Ihtirametna

عم نسكر عبكرة الصبح

Posted in Writings by johnnyhage on January 7, 2013

مبارح كان نهار أحد بنيوريوك…

تماماً متل ما إنّو كان نهار أحد ببيروت….

هيدا الشي الوحيد المشترك بين التنين…

مع نتفة فرق…

غير إنّو في فرق سبع ساعات بيناتن…

كتير حلوي الفكرة إنّو لمّا العالم ترجع من السهرة بنيويورك….

بتكون العالم عم توعى من النوم ببيروت….

وكتير حلوي الفكرة…

كيف إنّو مبارح كانت طايفة شتي بلبنان مع فياضانات وكوارث وخبار…

والشمس شارقة بنيويوك….مع نسمة هوا شتائيّة بتطوّل العمر…

وبتعرفو شو حلو كمان؟….

حلو كيف إنّو العالم بنيويورك،

بالويكأند…بيقرطو كاس مع الترويقة…

واللّه…

بينزلو ياخدو “برانش” شي ساعة 11 الصبح…..

وبيعقّو معها مشروب إسمو “ميموزا”، هيدا بيجي شامبانيا مع عصير ليمون….

أو بعقّو  معها “بلودي ميري”…. هيدا بيجي فودكا مع عصير بندورة وشويّة بهارات….

أنا وعم باخد برانش مع ميموزا مبارح…عبكرة الصبح نهار أحد….

والشمس شارقة…ولا أشرق….

بيرنّ تيليفوني ليتفضّل ويخبّرني…

إنّو وصلّي إيمايل شغل من بيروت….

العما…

ما مبسوطين عم نسكر كاينين عبكرة الصبح…

بعدان طنّ براسي سؤال …

بكون ممنونكن إذا بتجاوبوني عليه:

ليش مسموح يجي الشغل ويقرطني لمنّ كون عم باخد كاس،

ومش مسموح إنّي أقرط كاس لمّن كون عم بشتغل؟

هات لشوف… فسرولي…

إحترماتنا….

Advertisements

هيدا البلد بجنّن

Posted in Writings by johnnyhage on March 24, 2012
هيدا البلد بجنّن…
بجنّن بكلّ ما للكلمة من معنى….
يعني إذا بتجيبو شي إنسان عقلو سليم…
وبتِشلَحوه بهالبلد أكتر من شهر… ببطّل عقلو سليم…
بجنّ…
ب روح فيها….
والسبب الرئيسي بكون…
مفعول البلد عليه….
وبما إنّو سكّان هيدا البلد….
صار إلهن أكتر من شهر ساكنينو….
صفّينا كلنا مجانين….
بايعينا…
تفوه علينا….
صفّينا عايشين بهوا ملوّث….
حمّام ومقطوعة مَيتو….
تفوه علينا….
مقطوعة مَيتو….
ومش مضايقنا هيدا الشي أبداً…
لأ والأنكا…
إنّو تعوّضنا عالريحة الكريهة….
تفوه علينا….
والأنكا أكتر من هيك…
إنّو لمّن تروح هيدي الريحة…
أوقات منشتقلها…
تفوه علينا….
طيّب إنّو معقولي أطنان لحمة وسمك ودجاج مضروبة على حيلها؟…
والوزراء عم يتناقفوا المسؤوليّات وعم بيزتّوها عبعض…
ولاّ إنّو معقولة أدوية على حيلها مضروبة كمان؟….
والنوّاب عم يتناقفوا المسؤوليّات ويزتّوها عبعض…
طيّب هيدا اللّي أكل لحمة مضروبة…
والتعن حريمو….
وراح يشتري دوا…
وطلعلو دوا مضروب…
شو بيعمل…؟
بيعمل تحتو ليش شو فيه يعمل غير هيك….
وهيدي مش أولّ مرّة بتصير….
صايرا من قبل…ورح بتصير بالمستقبل أكيد….
 مع هيك طقم سياسي معفّن…
أكيد رح بتصير…
لحمة مضروبة مع دوا مضروب….
صفّا الشعب مضروب عراسو…ومضروب عقلبو…
صفّا الشعب معفّن…متمسح….مجنون…
واللّه شايفين لو نحنا ببلد طبيعي…
كانو النواب والوزرا ما بيسترجو يتركو بيوتهن بهيك وضع…
لو نحنا ببلد طبيعي…
كان الشعب نتّفهن واحد واحد….
لو نحنا ببلد طبيعي…
كانو بيستحو يطلعو عالشاشات بقا…
كانو بيختفو….
كانو بيستقيلو…..
لكن للأسف….
شائت الظروف إنّو ننكون ببلد مجنون….
بلد مجنون…وكتّر خير أللّه…دايرينو مجانين….
والشعب….. آخ خ خ خ خ…
تفوه علينا…..
إحترماتنا…

انفصام بالديليفري

Posted in Writings by johnnyhage on February 4, 2012

 

كنت طالب ديليفري أنا وزميلتي بالشغل….

صرلي شي نصّ ساعة طالبها….

وكان المفروض إنّو “الديليفيري بوي”….صار واصل….

 

تأخّر…

تأخّر منيح…

 

اتّصلت عالمطعم وقلتلّن إنّو الديليفري بوي…

تأخّر…

تأخّر منيح…

 

قالولي:  

ييه..لأ كيف…؟…

وصّل الديليفري لعندك من نصّ ساعة…

واستلمتو الديليفري منّو… ودفعتولو كمان…

 

العما…ولا كيف استلمناها منّو ودفعنالو؟

 

صرت عم فكّر بيني وبين حالي…

إنّو  بركي… أنا معي إنفصام بالشخصيّة يمكن…

وهيدا الكاراكتير التاني إللي جواتي…

هوّي اللّي استلم الأكل..ودفع… وأكل..وأنا ما معي خبر….

 

بعدان اتبيّن إنّو الديليفري بوي وصّل الأكل عمحّل تاني…

شبقناهن بهدلي للمطعم….وعصّبنا..وفضّينا اللّي بقلبنا…ومشي الحال…

 

بعد شي نصّ ساعة تقريباً….

بيوصلّي تلفون من هيدي اللّي استلمت الأكل …

لأنّو هيئتو رقم تيليفوني مكتوب عالفاتورة….

عم بتتلفن صديقتنا…ومزعوجة..وفي غصّة بقلبها…

وعم تطلب منّي روح آخد أكلاتي…وإدفعلها حقّن…

لأنّو هييّ استلمتن من الديليفري بوي بالغلط…ودفعت بالغلط..

وإنّو هيّي كانت مفكرها  حالها طلبت دلفري لكن طلعت غلطاني….

 

حلو واللّه….

 

ف…أنا…هون….توقّعت إنّو هيدي…صديقتنا…

 معها إنفصام بالشخصيّة…ومش هيّي اللّي استلمت الأكل….

…لكن هيدا الكاراكتير التاني إللي جواتها…

هوّي اللّي مقبور عقلبو…استلم الأكل..ودفع… وما حطّها بالجو….

 

 

احترماتنا…

 

%d bloggers like this: