Ihtirametna

بلا حركات

Posted in Writings by johnnyhage on September 5, 2011

إنو هيك يعني طلعت الخبريّة بالآخر؟…..

هيدي الطنّة والرنّة….اللّي…فلقتونا فيها….

وهيدي الهمروجة اللّي ربّيتونا عليها….

طلعت كلّها فالصو؟….

 

لاه روئوا طولوا بالكن….

..إنّو…مرحبا….

 

ولاه….

 

ولاه من أوّل ما خلقت…

وإنتو نازلين فيي وباللّي من جيلي….

 خطابات ونظريّات…..

على إنّو لبنان الأرز….

و لبنان الأخضر ومدرشنّي…..

 

كنت بإيطاليا وبفرنسا من أسبوعين…..

اندوخت قدّ ما في خضار هونيك….

عناّ ببيروت…صرنا عم نشتهي الشجرة….

ولاه….أكبر خضار عنّا صفّى سوكلين…..

 

 

من أوّل ما خلقت…

وإنتو نازلين فييّ على إنّو…

وين ما تروح ما فيش متل لبنان….

أكيد ما فيش متل لبنان…..

شايفين شي بلد أهلوا بيحكوا تلات لغّات بالقليلة….

وبفشخوا عبعضن بالأكل والشرب والسيّارات والتياب…

وأكل الهوا…والسهر والسياسة والنظريّات….

وما في عندن لا كهربا ولا ماي ولا استشفى؟….

 ولاه….

بدل ما ننفبر بالعربي وبالفرنساوي وبالإنغليزي…

نفسّر للعالم إنّو ما فيش عنّا كهربا….وننبسط بالخبريّة…..

ونشوف حالنا على إنّو نحنا “تري لانغ” أو “تراي لنغويل”…

أنا بفضّل باللّبناني..بسّ ياللبناني..قول

 “كتّر خير أللّه عنّا كهربا…. وماي واستشفى وفينا انعيش متل البشر”

 

من أوّل ما خلقت…

وإنتو نازلين فييّ على إنّو…

“لبنان كان في ترام…وسكّة الترام….” وكنتوا تضّحكوا من بعدا…

وأنا لمّا كنت بفرنسا من أسبوعين….

كمان خبّرتن بالفرنساوي…

إنّو “لبنان كان في ترام …وسكّة الترام….” وكمان اتضحّكت من بعدا…

قامو رجعوا هنّي اتضحّكوا من بعدي….

 اتضحّكوا لأنّو هنّي بعدو عندن “الترام وسكّة الترام….”

وهيدا الترام… صار شي عادة جدّاً بالنسبة لئلن….

متل الكهربا يعني…

كان بدّي اتضحّك عن جديد وقلّن إنّو نحنا بعدنا ناطرين الكهربا…..

بسّ استحيت….

 

 

من أوّل ما خلقت…

وإنتو نازلين فييّ على إنّو…

الأكل اللّبناني هوّي أطيب أكل….

دخيل عرضكن عملولكن برمي بلبنان….بتشوفو….

كيف إنّو المطاعم كلّها…يا أما أرمنيّة…يا أما أميركيّة….يا أما فرنساويّة….

يا أمّا يابانيّة…..يا أمّا صينيّة….يا أمّا طليانيّة…..يا أمّا هنديّة….

أووف تعبت….

وهودي كلّن طيبين عفكرة….وأطيب أكل كمان…..

والبرهان إنّو لبنان..مليان مننّ….

 

من أوّل ما خلقت…

وإنتو نازلين فييّ على إنّو…

نحنا عنّا النايت لايف…..غير شكل…

بسّ بدّي قلكن….

إنّو النايت لايف اللّي عنّا…

متلا متل اللّي عند غيرنا…..

بس نحنا منعمل منّها همروجي زيادة عن اللزوم…

طلعوا لبرّا وبتشوفوا…..

 

من أوّل ما خلقت…

وإنتو نازلين فييّ على إنّو…

إنّو نحنا كتير منحبّ الحياة لأنّو ما منعرف بكرا شو مخبّالنا….

إي أنا بفضل حبّ الحياة شويّ… وأعرف بكرا شو مخبّالي مثلاً….

وبسّ أعرف بكرا شو مخبّالي… بصير فينيّ حبّ الحياة كتير مش شويّ…

 

من أوّل ما خلقت…

وإنتو نازلين فييّ على إنّو…

اللّه خلقنا وكسر القالب…..

وإنّو نيّال اللّي عندو مرقد عنزة بلبنان….

وبلا بلا بلا بلا بلا بلا بلا….

ليكوا ..اللّه بحبّ اللّبنانيّة قد… ال “مش” لبنانيّة….

والقالب بعدوا ما انكسر..

وبعدوا ألله عم يخلق متلنا وأفضل منّا…

 

وأنا برأيي…

إنّو لازم نطلع منّها هالحركات كلّها بقا….

وننتبه عحالنا….

ونعيش بلا حركات….

 

إحترماتنا….

Advertisements

إنش 40

Posted in Writings by johnnyhage on July 2, 2011

 

مبارح كنت ماشي بالسياّرة….أنا وزميلي…

رايحين ننضبّ ببيتوتنا بعد نهار شغل طويل….

وخصوصي إنّو القرار الظنّي طلع أوّل مبارح….

وأنا بظنيّ….إنّو منّاش كتير رايقة الأوضاع…..

 

نحنا ورايحين ننضبّ…..

شفنالكن مشهد…..

“فلجنا”….

 

ذكرّنا كيف إنّو الشعب اللّبناني…..

هوّي شعب المظاهر من دون أيّ منافسة…..

مبارح اتأكّدت…

إنّو اللّبنانيّي….. بحطّوا وزك لكل شي في شعوب بالعالم

 رائدة بالتفشيخ وشوفت الحال…

 

شفنالكن سيّارة يابا…..

هوندا “سِفيك” زهريّة….

زغتورة….

ملغومة….

منفّخة…..

مدعومة…..

غير إنّو صوت إشبمانها عم بلعلع….

البافلات اللّي زارعينن بقلبا…..

عم ببظّوا موسيقى لبرّها…..

وعم ببظّوا موجات وذبذات و “VIBRATIONS”

مخلاّية الهوندا الزهريّة عم تهزّ وتخلع على ال”بيت”…

 

وأنا أكيد إنّو صاحب الهوندا فيه بسهولة يشرّج دخوليّة…

عالعالم الواقفة عالطريق…. مع هالجوّ اللّي عاملو…

تعبان عليه الزلمي لأنّو…

 

بسّ مش هون الخبريّة

…هيدي شغلة عادة جدّاً…..

وشايفين متلا وأمتال ..

و….بكلّ منطقة في منّها مسطرة بالقليلة…

 

العلامة الفارقة عند صديقنا الجديد…

هوّي إنّو مفيّمها عن الجوانب….

ومن القزاز الورّاني….

ناتع تيلفزيون… شي 40 إنش بيجي عرضو…..

وداير الشاشة لبرّا….

وعارض عليه فيلم أميركي…..

يعني السيّارة اللّي ماشية وراه …

بتقدر تحضر الفيلم برياحة…ومع ترجمة كمان….

 

طيّب هيدا شو بتسمّوا…

شوفة حال؟…. ولاّ فكرة خلاّقة؟… ولا إنّو نابغة أوّ داهية مثلاً؟

ولاّ سطلنة؟… ولاّ إنّو هبل؟….ولاّ محن؟

ولاّ شعب لبناني؟

 

إنّو يعني شو؟

 

 

إحترماتنا….

%d bloggers like this: