روح افركها
دخيل عرضك…
عملّي خدمة وما بقى تقلّي إنّو بكرا بيمشي الحال….
عملّي خدمة وما بقى اتقلّي بكرا بتنفرج…أو بكرا بتروق…
أو بكرا بتتغيّر الأوضاع….
دخيل عرضك …حاج بقى تعطيني أمل….
ولك حاج بقى تعطيني أمل…
خلّيلك ياه يا خيّي….
وكلّ ما تحس إنّو في عندك فائض أمل….
ابلعوا……أوعك اتضهرو لبرّا….
أنا من جهتي…
اتعوّدت إنّو عيش من دون أمل…
وما..منّاش منيحة…. إنّو تجي واتغيّرلي هالعادة….
لأنّو إذا منحطّ كلّ شي عجنب….ومنجي منحكي بصراحة….
هيدا البلد…بيناتنا…..ما في منّو أمل…..
لشو جايي وبدّك تبلفني وتغيّرلي إيماني هلّق….
روح افركا…..
وبلا قرط حكي عالفاضي….
إحترماتنا….
مسيرة…وبيضا
مبارح كان في المسيرة البيضا
مع السلام… وضد 8 و14 آذار بساحة الشهدا….
كان في شي جوّاتي عم بشدّني لإنزل…
لكن ما نزلت… قمت لبدت… واقعدت…
وضلّيت لابد مطرح ما أنا….
يا خيّي جيت وافتكرّت…. إنّو..
طيب شو بدّي إنزل أعمل….
إنّو ما دايماً ممنزل…. ومنسلّم عالشباب….
ومنعمل جمعة 50 أو 100 شخص…
إيّام منوصل لل 500 وإيّام لل 1000…
بسّ ما هودي هنّي….
صرنا منعرفن كلّن يعني..
وبكلّ مناسبة منتلاقى معن نفسن….
و…هيّانا… هودي نحنا…ما فيش غيرنا…
وكلّ مرّة منطلع بشاعارات خلاّقة…
هيّي أحلا شي الشعارات بيناتنا….
لكن وين النتيجة….ما في نتيجة…
النتيجة هيّ 30 ثانية بالأخبار…
وصورة برافع صفحة بالجريدة…إذا طلعت…
مبارح…كنت حابب أنا إنزل …
عالمسيرة البيضا….
وعم فكّر إنّو قد ما تكون بيضا….
واللّه بكرا بيقلوها…
جماعة 8 و 14 آذار….
من دون ما يدري أحد….
إذا ما قليوها….
بكرا بيجو ويسلقوها سلق….
هيدي إذا ما عملوها عجّة….
ما هني بدّن عجّة من غيمة…
إحترماتنا…
Ihtirametna احترماتنا 
1 comment