Ihtirametna

شايفين لو كنت قادر إكتب؟

Posted in Writings by johnnyhage on June 27, 2010

بلِش المونديال…..من 18 نهار…..

بلّش المونديال……

وأنا بعد مش كاتب شي…..

مش كاتب….

…..لأنّي مقبور عقلبي…..

كنت غاطس غطسة لئيمة بالشغل …

لا بتفهم…..

ولا بترحم….

ولا بتخلّي حدا يحلّل ولا يفكّر….

شايفين لو كنت قادر إكتب؟….

كنت كتبت عن الفوفوزيلاّ……

هيدا الزمّور اللّي بينخر الدينين…..

وضاجج أفريقيا كلّها سوا بكاس العالم……

كنت كتبت عن اللّبنانيّي…..

كيف إنّو عايشينا عالآخر….

وكيف إنّو كلّ ليلة….

بتلاقيهن عالطرقات….

عم يشفّطوا بالسيّارات…ويزمّروا…ويعيّطوا…..

ويرفرفوا أعلام بلاد غيرن….

يعني أنا أكيد إنوّ….

لو لبنان فايت بالمونديال….

ما كانش عاشوها هيك….

لأ…وفي ناس مزعجين…

لدرجة إنّو يا محلا الفوفوزيلا….ونخيرها…..

لدرجة إنّو بفوتوا بمشكل خبيط ولبيد وتكسير…

وبينسوا إنّو هيدي كلّها لعبة….

هيدي….لعبة فوتبول….

شايفين لو كنت قادر إكتب؟….

كنت كتبت إنّو أنا بشجّع الطليان بقوّة….

وكنت…..كتبت بعد عشرإيّام تماماً…..

كيف إنّو إيطاليا…

جرّست حالها…وجرّستنا بقوّة…..

وطلعوا من الدور الأوّل من المونديال…..

ورجعوا عإيطاليا….

ياكلو سباغيتّي…

هلّق افضيت…..

والشغل صفّا خفيف…ونضيف…..

ف…ألله يستركن من كتاباتي يا جماعة…..

إحترماتنا….

14716800 دقيقة

Posted in Writings by johnnyhage on June 8, 2010

اليوم عيد ميلادي

 

يعني اليوم بصير إلي 28 سنة ….

مفتّح عيوني عهالحياة…..

 

تمانة وعشرين سنة….

إنتّو عم تستوعبوا شو هيّي ال 28 سنة…..

 

يعني 28 عيد ميلاد……

 

وبين كلّ عيد ميلاد وعيد ميلاد…..

في 365 نهار…..

يعني 8760 ساعة….

يعني 525600 دقيقة بالسنة…..

يعني بهال 28 سنة…..

صرلي 14716800 دقيقة عم بتنفّس…..

 

أربعتشر مليون وسبعميّة وستّعشرألف وتمان ميّة دقيقة….

فقط لا غير…..عم بتنفّس…

 

ولمّا منعدّن بالدقايق…

غيرعن لمّا منعدّن بالسنين…..

 لمّا منعدّن بالدقايق…

منعرف قدّيش هنّي كتار…..

ومهمّين…..

 

 

بسّ في شغلة….

هودي…مش كلّن أنا كنت واعي عليهن….

ومش كلّن….كنت قادرإنّو إتصرّف فيهم متل ما بدّي….

لأنّو بإيّام الطفولة……

القرار مش أنا باخدو…القرار بتاخدو العالم….

اللّي ماسكيني بإيدي….

 

بسّ هلّق…..

وبعد 28 سنة…..

اتغيّرت المعادلة….

 

هلّق

فهمت…إنّو كلّ سنة…..

في عندي 525600 دقيقة…..

وهودي أنا بتحمّل مسؤوليّتهن….

إنتو شايفين ملاّ مسؤوليّة…..

 

 

هلّق فهمت….

إنّو الحياة مش لازم انعيشها بالسنين…..

لازم انعيشها بالدقايق…..

 

وبهال 120 دقيقة اللّي جاية….

أنا…صار لازملي شي  كم كاس نبيد….

 

 

إحترماتنا….

 

أنا واحد نويريستاني Nowheristani

Posted in Writings by johnnyhage on June 6, 2010

في شي مرّة فكّرتو…..

كيف إنّو الإنسان….شو مفظّع بهالعالم؟….

شي مرّة خطر عبالكن إنّو تستفسروا….

ليش ت… لبنان صغبر بالحجم…..

والصين مثلاً…ماشالله عليها شو عملاقة؟….

 

شي مرّة سألتو حالكن كيف ركبت قصّة

البلدان…والحدود….والجنسيّات…..

والقوميّات الوطنيّة….والتقصيمات الإقتصاديّة….

وتفلسف الشعوب….والقوانين اللّي ما بتنطاق…..

وتعصّب الأديان… واللّغات….والألوان…..وإلخ…وإلخ…وإلخ

أوف ف ف ف ف ف ……

شي مرّة سألتو حالكن…..؟

 

وشي مرّة فكّرتوا….إنّو هودي كلن…..

نحنا…فبركناهن….وركّبناهن…

ونزّلنا أللّه عالأرض…. وبإسموا….قدّسناهن…….؟

 

واللّي لاحظتوا….إنّوالحياة  فيها تخبيص كتير يا خيّي….

خابصة….

مش راكبة…..

وين مكان مش راكبة…

بدّها إعادة تأهيل جزريّة…..

 

من اوّل ما خلقت هالبشريّة…..

وهنّي عم بناشدوا بالسلام….. وعم يشتغلوا للسلام….

لكن…أفيش سلام…

بهيك تركيبة….أفيش سلام…

بهيك تركيبة….ما منسمع إلاّ “العوض بسلامتكن”….

 

إي طيّب…..

أنا حابب أطلع منّا هالحركات بقا….

وحابب إرجع فكّر…مع العالم اللّي بفكروا متلي ….

بكلّ هالمواضيع…والأسس….والمسلّمات….

وحابب بكلّ فخر….وإعتزاز……

وإصرار….وثقة بالنفس……

إعلن…..يا جماعة…. إنّو….

أنا واحد نويريستاني Nowheristani…….

 

واحد نويريستاني….

لأنّو النويريستانيّي…. كتار….

ومتواجدين بكتير محّلات…..

بما فيهن…لبنان…..

وأنا احد منّن….

ويمكن……إنتو نويريستانيّي……

لكن بعدكن مش عارفين…..

 

يللّي ما بيعرف شو هيّي نويريستان…..

اتفضّلوا اتعرّفوا…وزوروا هيدا الموقع الإليكتروني….

http://www.nowheristan.org/

ومن بعد ما تتعرّفوا….

وإذا كنتوا  بالغلط…أو عن قصد….

عم بتبتسموا…أو تضحّكوا…..

أو تمزحوا أو تنكتوا عالموضوع…..

اتفضّلوا شدّوا حالكن شويّ….

لأنوّ أنا وكلّ النويريستانييّ بهالعالم….

مش عم نمزح…..

 

 

إحترماتنا….

%d bloggers like this: