماتنا…

طالما إنهّا صرماية

Posted in Writings by johnnyhage on January 19, 2012

 فاقو الجماعة…

 

وزير الإعلام…أعلم كلّ النوّاب والوزراء شو اللّي صار…

 

وزير الداخليّة نزل شرحلنا كيف إنّو كلّ أجهزة القوى الأمنيّة كانت عم بتنسّق مع بعضها بفعاليّة لتساعد المتضررين وتنتشل الضحايا… – برافو عالتنسيق

 

رئيس مجلس الوزراء أمر بفتح تحقيق تيعرف شو صار عالمظبوط…- والتحقيق هلّق مفتوح …ورح يبقى

 

رئيس الجمهوريّة تأسف.. ودعا إعادة النظر بآلية الإنقاذ لمّا بصير كوارث. وطلب من وزير الاشغال العامة والنقل تكليف جميع البلديات إنّو يعملو مسح على كل الابنية… – وبسرعة

 

بسرعة وزير الأشغال والنقل، نقل الرسالة للبلديّات وطلب منّن إجراء مسح على كل الابنية

 

وزير العدل وعد إنّو بدّو حاسب المسؤول عن الحادثة..- وعد الزلمي

 

وزير الصحة خبّر المستشفيات كلاّ … إنّو لازم يستقبلوا الجرحى على نفقة وزارة الصحة العامة…- عيب ما بيصير

 

مجلس الوزراء كلّف الهيئة العليا للاغاثة إنّو لازم تساعد عيل الضحايا، وتشكل لجنة لإجراء التحقيق….وبسرعة

 

بسرعة لجنة الأشغال العامة اجتمعت إستثنائيّاً وخبّرتنا..وأتحفتنا إنّو في 20 ألف بناية بلبنان ممكن تقشط هلّق…هلّق هلّق….وجسر…

 

بظرف 12 ساعة…فاقو….ونطّو…وساقو…وحكيو….

هلّق …هنّي بصدد إنّو يحضروا حالن ليرجعوا يفوتو ينامو….

ينامو عبلد….كلّوا مشاكل هنّي مسؤوولين عنّو…..

ورح بضلّن نايمين ليرجع يجي شي تاني يفيّقن…

ويرجعوا عن جديد يفيقو…وينطّو..ويسوقو…ويحكو…

ويرجعو عن جديد ينامو…

 

27 قتيل.. اللّه يرحمن…

11 جريح… حمداللّه عسلامتن…

128 نايب لازملن غيار كلّن….من أوّلن لآخرن…نقطة….

30 وزير لازم يصير فيهن متل النوّاب….نقطة

 

بمختصر…

هيدا بلد …. ما منستاهلو….

تنصير نستاهلو…

لازم نحنا الشعب….نكبّ كلّ الطقم السياسي…

اللّي بهيدي الحكومة واللّي قبلها واللّي قبلها واللّي قبلها….

ونجبلو وجوه جديدة تجي تحكمو…..نقطة….

 

ليطلع منّا هيك شي….

في حلّين….

يأمّا الشعب يثور ويوعى عوضعو…

يأمّا لازملنا شي ديكتاتور ..عارف حالو شو عم يعمل…

يجي ويحكمنا بالصرماية….

 

وبالنسبة لنوع الصرماية….مش مهمّ…

طالما إنها صرماية…

لكن كلّ ما كان قياس الصرماية أكبر…

كلّ ما كان أفضل….وأسرع…

 

إحترماتنا….

%d bloggers like this: