Ihtirametna

هديونا ياه…هديّة

Posted in Writings by johnnyhage on January 23, 2011

خلصنا بقا…… ولك خلصنا بقا…..

لمّا راحوا مضيو إتّفاق الطائف…..

قبض كلّ واحد منّن مبلغ…

بيتراوح بين مليونين و8 ملايين دولار…

 ليوقفوا يتقاتلوا….ويتقاسموا البلد….

ودخيل عرضكن ما حدا يجي ينطّ…

ويقول فلان وفليتنان ما مشيو بالطائف….

لأنّو اللّي ما مشي بالطائف….رجع مشي بالدوحة…..

شو مشي؟…ركض……

وبالدوحة……

لا مليونين ولا تماني…..أكتر بكتير كتير كتير…..

وصارو الجماعة عم يدّشّوا ملايين…..

 

هلّق…..

هيئتن…..هضّموا….وحابّين يرجعوا يعبّوا….

لكن السعوديّة…فهمت اللّعبة….على ما يبدو…..

وقطر…فهمت اللّعبة عالّسريع…..

لأنّو الدوخة اللّي أكلتها بالدوحة….

ما صرلها زمان…..

 

الشعب اللبناني….

كمان فهم اللّعبة…..

بسّ…..حامل حالو غشيم…

ومش فهمان شي من شي…..

 

المشكلة بسيطة….

كلّ البلدان عم بديروا بلدنا…

لأنّو نحنا ما منعرف نديروا…

ببساطة…. لأنّو ما بعمرو كان بلدنا….

 

إستقلالنا…نحنا ما أخدنا…

ولا حاربنا كرمالو…

إجوا هنّي….وهديونا ياه…

هديّة….

هديونا ياه هدّية…عالعيد…

كرمال ساعة اللّي بدن…وبكلّ عيد…

يجو ويلعبوا فيه….

(بلا معنى أكيد)

متل ما يعملوا هلّق….

 

ع فكرا…

ما رح بصير البلد ل “اللّبنانيّي”….

إلأّ إذا أخدنا إستقلالنا بإيدنا…..

 

منستقّل….
من البلدان اللّي براّ…

ومنستقلّ….

من فساد الوزرا والنوّاب اللي الجوّا… كلّن….

 

بقولولي بدّك تاخد موقف….

بدّك تكون مع حدا….

إي لأ….اسمحولي…

ما بدّيش كون مع حدا…

بدّي إنّو ينزل الشعب عالأرض ويقشّن تنيناتن…

 

بس إذا الشعب اللّبناني ما انقبر وانهزّ…..

مش رح نستقل….

إذا ما نزل عالشارع….

وعمل ثورة ضد المعارضة والموالات….سوا…

لأنّو كلنّ كذّابين…وسرّاقين…وعندن “أجندات” خارجيّة….

مش رح نستقل…

 

رح يرجعوا…

من برّا…ومن جوّا….

يلفّولنا ياه هدية…..

ويهدونا الإستقلال….

…عن جديد….

 

من عيد….لعيد…..

 

 

إحترماتنا…

 

Advertisements

إلخ…إلخ….إلخ

Posted in Writings by johnnyhage on November 7, 2010

ب فرنسا…..

قوّموا الدنية.. وقعّدوها….

ونزلو شباب وصبايا ورجال ونسوان عالطرقات….

لأنّو رئيسن…قرّر إنّو يعدّل سنّ التقاعد…

ويرفعو من 60 لل 62….

سنتين يعني…

ف…نزلوا هالعالم…..وسكرّوا محطّات البنزين….

وشلّو البلد….

هيدي وين….ب فرنسا….

 

 

ب فرنسا…عال 62 بيتقاعدوا….

وبيطلعلن معاش رسمي من الدولة…

هيدي وين….ب فرنسا

 

عنّا هون…..

سنّ التقاعد “مسوّس”……

والمواطن …ما بيطلعلوا شي لمّا بيتقاعد…

إلاّ خازوق كبير….

 

هيدا الخازوق….موجود من هلّق….

والمواطن صار معوّض عليّه…

وكلّ فترة بيكبر شويّ….

المواطن بيكبر شويّ…والخازوق بيكبر شويّ….

بسّ تعوّدنا عليّي…

 لدرجة إنّو… ما عدنش نشوفوا…خازوق….

صار…..عادة عنّا…

 

ب فرنسا..بيدفعوا ضرايب….

وبيطلعلن تقاعد….

 

عنّا هون….عنا ضريبة الدخل…

وفي عنّا الضريبة المضافة كمان….

دخلكن…ليش  بعدنا عم ندفع ضريبة دخل؟

والضريبة المضافة…

هيدي عشو مضافة…؟

هيدي مضافة عالخازوق اللّي بيطلعلنا ياه….

 

 

ب فرنسا…عندن العلم ببلاش….

عنّا هون…..ببلاش…..ما بتتعلّم….

 

ب فرنسا…عندن الإستشفى ببلاش….

عنّا هون…..ببلاش….ما بتتحكّم…

ببلاش…بتموت من الوجع….

عن جدّ بتموت….

 

هنّي عندن…إذا رفعولن سنّ التقاعد….

بينزلوا عالشارع….

وبيوقفوا بوجّ رئيسن…يللّي انتخبوا مش من زمان…

وب شلّوا البلد….

 

عنّا هون….ما مننزل عالشارع…

لقصص تافهة….

خيّي…ما عنّا مشكلة إنّو…

 نعبّي ميّ من السيترنات…لمّا تنقطع الميّ….

ولا عنّا مشكلة إنّو نشترك موتور لمّا تنقطع الكهربا…

ما عنّا مشكلة…

والشارع بهالحالة مش لئلنا…

 

نحنا بسّ مننزل عالشارع…لمّا…

زعيمنا…

اللّي نازع البلد…..ب يقلنا انزلوا عالشارع…..

نحنا…جماعة شاطرين ومنسمع الكلمة….

نحنا منعرف إنّو الزعما ما بيسووا….

ومنعرف إنّوعم بياخدونا يبجيبونا…..

ويرعونا متل ما بدّن…

منعرف…

بسّ عقلنا كبير….

وما منقبل أبداً نتخلّى عننّ…

بالعكس…منترجّاهن إنّو…

يضلّن فوق راسنا…ويرعونا….

ولمّا بدن يانا ننزل عالشارع….

نحنا حاضرين..وبأمرن…

 

 

ب فرنسا….

هنّي عايشين بعالم ….

ونحنا عايشين بعالم…..

نحنا هون…عايشين بعالم تاني…وتالت…ورابع….

وخامس …وسادس….وسابع…..إلخ…إلخ….إلخ….إلخ…إلخ….

 

 

إحترماتنا….

%d bloggers like this: