Ihtirametna

هيدا البلد بجنّن

Posted in Writings by johnnyhage on March 24, 2012
هيدا البلد بجنّن…
بجنّن بكلّ ما للكلمة من معنى….
يعني إذا بتجيبو شي إنسان عقلو سليم…
وبتِشلَحوه بهالبلد أكتر من شهر… ببطّل عقلو سليم…
بجنّ…
ب روح فيها….
والسبب الرئيسي بكون…
مفعول البلد عليه….
وبما إنّو سكّان هيدا البلد….
صار إلهن أكتر من شهر ساكنينو….
صفّينا كلنا مجانين….
بايعينا…
تفوه علينا….
صفّينا عايشين بهوا ملوّث….
حمّام ومقطوعة مَيتو….
تفوه علينا….
مقطوعة مَيتو….
ومش مضايقنا هيدا الشي أبداً…
لأ والأنكا…
إنّو تعوّضنا عالريحة الكريهة….
تفوه علينا….
والأنكا أكتر من هيك…
إنّو لمّن تروح هيدي الريحة…
أوقات منشتقلها…
تفوه علينا….
طيّب إنّو معقولي أطنان لحمة وسمك ودجاج مضروبة على حيلها؟…
والوزراء عم يتناقفوا المسؤوليّات وعم بيزتّوها عبعض…
ولاّ إنّو معقولة أدوية على حيلها مضروبة كمان؟….
والنوّاب عم يتناقفوا المسؤوليّات ويزتّوها عبعض…
طيّب هيدا اللّي أكل لحمة مضروبة…
والتعن حريمو….
وراح يشتري دوا…
وطلعلو دوا مضروب…
شو بيعمل…؟
بيعمل تحتو ليش شو فيه يعمل غير هيك….
وهيدي مش أولّ مرّة بتصير….
صايرا من قبل…ورح بتصير بالمستقبل أكيد….
 مع هيك طقم سياسي معفّن…
أكيد رح بتصير…
لحمة مضروبة مع دوا مضروب….
صفّا الشعب مضروب عراسو…ومضروب عقلبو…
صفّا الشعب معفّن…متمسح….مجنون…
واللّه شايفين لو نحنا ببلد طبيعي…
كانو النواب والوزرا ما بيسترجو يتركو بيوتهن بهيك وضع…
لو نحنا ببلد طبيعي…
كان الشعب نتّفهن واحد واحد….
لو نحنا ببلد طبيعي…
كانو بيستحو يطلعو عالشاشات بقا…
كانو بيختفو….
كانو بيستقيلو…..
لكن للأسف….
شائت الظروف إنّو ننكون ببلد مجنون….
بلد مجنون…وكتّر خير أللّه…دايرينو مجانين….
والشعب….. آخ خ خ خ خ…
تفوه علينا…..
إحترماتنا…
Advertisements

طالما إنهّا صرماية

Posted in Writings by johnnyhage on January 19, 2012

 فاقو الجماعة…

 

وزير الإعلام…أعلم كلّ النوّاب والوزراء شو اللّي صار…

 

وزير الداخليّة نزل شرحلنا كيف إنّو كلّ أجهزة القوى الأمنيّة كانت عم بتنسّق مع بعضها بفعاليّة لتساعد المتضررين وتنتشل الضحايا… – برافو عالتنسيق

 

رئيس مجلس الوزراء أمر بفتح تحقيق تيعرف شو صار عالمظبوط…- والتحقيق هلّق مفتوح …ورح يبقى

 

رئيس الجمهوريّة تأسف.. ودعا إعادة النظر بآلية الإنقاذ لمّا بصير كوارث. وطلب من وزير الاشغال العامة والنقل تكليف جميع البلديات إنّو يعملو مسح على كل الابنية… – وبسرعة

 

بسرعة وزير الأشغال والنقل، نقل الرسالة للبلديّات وطلب منّن إجراء مسح على كل الابنية

 

وزير العدل وعد إنّو بدّو حاسب المسؤول عن الحادثة..- وعد الزلمي

 

وزير الصحة خبّر المستشفيات كلاّ … إنّو لازم يستقبلوا الجرحى على نفقة وزارة الصحة العامة…- عيب ما بيصير

 

مجلس الوزراء كلّف الهيئة العليا للاغاثة إنّو لازم تساعد عيل الضحايا، وتشكل لجنة لإجراء التحقيق….وبسرعة

 

بسرعة لجنة الأشغال العامة اجتمعت إستثنائيّاً وخبّرتنا..وأتحفتنا إنّو في 20 ألف بناية بلبنان ممكن تقشط هلّق…هلّق هلّق….وجسر…

 

بظرف 12 ساعة…فاقو….ونطّو…وساقو…وحكيو….

هلّق …هنّي بصدد إنّو يحضروا حالن ليرجعوا يفوتو ينامو….

ينامو عبلد….كلّوا مشاكل هنّي مسؤوولين عنّو…..

ورح بضلّن نايمين ليرجع يجي شي تاني يفيّقن…

ويرجعوا عن جديد يفيقو…وينطّو..ويسوقو…ويحكو…

ويرجعو عن جديد ينامو…

 

27 قتيل.. اللّه يرحمن…

11 جريح… حمداللّه عسلامتن…

128 نايب لازملن غيار كلّن….من أوّلن لآخرن…نقطة….

30 وزير لازم يصير فيهن متل النوّاب….نقطة

 

بمختصر…

هيدا بلد …. ما منستاهلو….

تنصير نستاهلو…

لازم نحنا الشعب….نكبّ كلّ الطقم السياسي…

اللّي بهيدي الحكومة واللّي قبلها واللّي قبلها واللّي قبلها….

ونجبلو وجوه جديدة تجي تحكمو…..نقطة….

 

ليطلع منّا هيك شي….

في حلّين….

يأمّا الشعب يثور ويوعى عوضعو…

يأمّا لازملنا شي ديكتاتور ..عارف حالو شو عم يعمل…

يجي ويحكمنا بالصرماية….

 

وبالنسبة لنوع الصرماية….مش مهمّ…

طالما إنها صرماية…

لكن كلّ ما كان قياس الصرماية أكبر…

كلّ ما كان أفضل….وأسرع…

 

إحترماتنا….

الحّق عليّي بركي

Posted in Writings by johnnyhage on January 17, 2012

رحت عالأمن العام وقدّمت مسرحيّة….

ل نعرضها بأوّل شباط بمسرح المدينة….

رجعوا اتّصلوا الأمن العام وقالولي إنّو في كلمتين تلاتي بدّي إحزفن….

وقالولي كمان تإنزل لعندن ومعي….نسختين من النصّ المعدّل…

من بعد ما كون حذفت الكلمتين تلاتي….

 

وصلت لعندن…

واكتشفت إنّو معي نسخة وحدي بسّ من النصّ…

فقلت بسيطة يا صبي…

أكيد فيلو شي دكّانة أو مكتبة عندها فوتوكوبي…..

 

هلّق النصّ…بيطلع 30 صفحة….

وورقة الفوتوكوبي….بالأبيض والأسود….

عند معظم المحّلات بمنطقة الحمرا….

كِلفِتها 50 ليرة لبنانية ….

 

لقيت دكّانة….هويّ بيناتنا منّاش معروفة هيدي….

إذا دكّانة ولاّ مطبعة…

ولاّ مترجم محلّف…ولاّ معرصة…..

ولاّ ما معروف شي من شي…..

 

فتّ لعند الزلم…

طلعلي شبّ بالتلاتينات…

مبيّن عليه  آدمي وضحوك…..

قلتلّوا بديّ صوّر 30 ورقة أبيض وأسود إذا بتريد….

قلّي وينن؟

قلتلّو…هيه يحنّي….

أخدن منّي وزتّن بهالمكنة….وبلّش يطبّع…

 

من باب الحشريّة جيت أنا وسألتو…

قدّيش رح بكلفوني…قال الورقة ب 500 ليرة

يعني ال30 ب 15000ل.ل

 

هوّي قال هيك ومتل كأنو شبقتي شي سطل ميّ مسقّع….

اركدت عالمكنة وسحبت الوراق….

وقلتلوّ وقّف يا زلمي شو عم تعمل؟ هيدي سرقة إسمها…

قلّي لاه…إنت شو عم تعمل…

قلتلّو وقّف وقّف….

قلّي طيّب كرمالك بحسبلك ياهن الورقة ب 250 ل.ل.

يعني بيطلعوا 7500 ل.ل.

فقلّتلو خلص وقف يا زلمي هيدي سرقة إسمها….

 

قلّي قدّيش بدّك تدفع تخمين…قلتلو بالحمرا الورقة ب 50 ليرة….

وقلّي إي يلاّ روح عالحمرا لكن…

 

كانت هوني المكنة طبعتلها شي 6 أوراق….

قلتلّو اتفضّل هودي 3000 حق الستّ وراق….

 

قام شبق الوراق بيوجّي….

وقلي ما بدّي شي منّك واحد بلا زوق….

خود وراقك واطلاع لبرّا….

 

وهون بلّش يتحوّل…

أنا وعم لمّ وراقي….

هوّي بلّش يتحوّل من شي بيشبه الإنسان…

 لشي تاني ما بيشبه شي أبداً….

وبلّش صوتو يعلا تدريجيّاً…

لصار بمستوى اكتر طبقة جعير ممكنة…

أنا وعم لمّ وراقي عرواء….

وبكّل برودة أعصاب…

 

وقلّي…..:

“لبرّا…..لبرّا…..

عم قلّك لبرّا…..عجّل….

خود وراقك واطلاع لبرّا…..عجّل….

ما تقول سرقة….ما تقول سرقة…

اطلاع لبرّا بسرعة…..حيوان…..

حيوان….حيوان…..

عجّل…اركوض….اطلاع لبرّا……”

 

أنا بكلّ برودة أعصاب كنت عم لمّ ورائي…

وعم بمشي عرواء لصرت برّا ….

رجع هوّي كفّا سمفونيتو برّات المحّل….عالطريق…

 

” حيوان….ارجاع عالحمرا….حيوان…

اطلاع لبرّا….فلّ…فلّ…

عم قلّك فلّ…..حيوان….

حيوااااااان ن ن ن ن “…..

 

فلّيت…

فلّيت من دون ما إحكي ولا كلمي…

وأنا قاعد عم فكّر شو صار…

وإذا الحقّ عليّي…ولاّ الحقّ عليه…

لأنّو يمكن يكون إنّو الحق علييّ بإشيا كتيري….

وحدي منّن إنّو بعدني عايش بهالبلد….

 

إحترماتنا….

%d bloggers like this: