Ihtirametna

ليش ما منرقّم؟

Posted in Writings by johnnyhage on December 31, 2012

بمدينة نيويورك… بأميركا…

الحياة ما بتشبه الحياة بمدينة بيروت بلبنان….

بالمرّة ما بتشبهها…

ولا حتّى قريبة منّها…

صرلي شي أربع إيّام بنيويورك…

وحاسس حالي ما بسوى…

حاسس حالي ولا أهبل…

مش بسّ هيك.. حاسس إنّو نحنا اللّي عايشين بلبنان كلنا هبل…

دخلكن ليش بعد ما رقّمنا البنايات ببيروت…

ليش ما رقّمنا الشوارع…

ليش إذا بدّي دلّ حدن عبيت صديقتي براس بيروت….

لازم إذكر بربر أوكابابجي أوكوستا أوستاربكس أوكاريبو…

أوليناز… أوهارديز أو مكدونالدز أو برغركينغ أو سوكلين؟

ليش ما فينش قلّن شارع 11 عبدالعزيز بناية رقم 320

أو شارع 12 مكحول بناية رقم 6

أو شارع 10 بلس بناية رقم 102 الطابق رقم 3 شمال

ليش كلّ ما بدّي دلّ حدن عبيتي بالنقّاش…

لازم قلّن إنّي ساكن حدّ كنيسة بوجّ ترومبة..

مفرق عليه آرمة مجلّة أجنبيّة… بتفوت فيه بشارع ضيّق مقفي بلا إسم…

 آخر بناية عاليمين؟

ليش الّلبنانيّة بعد ما وصلولا هيدي…

شو هالقدّ بدها شطارة الخبريّة؟

ولاّ إنّو ما منعرف نعدّ تخمين؟

طيّب بركي المجلّة الأجنبيّة سكّرت…

 أو بركي الآرمة وقعت بشي عاصفة هوائية؟

أو بركي برميل سوكلين رجعوا شي 100 متر لورا..

شو بصير ساعتها….

… بيتغيّر عنوان بيتي…؟

بعد كم ساعة منفوت بال 2013…

هيك هيك ما في أشطر منّا بعدّ السنين…

خلّينا نبلّش نعدّ هالبنايات والشوارع…

ونرقمن إذا بتريدو…

وانشاللّه كلّ سنة بضلّ عنوان بيتكن هوّي نفسو….

وم يتغيّر…

إلاّ إذا إنتو قرّرتوا تغيرو بيت مثلاً….

هابّي نيو يير…

إحترماتنا….

Advertisements

هديونا ياه…هديّة

Posted in Writings by johnnyhage on January 23, 2011

خلصنا بقا…… ولك خلصنا بقا…..

لمّا راحوا مضيو إتّفاق الطائف…..

قبض كلّ واحد منّن مبلغ…

بيتراوح بين مليونين و8 ملايين دولار…

 ليوقفوا يتقاتلوا….ويتقاسموا البلد….

ودخيل عرضكن ما حدا يجي ينطّ…

ويقول فلان وفليتنان ما مشيو بالطائف….

لأنّو اللّي ما مشي بالطائف….رجع مشي بالدوحة…..

شو مشي؟…ركض……

وبالدوحة……

لا مليونين ولا تماني…..أكتر بكتير كتير كتير…..

وصارو الجماعة عم يدّشّوا ملايين…..

 

هلّق…..

هيئتن…..هضّموا….وحابّين يرجعوا يعبّوا….

لكن السعوديّة…فهمت اللّعبة….على ما يبدو…..

وقطر…فهمت اللّعبة عالّسريع…..

لأنّو الدوخة اللّي أكلتها بالدوحة….

ما صرلها زمان…..

 

الشعب اللبناني….

كمان فهم اللّعبة…..

بسّ…..حامل حالو غشيم…

ومش فهمان شي من شي…..

 

المشكلة بسيطة….

كلّ البلدان عم بديروا بلدنا…

لأنّو نحنا ما منعرف نديروا…

ببساطة…. لأنّو ما بعمرو كان بلدنا….

 

إستقلالنا…نحنا ما أخدنا…

ولا حاربنا كرمالو…

إجوا هنّي….وهديونا ياه…

هديّة….

هديونا ياه هدّية…عالعيد…

كرمال ساعة اللّي بدن…وبكلّ عيد…

يجو ويلعبوا فيه….

(بلا معنى أكيد)

متل ما يعملوا هلّق….

 

ع فكرا…

ما رح بصير البلد ل “اللّبنانيّي”….

إلأّ إذا أخدنا إستقلالنا بإيدنا…..

 

منستقّل….
من البلدان اللّي براّ…

ومنستقلّ….

من فساد الوزرا والنوّاب اللي الجوّا… كلّن….

 

بقولولي بدّك تاخد موقف….

بدّك تكون مع حدا….

إي لأ….اسمحولي…

ما بدّيش كون مع حدا…

بدّي إنّو ينزل الشعب عالأرض ويقشّن تنيناتن…

 

بس إذا الشعب اللّبناني ما انقبر وانهزّ…..

مش رح نستقل….

إذا ما نزل عالشارع….

وعمل ثورة ضد المعارضة والموالات….سوا…

لأنّو كلنّ كذّابين…وسرّاقين…وعندن “أجندات” خارجيّة….

مش رح نستقل…

 

رح يرجعوا…

من برّا…ومن جوّا….

يلفّولنا ياه هدية…..

ويهدونا الإستقلال….

…عن جديد….

 

من عيد….لعيد…..

 

 

إحترماتنا…

 

صار بدنا إعادة تأهيل

Posted in Writings by johnnyhage on December 11, 2010

الساعة وحدة بعد نص ليل مبارح…..

بلّشنا نحكي عن شو شفنا……

وبقينا عم نحكي للساعة تلاتة و نصّ ع وجّ الضوّ…..

 

حكينا عن الإسرائلييّ…..

وعن إنّو….العمى بقلبن شو وقحين…..

وعن كيف إنّو بعدن قاعدين بفلسطين….

لأ..ومقتنعين إنّو هيدي أرضن كمان…..

وهيئتن مفكرين إنّن باقيين الجماعة…

وعم بفرقوا جنسيّات إسرائيليّ كمان…..

 

 

حكينا عن الفلسطنييّ……

وكيف إنّو منقصمين…

وكيف إنّو عم بحاربوا العالم كلّوا….

لوحدن….

عفواً بمساعدة جامعة الدول العربيّة….

لوحدن يعني….

وفتنا بدباجة إلها أولّ وما إلها آخر…

عن القضيّة الفلسطنيّة…..

وعن إذا عم تتقدّم لقدّام…أوعم ترجع لورا…..

أو إنّو إذا بعدا…ومش عم بتزحزح من محلّها….

 

 

حكينا عن الأميركان…والبريطانيّي…والأوروبيّي….

وعن ألأمم المتّحدة كمان…..

وعن كيف إنّو هنّي داعمين هالإسرائيلييّ…

بشكل متواصل…..ماديّاً…ومعنويّاً…وبطريقة عميا يعني…..

لدرجة صاير هيدا الدعم…صاير بيشبه

نوع من أنواع الهَبَل……

والهبل عم يتزايد مع مرور الزمن عفكرا…

وعم يتفشّى ليعدي غير بلدان كمان….

 

 

 

وحكينا عن العرب……

يا بييّ شو حكينا عن العرب…..

حكينا ولتّينا وبربرنا….

كتيرعن العرب…..

 

بربرنا عن العمى اللّي بقلبنا…..

والعمى اللّي بعيوننا….

والعمى اللّي بذاكرتنا….

والعمى اللّي بجهودنا…

والعمى اللّي بخطاباتنا….

والعمى اللّي ب هبلنا….

وكلّ أنواع العمى اللّي فينا……

 

وعرب مش بسّ يعني أنظمة وحكومات…..

لاه….العمى بقلبنا ك….شعوب….

ما هيّ الشعوب اللّي بتعمل أنظمة وحكومات…..

ولاّ لأ؟

 

 

وبربرنا عن القضيّة الفلسطنيّة

وكيف إنّو هيدي القضيّة…. منّاش قضّية للفلسطينيّة وبسس…..

انتبهوا….هيدي قضيّة عربيّة مسائبة إنّها عأرض فلسطين…..

وهيدي القضيّة الفلسطينيّة…

هيدي منّاش قضيّة إسلاميّة….

كمان انتبهوا…..

هيدي قضيّة إنسانيّة من دون ما يكون الدين إلو دخل فيها…..

 

هيدي يا تقبروني…..قضيّة عالميّة….

 

بسّ مسائبة….إنّو العرب……

نحنا يعني….

حاطيّنا عجنب…. لأنّو مش مسائبة هلّق….

وكلّ ما منحطّها أكتر عجنب…

كلّ ما عم نقضي عالقضيّة أكتر وأكتر….

مسائبة إنّو نحنا العرب….. هلّق معجوقين….

عم نشتري…وعم منبيع……وعم نقبض…..و عم ندفع….

 

 

كلّ هالحكي والديباجة إجا من بعد ما شفنا……

التمرينة الأخيرة لمسرحيّة “عائد إلى حيفا”

بمسرح بابل بالحمرا…

المسرحيّة بتفتح اليوم….. وبتبقى عم تعرض يوميّة ل 19 ديسمبر….

 

“عائد إلى حيفا” هيّي بالأساس رواية لغسّان كنفاني…..وهلّق عم تخرجها لينا أبيض عالمسرح…..

 

 

اتفضلوا….روحوا شوفوها…..

وبسّ تشوفوها….

خبّروني…..

شو رئيكن إنتوا؟….

 

 

ما صار بدنا إعادة تأهيل؟

 

 

إحترماتنا….

%d bloggers like this: