Ihtirametna

مفكرا حالها عم بتفكّر

Posted in Writings by johnnyhage on May 23, 2011

إنتو ملاحظين شو إنّو اللّيل قاسي بكون….

لمّا بتصفّي ناطرو ليقطع….

وبتصفّي سهران… مش لأنّو حابب تسهر…

بسّ لأنّو… منّكش قادر تنام….

 

خصوصي إنّو قبل ما يجي هيدا اللّيل….

بتكون شفت حضرة جنابها…..

 وفتحت معها حديث….

حديث دقيق شويّ….

…ودقيق كتير بركي….

لدرجة بتصفّي….

حاطط قلبك عإيدك يعني….

وعم بتزين كلماتك…..

تما يجي يزقّ لسانك….

وتعملّك شي غلطة قاتوليّة….

 

وبعلمك عأساس… إنّو وصلت لآخر الحديث معها….

وناطر منّها شي جواب…

 

بتجي هيّ… وبتنتعك جواب….

متل يعني…كيف بدّي قلّك….

“اعطيني شويّة وقت….

خلّيني فكّر شي كم يوم…..”

 

العما…..شو  “شي كم يوم؟”

ولي وما قاعد عأصابي أنا….

…قاعد وعم بتعنزق عليهن رح يتفتّقوا…..

 

و….بيجي اللّيل…..

 

وبدل ما تكون حضرة جنابها قاعدي وعن جدّ عم بتفكّر…..

بتروح هيّي….

وبتنام…

وعقلبها متل العسل…..

وبصفّي أنا….

سهران….مش لأنّو حابب إسهر…..

بسّ لأنّو قلقان….ناطر منها شي جواب….

 وعم فكّر….

بشو معقولي هييّ تكون عم بتفكّر…..

 

العما…

 

وبعد كم ليلة….

بتجي بتسألها….”شو صار معِك؟….”

بتقلّك…. بعدني عم فكّر…..

 

هيّي مفكرا حالها عم بتفكّر….

وأنا….برضوا…..

مش عم بعمل شي غير إنّو عم بفكّر…..

 

 

إحترماتنا…

Advertisements

هديونا ياه…هديّة

Posted in Writings by johnnyhage on January 23, 2011

خلصنا بقا…… ولك خلصنا بقا…..

لمّا راحوا مضيو إتّفاق الطائف…..

قبض كلّ واحد منّن مبلغ…

بيتراوح بين مليونين و8 ملايين دولار…

 ليوقفوا يتقاتلوا….ويتقاسموا البلد….

ودخيل عرضكن ما حدا يجي ينطّ…

ويقول فلان وفليتنان ما مشيو بالطائف….

لأنّو اللّي ما مشي بالطائف….رجع مشي بالدوحة…..

شو مشي؟…ركض……

وبالدوحة……

لا مليونين ولا تماني…..أكتر بكتير كتير كتير…..

وصارو الجماعة عم يدّشّوا ملايين…..

 

هلّق…..

هيئتن…..هضّموا….وحابّين يرجعوا يعبّوا….

لكن السعوديّة…فهمت اللّعبة….على ما يبدو…..

وقطر…فهمت اللّعبة عالّسريع…..

لأنّو الدوخة اللّي أكلتها بالدوحة….

ما صرلها زمان…..

 

الشعب اللبناني….

كمان فهم اللّعبة…..

بسّ…..حامل حالو غشيم…

ومش فهمان شي من شي…..

 

المشكلة بسيطة….

كلّ البلدان عم بديروا بلدنا…

لأنّو نحنا ما منعرف نديروا…

ببساطة…. لأنّو ما بعمرو كان بلدنا….

 

إستقلالنا…نحنا ما أخدنا…

ولا حاربنا كرمالو…

إجوا هنّي….وهديونا ياه…

هديّة….

هديونا ياه هدّية…عالعيد…

كرمال ساعة اللّي بدن…وبكلّ عيد…

يجو ويلعبوا فيه….

(بلا معنى أكيد)

متل ما يعملوا هلّق….

 

ع فكرا…

ما رح بصير البلد ل “اللّبنانيّي”….

إلأّ إذا أخدنا إستقلالنا بإيدنا…..

 

منستقّل….
من البلدان اللّي براّ…

ومنستقلّ….

من فساد الوزرا والنوّاب اللي الجوّا… كلّن….

 

بقولولي بدّك تاخد موقف….

بدّك تكون مع حدا….

إي لأ….اسمحولي…

ما بدّيش كون مع حدا…

بدّي إنّو ينزل الشعب عالأرض ويقشّن تنيناتن…

 

بس إذا الشعب اللّبناني ما انقبر وانهزّ…..

مش رح نستقل….

إذا ما نزل عالشارع….

وعمل ثورة ضد المعارضة والموالات….سوا…

لأنّو كلنّ كذّابين…وسرّاقين…وعندن “أجندات” خارجيّة….

مش رح نستقل…

 

رح يرجعوا…

من برّا…ومن جوّا….

يلفّولنا ياه هدية…..

ويهدونا الإستقلال….

…عن جديد….

 

من عيد….لعيد…..

 

 

إحترماتنا…

 

حكم ديكتاتوري محط

Posted in Writings by johnnyhage on October 30, 2010

أنا اطلعت بحلّ جذري وقاطع للدولة اللّبنانيّة……

أنا هلّق اعرفت شو لازم نعمل لنصير بلد محترم وبيسوى…..

أنا القيت الجواب للحزّورة اللّي كل السياسيّين اللّبنانيين عم دوروا عليها….

أنا رح قلكن شو لازم نعمل….

 

نحنا لازم نطلب من شي دولة تانية…..

مسالمة…..محترمة حالها…..

وما حدا من اللّبنانيّ عندن مشكلة معها….

متل كندا مثلاً…أو سويسرا يمكن…..ما بعرف….

مش مشكلة…منلاقي دولة….

 ومنطلب منها تجي تحكمنا……حكم ديكتاتوري محط…..

 

ديكتاتوري محط….

واللّي بيعلّي راسوا يقطشولوا ياه…..

 

إيه… خلّيهن يجوا يعلّمونا عن جديد….. ويعملولنا “ترايننغ”……

كيف الإنسان ممكن إنّو بطريقة حضاريّة يدير بلد…..

لأنّو…نحنا عنّا مشكلة: بالإنسان، وبالطريقة الحضاريّة، وبالإدارة، وبالبلد.

 

خلّيهن يجوا…,ويفظّعوا فينا لنصير نفهم نحكي مع بعض…

ونتعاطى بالسياسي…خلّيهن يربّونا عإيديهن….

وخلّهن لمّا انصير اكبار

يعلمونا نمشي لوحدنا…..

ولمّا انصير نعرف نمشي لوحدنا…..

ساعتها فيهن يتركونا….

وأفضل  إنّو ما يتركونا فرد مرّة….أحسن عمراحل بكون….

بسّ ليتأكّدوا إنّو ما رح نرجع انخبّص…..

أفضل إنّو يخلّو عينن علينا…..

 

لإنّو غير هيك…. هيدا البلد…مش رح بصير بلد….

ولو بدّوا يصير…. كان صار….

 

إحترماتنا….

%d bloggers like this: