Ihtirametna

قبّعِت معي

Posted in Writings by johnnyhage on November 5, 2011

قبّعت معي

 

قبعت معي من شي كم يوم…

 وبعدها مقبعا….

 

قبّعت معي لأنّو شفت واحد عم يقطع الإشارة الحمرا….

قبّعت معي لأنّو لمّا قطع الإشارة هيدا…لحقو هيداك…

قبّعت معي لأنّو الأميركان بدّن يستعملوا حقّ الفيتو ضد الدولة الفلسطينيّة…

قبّعت معي لأنّو مديري تارك الشغل…

قبّعت معي لأنّو لفّيت سندويشتين تإتغدّا مبارح….وانسيتن عطاولة المطبخ بالبيت…

قبعّت معي لأنّو اللّي لازم كون معا منّاش معي….

قبّعت معي لأنّو ستيف جوبز توفّى…عطاكن عمرو…

قبّعت معي لأنّو منّيش عم بكتب كتير…..

قبّعت معي لأنّو الحكومة اللّبنانيّة بدّا تموّل المحكمة…و ما بدّا….كعيت…

قبّعت معي لأنّو ناطر رسالة من كندا وبعد ما وصلت…

قبّعت معي لأنّو مش عم بعمل ريّاضة…

قبعّت معي لأنّو بديّ أعمل كلّ الإشيا بنفس الوقت…وما معي وقت….

قبّعت معي لأنّو صرلا يومين مقبعا معي….

إف ف ف ف ف ف ف ف ف ف فت…..

 

إحترماتنا….

Advertisements

صار بدنا إعادة تأهيل

Posted in Writings by johnnyhage on December 11, 2010

الساعة وحدة بعد نص ليل مبارح…..

بلّشنا نحكي عن شو شفنا……

وبقينا عم نحكي للساعة تلاتة و نصّ ع وجّ الضوّ…..

 

حكينا عن الإسرائلييّ…..

وعن إنّو….العمى بقلبن شو وقحين…..

وعن كيف إنّو بعدن قاعدين بفلسطين….

لأ..ومقتنعين إنّو هيدي أرضن كمان…..

وهيئتن مفكرين إنّن باقيين الجماعة…

وعم بفرقوا جنسيّات إسرائيليّ كمان…..

 

 

حكينا عن الفلسطنييّ……

وكيف إنّو منقصمين…

وكيف إنّو عم بحاربوا العالم كلّوا….

لوحدن….

عفواً بمساعدة جامعة الدول العربيّة….

لوحدن يعني….

وفتنا بدباجة إلها أولّ وما إلها آخر…

عن القضيّة الفلسطنيّة…..

وعن إذا عم تتقدّم لقدّام…أوعم ترجع لورا…..

أو إنّو إذا بعدا…ومش عم بتزحزح من محلّها….

 

 

حكينا عن الأميركان…والبريطانيّي…والأوروبيّي….

وعن ألأمم المتّحدة كمان…..

وعن كيف إنّو هنّي داعمين هالإسرائيلييّ…

بشكل متواصل…..ماديّاً…ومعنويّاً…وبطريقة عميا يعني…..

لدرجة صاير هيدا الدعم…صاير بيشبه

نوع من أنواع الهَبَل……

والهبل عم يتزايد مع مرور الزمن عفكرا…

وعم يتفشّى ليعدي غير بلدان كمان….

 

 

 

وحكينا عن العرب……

يا بييّ شو حكينا عن العرب…..

حكينا ولتّينا وبربرنا….

كتيرعن العرب…..

 

بربرنا عن العمى اللّي بقلبنا…..

والعمى اللّي بعيوننا….

والعمى اللّي بذاكرتنا….

والعمى اللّي بجهودنا…

والعمى اللّي بخطاباتنا….

والعمى اللّي ب هبلنا….

وكلّ أنواع العمى اللّي فينا……

 

وعرب مش بسّ يعني أنظمة وحكومات…..

لاه….العمى بقلبنا ك….شعوب….

ما هيّ الشعوب اللّي بتعمل أنظمة وحكومات…..

ولاّ لأ؟

 

 

وبربرنا عن القضيّة الفلسطنيّة

وكيف إنّو هيدي القضيّة…. منّاش قضّية للفلسطينيّة وبسس…..

انتبهوا….هيدي قضيّة عربيّة مسائبة إنّها عأرض فلسطين…..

وهيدي القضيّة الفلسطينيّة…

هيدي منّاش قضيّة إسلاميّة….

كمان انتبهوا…..

هيدي قضيّة إنسانيّة من دون ما يكون الدين إلو دخل فيها…..

 

هيدي يا تقبروني…..قضيّة عالميّة….

 

بسّ مسائبة….إنّو العرب……

نحنا يعني….

حاطيّنا عجنب…. لأنّو مش مسائبة هلّق….

وكلّ ما منحطّها أكتر عجنب…

كلّ ما عم نقضي عالقضيّة أكتر وأكتر….

مسائبة إنّو نحنا العرب….. هلّق معجوقين….

عم نشتري…وعم منبيع……وعم نقبض…..و عم ندفع….

 

 

كلّ هالحكي والديباجة إجا من بعد ما شفنا……

التمرينة الأخيرة لمسرحيّة “عائد إلى حيفا”

بمسرح بابل بالحمرا…

المسرحيّة بتفتح اليوم….. وبتبقى عم تعرض يوميّة ل 19 ديسمبر….

 

“عائد إلى حيفا” هيّي بالأساس رواية لغسّان كنفاني…..وهلّق عم تخرجها لينا أبيض عالمسرح…..

 

 

اتفضلوا….روحوا شوفوها…..

وبسّ تشوفوها….

خبّروني…..

شو رئيكن إنتوا؟….

 

 

ما صار بدنا إعادة تأهيل؟

 

 

إحترماتنا….

%d bloggers like this: