Ihtirametna

مين مشّاها هيدي

Posted in Writings by johnnyhage on December 3, 2012

مين مشّاها هيدي؟… من العصر الحجري يعني؟…

 بالعصر الحجري كان في غصن شجرة ما كان في شي ناتي…

 شو معقولة إنّو كان ادم ناتع كرافات و “بلازر”؟……

 أو إنّو حوّا كانت تتبرّج مثلاً… وأدم لأ…لانو مش من هوايتو التبرجّ كاين؟…

…وحوّا هونيك نهار….جايي وغصن شجرة شاكك بإجرا من ورا… ومن بعدا درّجو الكعب العالي يعني؟…

 

و قصّة هالكعب العالي…  شو قصّة هيدا…هيدا “الشي” العالي؟…….

  ليش ما بتريّحو حالكن وبتريحو إجريكن مش عم بفهم أنا ؟

  شو هالشي اللّي ولا ممكن إنّو ينمشا فيه بالحياة الطبيعية…

 

مين هيدي اللّي ضرب عراسا وقرّرت تمشي ع”قصبة” عهعامود؟…ليش بحتبّو تقاصصو حالكن…….

 شو هالقصاص هيدا…

وبتصير بدّا تهديلك إيدك لتقدر تمشي…

” ويهه إصحا أوقع دخيلك هدّيني”….

.اخصوصي لمنّ يكون في فيلو نزلة شي أو شي طلعة ….

“.يهه…شويّ شويّ….شويّ شويّ…إصحا إزحط”…..

بتصير كلّها لاقية عليك….

ورح تقعد بحضنك عنتفي….

“وييّه….أوعا”…..

العما بقلبك هيني القصّة هيي….

اتفضّلي انقبري اشلحي الكعب……

وإمشي…. وشيلي من قاموسك هيدا بقا…

لشو الكعب؟…

 

وهيدي إذا ما كان بتخاف من المرتفعات كمان…

في عندك كعوبة بيوصلو ل30 سنتي…

إذا وقعت عنّو مشكلة هيدي…

بتعوّر حالها  حالها….

 

“شو أللّه جابركن تلبسو كعب..”

“شو أللّه جابركن تلبسو كعب..”

 

إحترماتنا…

Advertisements

ولوّ قطّشو

Posted in Writings by johnnyhage on November 29, 2012

عم بتساير أنا ويّاها ع كاس نبيذ وصحن شنكليش مع لقمتين طاووق…

وعم خبّرها كيف إنّو الديفيديات اللّي بتشتريهن هييّ من الضاحية …  عم بقطشوا…

والديفيديات اللّي بشتريهن أنا من عند “ريمون” من برج حمّود ما بقطشو ولا شويّ…

بتقوم هيّي بيتغيّر لونا….وبتعبّق….

ب صفي لونا أحمر…من ثمّ أصفر… ومن بعدا أزرق…ومن بعدا أخضر….

مرقت عالألوان كلها أللّه وكيلكن….

وصفّت عم تاخد نفس بصعوبة متل كأنّو رح بتختنق…

ووعم تحكي حكي عم بشرشر منّا سمّ…

بتقلّي….

ليك…أوعك…إيّاك…ثمّ إيّاك… ثمّ إيّاك…

من اليوم ورايح تجيب إسم “ريمون” علسانك…

 

بقبرك…إي بلعن عرضك….واللّه العظيم بنتفك….

واحد خيخا… ما عندو بيضات (عن تحكي عن ريمون هيّي هون)…

 

انبلعت… أنا…

صفّيت أنا عم باخد نفس عميق….

… العما ليّ شو…شو صاير مع ” ريمون ” تخمين؟….أنا سألتها…

 

مش هيدا ” ريمون ” نفسو.. جاوبتني…

 

صاير إشيا مع هونيك ” ريمون” إنت ما بتعرفوا….

فصار عندي عقدي من كلّ حدا إسمو “ريمون” بهالعالم….

 

فإذا بتريد اسمحلي…

ديفيدياتي رح ضلني جيبن من الضاحية… ولوّ قطّشوا…

 

 

إحترماتنا….

كتير بوزيتيف

Posted in Writings by johnnyhage on November 26, 2012

في شي حابب قلّك ياه من فترة…

ومش عارف كيف بدّي…ظبطو…ورستقو..

وقولو بطريقة ما تطلع إنّو سمجة…

 

المشكلة فيكي إنِّك ما بتفهيني أبدأً….

مش على نفس الموجة أنا ويّاكي….

يعني إذا أنا  عال “أف أم”….إنتِ عل “أي أم” بتكوني….

 

المشكلة التاني اللّي فيكي….

إنِك كتير بوزيتيف…..

 متفائلي كتير…

أنا بوزيتيف من وقت للتاني….

بسّ إنتِ…دايماً بوزيتيف…

إيّام بكون عم بقلّك إشيا منّاش منيحة أبداً….

مدري كيف بتقلبيها إنتِ..

وبتصفّي عظيمة…

 

لمّا إجي قلِّك إنّو إنتِ…بتعقدي…..

هيدا ما بيعني إنِّك رائعة…

هيدا يعني إنِّك بتعقدي…اللّي ما بيتعقّد…

هيدا الشي بيعني…

إنّو أنا صفّيت كلني عقد من ورا معاشرتِك…

 

 

لمّا إجي وقلّك إنِّك بتجنّني…

هيدا ما بيعني شي منيح أبداً…

هيدا بيعني إنّك بتجنّني اللّي ولا ممكن إنّو يجنّ…

إذا بدّك يعني … إنتِ من الأسباب…

اللّي عم بيرفعوا نسبة المجانين بالعالم مؤخّراً…

 

لمّا قلّك بتسطلي….

هيدا يعني إنتِ بتسطلي…

بتوقفي وبتطّلعي فييّ متل الموميا…وما بتعودي تتحرّكي…

بتسطّلي….

 

 

ولمّا قلّك تقبريني انشاللّه….

يعني يا ريت بتجي وبتقبريني انشاللّه…

أنا وعم بتنفّس بتقبريني…

كرمال …إرتاح….وإخلص بقا…

 

ولمّا قلِّك إنِّك سلبي….

عكس إيجابي هيدي….

ما فيكي تاخديها بوزيتيف…

ما سلبي يعني نيغاتيف….

 

 

اعرفتي شو قصدي بإنِّك كتير بوزيتيف….

يا ريت بتخفّفي شوي…

يا ريت… يا ريت بتتشائمي شي نتفي…

ليصير في توازن بحياتك….

لأنّو لماّ حياتك تصير كلّها تفائل…..

بتصفّي بتطّير العقل…

…و هيدي كمان.. “بتطيّر العقل”…

مش بالضرورة تكون شي منيح….

 

 

إحترماتنا….

%d bloggers like this: