Ihtirametna

مين مشّاها هيدي

Posted in Writings by johnnyhage on December 3, 2012

مين مشّاها هيدي؟… من العصر الحجري يعني؟…

 بالعصر الحجري كان في غصن شجرة ما كان في شي ناتي…

 شو معقولة إنّو كان ادم ناتع كرافات و “بلازر”؟……

 أو إنّو حوّا كانت تتبرّج مثلاً… وأدم لأ…لانو مش من هوايتو التبرجّ كاين؟…

…وحوّا هونيك نهار….جايي وغصن شجرة شاكك بإجرا من ورا… ومن بعدا درّجو الكعب العالي يعني؟…

 

و قصّة هالكعب العالي…  شو قصّة هيدا…هيدا “الشي” العالي؟…….

  ليش ما بتريّحو حالكن وبتريحو إجريكن مش عم بفهم أنا ؟

  شو هالشي اللّي ولا ممكن إنّو ينمشا فيه بالحياة الطبيعية…

 

مين هيدي اللّي ضرب عراسا وقرّرت تمشي ع”قصبة” عهعامود؟…ليش بحتبّو تقاصصو حالكن…….

 شو هالقصاص هيدا…

وبتصير بدّا تهديلك إيدك لتقدر تمشي…

” ويهه إصحا أوقع دخيلك هدّيني”….

.اخصوصي لمنّ يكون في فيلو نزلة شي أو شي طلعة ….

“.يهه…شويّ شويّ….شويّ شويّ…إصحا إزحط”…..

بتصير كلّها لاقية عليك….

ورح تقعد بحضنك عنتفي….

“وييّه….أوعا”…..

العما بقلبك هيني القصّة هيي….

اتفضّلي انقبري اشلحي الكعب……

وإمشي…. وشيلي من قاموسك هيدا بقا…

لشو الكعب؟…

 

وهيدي إذا ما كان بتخاف من المرتفعات كمان…

في عندك كعوبة بيوصلو ل30 سنتي…

إذا وقعت عنّو مشكلة هيدي…

بتعوّر حالها  حالها….

 

“شو أللّه جابركن تلبسو كعب..”

“شو أللّه جابركن تلبسو كعب..”

 

إحترماتنا…

Advertisements

ليّ هالغموض كلّو؟

Posted in Writings by johnnyhage on November 15, 2012

لمّن كون عم بتحدّث معِك….

بلاحظ عحالي…. إنّو أنا واضح يا إختي…

و… و… دغري بحديثي…

يعني…. لمّن تسأليني سؤال…

بجاوب بطريقة…إنّو….

ما بترك مجال للشكّ…أو للتحليل… أو للتوقّع

….أو للتسائل….أو للتبصير…أو للتخمين..أو لأيّ شي تاني…

يعني بجاوبك… بشو بعرف..

ولمّن بكون ما بعرف….

بقلّك ما بعرف…

لأ..

وبرشدك على حدن ممكن إنّو يكون بيعرف الجواب…

 

إنتِ… غير….

 

إنتِ كلما بجي بسألِك سؤال بسيط…

بيطلعلي جواب… مقعد…

محبوك…

مقعد لدرجة أوقات أنا بتعقّد…

ومحبوك بعبارات ..ما.. مش صحبة أنا ويّاها أبداً يعني…

عبارات متل…

بفتكر….

وبعتقد….

ومفروض….

ومفترض… هيدي منشقّة منّها هي….

ومبدئيّاً….

ويجوز…

وفي إحتمال….

وبركي….

ومعقول……

طيّب مش معقول…..ليّ هيك؟…

 

ليّ هالغموض كلّو…؟

 

ما هوّي…أنا حابب إفهم عليكي شوّي….

بسّ مؤخّراً… مصفّى متل الهبيلة…

ما عم بفهم شي من شي….

مصفّى إنّو … كعيت….

 

إحترماتنا…

الرجّال كذّاب

Posted in Writings by johnnyhage on October 29, 2012

إذا الرجّال كذّاب هوّي لأنّو المراة بتخلّيه يكذّب…

وإذا الرجال كذّابين هوّي لأنّو في نسوان…

 

طيّب أنا كيف ما بدّيش أطلع كذّاب….

 لمّن من لمّن ما إخلق… لحتّى يصير عمري تلاتين سنة…

 بتضلّها إمّي نازلي فييّ أسئلة :

 وين رايح ووين جايي…

 

لمّن إجي إتجوّز، بتجي مرتي وبتنزل فيّ أسئلة…

بتنزل فيي أسئلة من ال 30 سنة لل 60 سنة:

 وين رايح ووين جايي

 

ومن بعد الستنين… بكون فكّرت حالي إنّو ارتحت بركي…

إي لأ… ساعتها بيجو ولادي…

وبالإخصّ بناتي لأنّو الشباب ما بكونوش فاضيين…

 بيكونواعم بيجاوبو نسوانن على إنّو وين رايحين ووين جايين…

فبيجو بناتي وبينزلو فيّي أسئلة إنّو وين رايح ووين جايي…

هيدا اللّي بخلّي الرجال يكذّب….

 الرجّال بكذّب بسّ لأنّو إنتو بتضلّكن مصرّين تسألو هيك أسئلة…

 وبشكل متواصل؟

 

أنا بآمن إنّو ربّنا… عزّ وجلّ…

كان في سبب إنّو خلق آدم قبل حوّا…

ليكو ربّنا خلق آدم قبل حوّا…

بسّ ليعطي مجال لآدم إنّو يحضر حالو نفسياً…

ليجواب على كلّ الأسئلة اللّي بدا تسألو ياهن حوّا لمّا بتخلق….

إي شو بدّو وقت .. بدّو وقت ليخترع الأجوبة…

ولك ما هي إنتو لو كلّ أسئلتكن بيتجاوب…عليها بيقول الواحد…

بسّ…

 

إحترماتنا…

 

%d bloggers like this: