Ihtirametna

ثورة مباركة

Posted in Writings by johnnyhage on March 18, 2017
o-REVOLUTION-FIST-facebook
بالفيديو
كل مرّة كنت اتمنّى إنّو يصير في ثورة بلبنان…
كنت اطلع غلطان…
كنت انفئس… وقول العما بقلبنا كيف إنّو نحنا اللّبنانية
قاعدين عخازوق صممّولنا ياه الزعما والنوّاب اللّي انتخبناهن..
طيب ما العما بقلبنا….
هنّي اعكاريت …. ونحنا شعب صايع وضايع…
هلّق حظّي أنا شخصيا طلع بيفلق الصخر.. وصرلي فرصة إنّو قوم عن هالخاوزق… وافركها…
ففركتها و فل ّيت من البلد…
إي بس أصحابي… وعيلتي… وأهل بلدي بعدن قاعدين عالخازوق….
لأّ.. واتبيّنلي… إنّو كلّ ما بيجو بيتعوّدوا عالخازوق…ويشدّو عحالن ويحاولو يكفّو حياتن بشي طريقة عالخازوق..
بيجو الزعما… وبيفظعو زيادي… وكيف بدّي قلكن…من وقت للتاني… بيحوصوا…وبيجوا وبيبرو الخازوق زيادة… بسنّولو راسو… بروسّو…
ويبدو إنّو هلّق روّسو لدرجي… ما بقا ينقعد عليّ…
صفّى الحلّ الوحيد… إنّو يطير هالخازوق… ويطيروا النوّاب… ويطيروا الزعما…
#ليش_نازل _تتظاهر… لأنّو ما بقا بينقعد عالخازوق…
ولو إنّي بالغربة عم نظّر عليكن من بعيد…
#ليش_نازل _تتظاهر… تما تصير إنت قاعد حدّي بالغربة كمان…
وليكو… اذا ما طار الخازوق… رح نرجع متل الشاطرين نقعد عليه..
فاتّكلو عألله… وثورة مباركة…
احترماتنا…
Advertisements

الجلسة النيابية التارخية

Posted in Writings by johnnyhage on November 7, 2016

أنا كانت تمنياتي إنّو زياد الرحباني يرجع يكتبلو شي مسرحيةّ بهالزمن هيدا…

بصراحة من بعد اللّي صار بجلسة إنتخاب رئيس الجمهورية بلبنان…

بصراحة… فشّولي خلقي هالنوّاب…

إنّو بالآخر طلعو بينفعوا لشي….

عيّشونا ب”شي فاشل” جديد نسخة 2016 لمدّة ساعتين وأكتر…

يعني إذا في حدا أفضل من زيّاد بالمسرح… هنّي النوّاب بالفعل…

بتعرفو لمّا الولد بصير عمرو 16 سنة وبصفّو أهلو عاتلانين همّو…

إنّو ما منعرف بشو شاطر هالولد….

إي النوّاب كانو هيك… بس الفرق إنّو هلّق اعرفنا…

فلتوهن عالمسرح…

هنّي صرلن فترة طويلة عم بمثلو عالعالم…

هلّق صار وقت يمثلو للعالم….

ومش حيالا مسرح… مسرح ارتجالي….

ولك يحرق حريمن ما أهضمن….

خلّي الكاميرا لاحقتهن يابا.. وخدلك ع entertainment

كلّ واحد كاراكتير أطيب من التاني….

دولة الرئيس داير الجلسة ونازل تنظير عليهن…

جنبلاط اللّي منوش لاكشو… فلتان عتويتر وكلّ شويّ بينكش صلعتو وبقفقف…

فرنجية قاعد عم ببحلق ونازل نقورا بمناخيرو….

الجميّل جايي هوّي وإبن عمّو وبدّن يتمنيكو قدّ ما فيهن…

الحريري ناتع كونفوا نوّاب وعم يفتل باهالمجلس ومكتري ال”سوشيلايزنغ”….

زهرا وحمادي عم بسمّو ويعدّو ويخزئوا… ومكيفين بالفكرة…

وعم بستّفوا “إنسايد جوكس” بين بعدن….

وعقاب صقر… ولك رجع بيّن عقاب صقر… وقاعد بالزاوية مش طالع حسّو…

وعون… ولا أروق… رايق كتير كاين….

ناتعلو شي تلات حبات تحت لسانو… وجايب ابن خيّو لازقو حدوّ ليسايرو..

كرمال ما يغفا ويخلّلي بالجوّ عن شو عم بصير…

وأكيد فيلو الكم كاراكتير المشاغب بلا ما حدا يعرف مين هودي…

هودي الbluffers…

هيدا اللّي انتخب مريم كلينك… وهيداك زوربا اليوناني…وهيدا اللي حطّ مغلّف إضافي بالصندوق…

طيّب إنّو معقول انتخبو مريم كلينك…

يعني كلّ شي ممكن يصير غلّط بالهلجلسة … صار…

يعني إذا بدّك تظبّطها ما بتظبط…. chef-d’œu·vre العادي…

من لحظة افتتاح الجلسة… للحظة إنتخاب رئيس جديد للجمهوريّة…

كلّ شي ممكن يصير غلّط بالهلجلسة … صار…

هلّق… على أمل… يطلعلنا شي جلسة بتشبهها…. قريباً انشالله…

وما نضلنا ناطرين قد ما نطرنا زيّاد الرحباني إنّو يطلعلو بشي عمل جديد…

ما هيك؟

إحترماتنا….

قسطل مضروب

Posted in Writings by johnnyhage on October 23, 2010

بهونيك شارع…..من شوارع الأشرفيّة…

في قسطل ميّ…أساسي…مضروب….

وفلتان عالطريق……

وقاطع الميّ عن البيوت الموجودين بهيدا الشارع…

 

قاموا السكّان اللّي عايشين هونيك…

حدّ القسطل المضروب…

تلفنو لشركة الميّ…وخبّروها عن القسطل….

وطلبوا منهاّ تبعت حدا…

يجي يصلّحوا..ويداويلو جروحو…..

 

إجو…. موظّفين الشركة…وشافوا القسطل….

وعملوا تقرير…

وكتبوا…إنّو هيدا القسطل …لازملو غيار…..

وكتبوا كمان….إنّو تيقدروا يغيروه…

لازم يسكروا الطريق…بشي يوم من الإياّم الجايي….

 

هلّق راحت الإيّام…وإجت الإيام….

والقسطل بعدوا مضروب…والميّ….

صرلها أكتر من شهرين مقطوعة عن هيدا الحيّ….

 

لمّا دقوّا السكان مرّة جديدة للشركة…

…فهموا إنّو …..

الموافقة لتسكير الطريق….

عم تاخد وقت….

وعم تعمل فتلة عاالمدرا والزعما….

وعم ب تعلّ …

والشركة بعدا ناطرة الضوّ الأخضر….

 

ف…قاموا ساعتها السكّان الحيّ….

حكّوا راسن شويّ…..

…واتوجّهوا..

.لعند الستّ ناتالي فضل لله….

صاحبة شركة Nathaly’s Agency….

وطلبوا منّها….. لا بلّ اترجّوها….

إنّو….تنظمّ عرض أزياء بأسرع وقت ممكن….

بنفس الشارع اللّي فلتان في قسطل الميّ….

 

هيكي …كانوا أكيدين هنّي إنّو الطريق…

بسرعة رح بتتسكّر…لشي يومين تلاتي….

و بما إنّو هيك هيك مسكّرة كرمال عرض الأزياء….

شركة الكهرباء بتستفيد….وبتصلّح قسطل الميّ….

 

هيدا مثل بياخد العقل…

عن كيف إنّو لازم يصير في تعاون دايم….

 بين القطاع الخاص والقطاع العام بهالبلد….

وكيف إنّو الشعب…لازم يفكّر بطرق خلاّقة…

 ليساعد الدّول عتتميمّ واجبتها….

 

وأنا من على هذا الممبرّ….

 

بدعي الدولة اللّبنانية…

لإقامة مشاريع مستقبليّة دائمة وواعدة…

مع الست ناتالي فضاللّه…..

وتشجيعها على ابتكار مشاريع جديدة في مجال عملها…

من أجل مستقبل أفضل…لئلنا ولئلها….وللجميع…

 

وأكيدي…ما مننسى…..

 

إحترماتنا…

%d bloggers like this: