Ihtirametna

جنّو يا عالم

Posted in Writings by johnnyhage on April 17, 2011

 

 

قليلة ياعمّي….قليلة الإنسان شو صاير بيعرف معلومات مهمّة بهالحياة؟

قليلة قدّيش في إشيا صاروا البشر مكتشفينا؟…..

كنت عم فكر فيها مبارح  أنا….في إنجازات فظيعة صايرا….

 

إنّو قليلة هيدا… يللّي اكتشف…..

كيف إنّو البقرة….ممكن إنّو تنزلّو حليب؟

فكّرتوا فيها شي مرّا؟

فركتوا إنّو شو كان عم يعمل هيدا لمّا اكتشف هالإكتشاف….؟ …شو كان ناويلا للبقرة عالتقيل هيدا؟…

و…لينزل حليب…مش من مرة وحدة بتصير…

في علّوميّة منّها للخبريّة…وتقنيّة دقيقة كمان…

هيدا كذا مرّة كان عم يلعب مع البقرة…

لآخر شي اكتشف إنّو….بينزل حليب…..

إي بسّ قبل ما يكتشف…..شو كان داير براسو هيدا؟

 

بعدان لمّن اكتشف الحليب بالبقرة….رجع فلت عالمعزاية….

صار في عنّا حليب بقر…وحليب معزي….

اكتشاف فظيع تاني هيدا….

 

بعدان…مع الوقت.. بالإضافة للبقر والمعزي….

صاروا يلعبوا بالحليب دغري….

ويروّبوه…..

ويعملوا منّو جبنة….ولبنة…وأريشة…..

لحتّى وصلنا لل “تاترا” ولل “نيدو”….

ول “حليب… يربوا معه الأجيال”.

 

إنتو لاحظتوا وين بلّشت الخبريّة ووين خلصت؟

ولاحظتوا..

إنّو معظم الإكتشافات بتبلّش بأفكار خوتة… ومجنونة… ومريضة… وجريئة ؟

ف..جنّو يا عالم…..

مش ضروري بنفس الطريقة اللّي اكتشف فيها الحليب صديقنا….

بس….حلو أوقات إنّو…. تجنّو…..

حاجي قاعدين عاقلين……

 

إحترماتنا….

 

Advertisements

شو إنتو كمان؟

Posted in Writings by johnnyhage on January 12, 2011

 

أنا كان بودّي إكتب شي غير هيك باوّل ال 2011….

لكن سائبت…إنّي هيك رح إكتب…..

 

من نتفي استقالة الحكومة بلبنان…..

 

بيناتنا….. هيدي حكومة كانت؟…..

هيدي كانت….مشروع حكومة فاشل…

مع وزراء… شو بدّي خبّركن يعني…. ولا أفشل من هيك…..

 

هلّق كانو تلاتين وزير فاشل……

اليوم صاروا تلاتين وزير سابق فاشل……

ما تفوتوني ب 8 أذار و 14 آذار ….

كلّن فاشلين…

وما حدا عارف كيف إنّو يدير هيدا البلد….

كلّن عم بدوروا داير من دار هيدا البلد…

وداير من دار هالبلدان كلها…

 

إي العما بقلبن دوخونا….

وكترة الدوخان….

بتقدّي ل…لعيان النفس….

والإستفراغ…..

إي….الإستفراغ العشوائي….

لدرجة إنّو صفّينا عم نطرطش عن بو جنب….

 

 

بتونس……

ولّعوا حالن…وفلتوا عالطرقات….

 

بالجزائر….

فقعوا….نزلوا عالطرقات…..

 

من المتوقّع ب موريتانيا….

إنّو يبجّوا بكرا…وينزلوا عالطرقات….

.

بالأردن…

مترمين البججان لنهار الجمعة….ليفلتوا الجماعة….

 

نحنا…بلبنان……رح نعرف نبجّ بقا…..

 

ولا صفّوا معيّرينا… وما منبجّ….

إلاّ لما 8 و 14 بدّن يانا إنّو نبجّ…..

 

بس لخبرّكن إنّو إذا ما بجّينا…..

رح يرجع يجي لعنّا 30 وزير فاشل جديد….

على الأرجح هنّي زاتن…

مع شويّة تغيير شنط (حقائب يعني)…

 

والبنزين….رح بضلّوا ساحب طلوع….

 

والكهربا رح بيجي عبالنا إنّو تجي…..

رح منصفّي إنّو عم نشتقلها أكتر….

 

ربطة الخبز…رح ببطلّ إسمها ربطة خبز….

رح بصير فيها رغيف واحد لا غير…..

 

وبدل حليب البودرة اللّي صار ب 30 دولار…

رح منصفّي عم منروّب حليب النوَر….

 

فأنا بقترح…..إنّو….

تبجّوا….تفقعوا…..

تفلتوا…..تطرطشوا….

ما بعرف شو بدكن تعملوا…..

بسّ هزّوا طيزيكن …

يحرق حريشكن اعملوا شي…..

 

ولاّ شو؟….

إنتو كمان قدّمتوا إستقالتكن؟……

 

 

 

إحترماتنا…. 

%d bloggers like this: