Ihtirametna

عكروت

Posted in Writings by johnnyhage on September 1, 2011

هات لخبّركن شو صار من كم شهر بالسويد…..

 

بالسويد…. كان في حاكمة مدينة ستوكهولم….

قامت عبِّت بنزين لسيّارتها….

ودفعت من كرديت كارد….تبع الحكومة…..

 

قامت الدنيي وقعدت بالسويد…..

وتحرّكت الجمعيّات والمنظّمات المهتمّة بالفساد….

ونزلوا مظاهرات عالطرقات…

 

لأنّو حاكمة ستوكهولم صرفت كم دولار من مصريّات الدولة….

 

لمّا أخدوها عالمحكمة….

…إي أخدوها عالمحكمة…

 

هونيك سألوها ليش صرفتي المصريّات…..

فقلتلن: “اضطرّيت، لأنّو اكتشفت إنّو ما كنتش حاملي مصاري كفاية”.

ردّ عليها القاضي:” هيدا منّوش تبرير…كان فيكي توقفي السيّارة وتركبي بالباص او التران…يا تران”

وطلع قرار المحكمة….

ف…..قدّمت استقالتها..وسحبوها من البرلمان.. وجمدولها كلّ مناصبها….

 

عنّا بلبنان….نفس الشي عم  بيصير….

 

مبلغ 11 مليار دولار مختفي….

صار في دين بقيمة سبعتعشر ألف دولار عكلّ مواطن لبناني عم يتنفّس…

الزعما بعدن قاعدين بقصورهن…

وبعدن عم يترشّحوا عالإنتخابات كلّ دورة…

وبعدن عم يطلعوا نوّاب…

 

والشعب….منّوش معتّر…أوعا حدا يقول الشعب معتّر….

الشعب مطفي….غشيم…وعكروت….

 

إحترماتنا…..

Advertisements

لازم نقررّ

Posted in Writings by johnnyhage on March 20, 2011

أنا مع إسقاط النظام الطائفي….

ولأنّي مع إسقاط النظام الطائفي….

حاسس إنّو في شي ناقص….

 

حاسس إنّو في أكتر من  30000 شخص نزلوا اليوم عالطريق…..

بدّن يسقطوا النظام الطائفي….

وعندن شعارات وإندفاع… ومطالب محقّة…

كلّ مطالبهن محقّة…

بس ما عندن “خطّة عمل”…..

 

عندن هدف….هوّي….إسقاط النظام الطائفي….

هيدا حلو عالورقة والقلم….

بسّ ما عندنا طريق لنوصل عالهدف….

 

بمصر وتونس وليبيا……كان في عندن راس….

وكان الشعب عم بطالب إسقاط راس النظام…

ولمّا أسقطوا الراس…سقط النظام ع مراحل…..

 

عنّا غير شي……

عنّا ما في راس…في روس…..

عنّا عم منطالب سقوط نظام سياسي طائفي بإمّو وأبوه…..

ف….لأزم نعرف بوضوح…..

إذا بدنا نوصل لهدفنا النهائي…اللّي هوّي “إسقاط النظام الطائفي”…

شو هويّ الهدف الأول أللّي بدنا نوصلّوا….

بعدان…شو هوّي الهدف التاني…

بعدان شو هويّ الهدف التالت والرابع والخامس…..

وأيمتا منوصل لإسقاط النظام….

 

لازم يكون في أهداف ملموسة وصغيرة لازم نحقّقها…..

….شو هيّي هالأهداف؟

 

هلّق…نحنا الشباب… شايفين الهدف النهائي…من بعيد…

بسّ بعد ما قرّرنا….أيا طريق لازم ناخد لنوصل….

 

إيه..لازم نقرّر….

لأنّو تأخرنا…..

وإذا ما قرّرنا….

العالم رح تزهق…..

ورح تسبقنا الثورة…

ورح يجي حدا تاني…..يركب الثورة….

ويسوق….

 

إحترماتنا….

شو إنتو كمان؟

Posted in Writings by johnnyhage on January 12, 2011

 

أنا كان بودّي إكتب شي غير هيك باوّل ال 2011….

لكن سائبت…إنّي هيك رح إكتب…..

 

من نتفي استقالة الحكومة بلبنان…..

 

بيناتنا….. هيدي حكومة كانت؟…..

هيدي كانت….مشروع حكومة فاشل…

مع وزراء… شو بدّي خبّركن يعني…. ولا أفشل من هيك…..

 

هلّق كانو تلاتين وزير فاشل……

اليوم صاروا تلاتين وزير سابق فاشل……

ما تفوتوني ب 8 أذار و 14 آذار ….

كلّن فاشلين…

وما حدا عارف كيف إنّو يدير هيدا البلد….

كلّن عم بدوروا داير من دار هيدا البلد…

وداير من دار هالبلدان كلها…

 

إي العما بقلبن دوخونا….

وكترة الدوخان….

بتقدّي ل…لعيان النفس….

والإستفراغ…..

إي….الإستفراغ العشوائي….

لدرجة إنّو صفّينا عم نطرطش عن بو جنب….

 

 

بتونس……

ولّعوا حالن…وفلتوا عالطرقات….

 

بالجزائر….

فقعوا….نزلوا عالطرقات…..

 

من المتوقّع ب موريتانيا….

إنّو يبجّوا بكرا…وينزلوا عالطرقات….

.

بالأردن…

مترمين البججان لنهار الجمعة….ليفلتوا الجماعة….

 

نحنا…بلبنان……رح نعرف نبجّ بقا…..

 

ولا صفّوا معيّرينا… وما منبجّ….

إلاّ لما 8 و 14 بدّن يانا إنّو نبجّ…..

 

بس لخبرّكن إنّو إذا ما بجّينا…..

رح يرجع يجي لعنّا 30 وزير فاشل جديد….

على الأرجح هنّي زاتن…

مع شويّة تغيير شنط (حقائب يعني)…

 

والبنزين….رح بضلّوا ساحب طلوع….

 

والكهربا رح بيجي عبالنا إنّو تجي…..

رح منصفّي إنّو عم نشتقلها أكتر….

 

ربطة الخبز…رح ببطلّ إسمها ربطة خبز….

رح بصير فيها رغيف واحد لا غير…..

 

وبدل حليب البودرة اللّي صار ب 30 دولار…

رح منصفّي عم منروّب حليب النوَر….

 

فأنا بقترح…..إنّو….

تبجّوا….تفقعوا…..

تفلتوا…..تطرطشوا….

ما بعرف شو بدكن تعملوا…..

بسّ هزّوا طيزيكن …

يحرق حريشكن اعملوا شي…..

 

ولاّ شو؟….

إنتو كمان قدّمتوا إستقالتكن؟……

 

 

 

إحترماتنا…. 

%d bloggers like this: