Ihtirametna

أنا وراجع عالبيت

Posted in Writings by johnnyhage on February 24, 2010

مبارح أنا وراجع عالبيت من عشيّي…….
بالسيّارة ….كاين عم سوق……..
اتذكّرتها……..

ما بعرف ليش….طلعت عبالي…..فا….
اتذكّرتها…… 

امسكت التيليفون…… وبعتلها رسالة……..
وانطرت…….

ما ردّت……..

 

وصلت عالبيت…..

 

ارجعت…..

 

امسكت التيليفون…..وبعتّلها رسالة تانيّة…..
وانطرت……

ماردّت……

 

حطّيت التيليفون عجنب…….

 

امسكت كتاب…وبلشت إقرا وإتثقّف……

بعد شويّ…….ردّت……..

 

امسكت التيليفون…..اقريت الرسالة…….
ابتسمْت…….
بسرعة ردّيتلها……
ونطرت ترجع اتردّلي…….

ما ردّت…….
ارجعت امسكت التيليفون…… وبعتلها رسالي تاني……
وكنت ناطر اتردلّي…..

 

بتقوم…وبتّلفن……

 

بسكّر بوّجها……

 

برجع دغري بتلفنلا……

وعارف إنّو هلّق رح بتردّ…

وعارف إنّو بعد كم ثانية رح إسمع صوتها……

 

دق التيليفون عندها…..

 

ودقّ قلبي عندي…….

 

و…

 

احتراماتنا…….

Advertisements

كان صرلي سنتين ناسي

Posted in Writings by johnnyhage on February 13, 2010

الليلة….ليلة عيد العشّاق….
والليلة….ليلة ذكرى استشهاد الرئيس رفيق الحريري….
واللّيلة…لازم إكتب….

رح إكتب …. إنّو نحنا قابضين الحياة كتير جدّ….
رح إكتب …. إنّو في كتير زعران بالعالم أكتر من ما في أوادم….
رح إكتب….. إنّو في كتير ناس بتعبد المصاري اكتر من ما بتعبد أللهّ…..

رح إكتب….. إنّو كلّ شي بروح وبيجي….ما عدا الإنسان…
الإنسان لمّا يروح ….
ما بعود يجي……

رح إكتب….إنّو الحبّ…إذا كان موجود……لونو مش أحمر….وشكلو منّو مدوّر..
وما بيشبه القلب…..ولا حتّى بينباع بالمحلات…..
الحبّ ما إلو لون….ولا إلو شكل…الحب ما بينشرا….

رح إكتب…. إنّو الحياة أصلاً…رواء….فاضية….بسيطة….حلوي….
لكن نحنا….
مننعجق…منعجقها… منعقّدها….. مننزعها…..

الليلة…..قاعد كنت… وعم بحضر تيليفيزيون…..
وكان صرلي….شي سنتين…..مش مدّوروا…..
أوّل ما دورتوا…..
اتذكرّت….
كان صرلي سنتين ناسي…..
لكن للأسف …الليلة اتذكّرت….

إحترماتنا…..

ما في حدا

Posted in Writings by johnnyhage on February 1, 2010

أوفف شو في عجقة…..

شو في صريخ…وعييط….. وجعير……
شو في ركض… ومواعيد…وواجبات…..
شو في ناس….وحجار…. وبنايات……
وشو في حُمرا … وماكياج… وماسكات…..

أوفف…

شو في تمثيل…. وتنظير… ومسرحيّات…..
شو في لتلتة…..ومظاهر….وخبريّات…

شو في تصنّع….. وتكبّر…..وشوفة حال….
وشو في تياب…ومحن…..ولفّ…ودوران…..

شو في حركات…ومحرّكات… وسيّارات….
وشو في قوانين…وأنظمة…ومحرّمات….

وبتجي إمّي ويتقلّي بكلّ طيبة قلب:
“لازم تتجوّز يا صبي…
لازم تلاقي شي بنت بتناسبك بقا….
وتِركز….”

طيّب….عال…
أنا يا إمّي قبلان إركز…..
بسّ فيكي تخبريني…
كيف إنّو ممكن لاقي….
شي بنت تناسبني…
….بكلّ هالعجقة؟…..

ما هيّي لو العجقة معقولة…بقول الواحد….
بسّ مش معقولة…

ومش معقولة كمان…
لاقي البنت اللّي بفكركك منّها إنتِ…. هيك بسهولة….
ما هيّي البنت اللّي بتناسبني…. بتكره العجقة…
وأنا أكيد إنّها من ورا العجقة…
هربِت…. من زمان هربِـت….

ف….لا تندهي يا أمّي…لأنّو….ما في حدا………

إحترماتنا….

%d bloggers like this: