كتير عم بركض

مبارح لاحظت إنّي كتير عم بركض…..
عم بركض لدرجة إنّي صفّيت عم بلهت من كترة الرّكض….

لكن المشكة إنّو ما فيني خفّف….
ولا فيني وقّف….
لأنّو أنا مش عم بركض محبّةً بالركض….
ولا إنّو عم بركض بهدف اللّياقة الجسديّة….
ولا حتّى للراحة النفسيّة…..
أنا عم بركض…..
لضلني ملحّق سيطر على شو عم بيصير بحاتي….

لأنّو آخر فترة…
حياتي مصفّاية اخبار ومشاريع وحركات…..
وبشكل مكثّف…
ومصفّى أنا… إذا ما بركض…
ما بلحّقلها….

فضروري ضلني عم بركض…
لأعرف حياتي وين آخدتني…..

إحترماتنا…

كتّر خير أللّه مليون مرّة….

كتّر خير ألله…….

كتّر خير أللّه … ألف مرّة….
لا…بل مليون مرّة……..
كتّر خير أللّه …مليون مرّة…..إنّي منيح بالحسابات……

الحسابات شغلة عظيمة….. يا خيّي…..
اتخايلو…..إنّو كلّ يوم…..أنا
بدّي إحسب كم ساعة لازم نام…..
وبدّي إحسب كم ساعة لازم قوم…..

بدّي إحسب…. أيا ساعة لازم إترك البيت…
وأيا ساعة لازم أوصل عالشغل….
وإذا في عجقة…..لازم كمان إحسب….حساب العجقة…..

كلّ يوم….لازم إحسب شو بترّوق… وشو بتغدّا…وشو بتعشّا…
ليقدر معاشي يكفّيني لآخر الشهر…..
وإذا لقيت إنّو العمليّة مزروكة…
لازم إدرسها مظبوط…
وإحسب أيا وقعة…لازم قفّي بالنهار….

لازم كمان إحسب حساب اللّي ما بينحسب…..
هيدي بحال لسمحالله…
صار معي شي منّو محسوب بالحسبان…..

وإذا شي نهار… حدن غلّط بحقّي…
لازم عالطّاير….إحسب إذا بسامحو…
أو…..إحسب أللّه ما خلقو مثلاً….

هيدي بعض الأمثلة….
عن قدّيش الحسابات مهمّة بحياتنا….
هيدي بعض الأمثلة…لأنّو ما فيني عدّها كلّها…
ما فيني عدّها كلّها…
لأنّو إذا حساباتي مظبوطة….
هيكي أمثلة لا تُحصى ولا تُعَدّ….

فكتّر خير ألله…….
…مليون مرّة…..
إنّي منيح بالحسابات……

إحترماتنا…

إستقلال مين….وإستقلال كيف

مبارح كان عيد الإستقلال….
وكلّ المحلاّت كانت مسكّرة…
قال…..لتعيّد…..إحتفالاً….

وإنتَ….إذا بتجي بتمسك ولد…..
عمرو خمس سنين……
وبتحكي معو سياسي……

“لأنّو عنّا بلبنان…
فيك تحكي مع إبن خمس سنين…سياسي…..
لأنّو بكون متابع أكتر منّك….
…وملتزم أكتر منّك…..
وبيعرف الشاردي والواردي…..
إنت أوقات…بيكون عندك شغل …فما بتفضى….
لكن هوّي لأ…..هوّي متفرّغ سياسيّاً……”

إي…إذا بتجي بتحكي معو……
بيقدر يشرحلك…
وبالتفاصيل الدقيقة…..
كيف إنّو…..
كلّ طايفة عنّا بلبنان….لأيّ بلد بتميل…..
وكيف إنّو…
كلّ حزب سياسي عنّا….لأيّ بلد تابع…..

فإذا بتريدو…..حدا يشرحلي…….
بأيّ عيد إستقلال…..نحنا عم نحتفل….
وما في عنا ولا طايفة…
وما في عنّا ولا حزب….
عن جدّ…مستقلّ……

خود بقا…..فسّرلي…
إستقلال مين….وإستقلال كيف؟

 

إحترماتنا…