لازم قلّها

ليكو…أنا شخص كتير دغري….

بستوعب دغري….وبتعلّم دغري…..
وبفكّر دغري…..وبحكي دغري…

بسّ لمّا تجي الشغلي للمشاعر…..
ولمّا بنحطّ بموقف لازم عبّر فيه عن مشاعري….
دغري… بتلّت….

بصير واقف قدّامها للمحروسة….
وعارف شو بدّي قلّها……
وهيّي ناطرة…
لكنّي…ما بقلّها……
لأ…

مع إنّو كلماتي بكون محضّرهن….
وموقّفهن عراس لساني…..
وناطر اللّحظة المناسبة…
وهييّ صرلها فترة ناطرتها لهاللّحظة كمان…
لكن لأ…..
ما بقلّها….

…هيّي دايماً بتقلّي…..

…لتحفظ “ماء الوجه” يعني…
بتقلّي شي مختلف تماماً…
وما إلو علاقة…..عن شو أنا كان بدّي قلّها….

إي شو …
طيب معها حقّ….
ما بيضيع أللّه تبعولها هيّي كمان….

إنّو يا أمّا…أبيض…يا أمّا أسود…..
يا أمّا في شي…..يا أمّا ما في شي….

إي بسّ….
إذا في شي….لازم إبقى انا قوّي قلبي… وقلّها…..
وإلاّاااااا…..

 

إحتراماتنا…..

ما هيّ مداورة بتصير

هيدي أوّل مرّة بكتب فيها بال2010….
ويعني للصراحة….
كنت عم عدّ لل 2010 قبل ما إكتب….

أنا كنت ناطر ينزل عليّي الوحي…
لأعرف شو بدّي إكتب…

لكن بما إنّو بعد ما نزل لهلّق….
وبما إنّو إجت صديقتي وقالتلي:
اتفضّل انقبر إكتب شي….
حسّيت إنّو…
معها حقّ…لازم إتفضّل أنا..
وإنقبر إكتب شي…..

هيّي صديقتي…وأصدقائي اللّي بيقروا شو بكتب..
مش رح يفهمو…إذا بخبرّن عن خبريّة الوحي….
وكيف إنّي بعدني ناطروا ينزل بال2010….
لأ…
هنّي ما بيفهموا هيك…
هنّي ما خصّن بالوحي تبعولي من الأساس؟…

هات لنتّفق عشغلة…
هيدا الوحي تبعولي وأنا وحدي مسؤول عنّو….
بشكل كامل غير جزئي….

مظبوط إنّي آخر مرّة شفتوا كان بال 2009….
لكن بكرا ببيّن…..
إنّو وين بدّوا يروح يعني؟….

إذا راح عند غيري…رح يرجع لعندي…..
بدّو يرجع…ليقدر غيري ينطر الوحي كمان…
ما هيّ مداورة بتصير….

إحترماتنا….

(ملاحظة: هوّي إجا الوحي لقدرت أطلع بهيدا الشي أنا).