ثورة مباركة

بالفيديو

كل مرّة كنت اتمنّى إنّو يصير في ثورة بلبنان…
كنت اطلع غلطان…
كنت انفئس… وقول العما بقلبنا كيف إنّو نحنا اللّبنانية
قاعدين عخازوق صممّولنا ياه الزعما والنوّاب اللّي انتخبناهن..
طيب ما العما بقلبنا….
هنّي اعكاريت …. ونحنا شعب صايع وضايع…

هلّق حظّي أنا شخصيا طلع بيفلق الصخر.. وصرلي فرصة إنّو قوم عن هالخاوزق… وافركها…
ففركتها و فل ّيت من البلد…
إي بس أصحابي… وعيلتي… وأهل بلدي بعدن قاعدين عالخازوق….
لأّ.. واتبيّنلي… إنّو كلّ ما بيجو بيتعوّدوا عالخازوق…ويشدّو عحالن ويحاولو يكفّو حياتن بشي طريقة عالخازوق..
بيجو الزعما… وبيفظعو زيادي… وكيف بدّي قلكن…من وقت للتاني… بيحوصوا…وبيجوا وبيبرو الخازوق زيادة… بسنّولو راسو… بروسّو…

ويبدو إنّو هلّق روّسو لدرجي… ما بقا ينقعد عليّ…
صفّى الحلّ الوحيد… إنّو يطير هالخازوق… ويطيروا النوّاب… ويطيروا الزعما…

#ليش_نازل _تتظاهر… لأنّو ما بقا بينقعد عالخازوق…
ولو إنّي بالغربة عم نظّر عليكن من بعيد…
#ليش_نازل _تتظاهر… تما تصير إنت قاعد حدّي بالغربة كمان…
وليكو… اذا ما طار الخازوق… رح نرجع متل الشاطرين نقعد عليه..

فاتّكلو عألله… وثورة مباركة…
احترماتنا…

عزلو يا جماعة

قمت عزّلت البيت اليوم…

تعبت… لأنّو جديدة عليي هيدي….

 

لمن كنت عايش بلبنان….

هيك شغلات ما كنت فكّر فيها…

عزّل البيت…

 

هيّي لأنّو العقلية اللبنانية زفت من هالناحية…

منّاش معوّدتنا عهيك شغلات…

عالم اتّكالية اطلعنا… خصوصي الشباب والرجال…

عصغر… منتّكل عإمياتنا….

وعكبر لمن نطيلع مصاري شوية… منتّكل ععالم تانيي مندفعلها لتجي تعزّل جيّتنا…

 

إنتو عارفين إنّو لماّ الواحد يعزّل جيتو… بيصير يجوي أقل؟

مش بسّ بتصير تجوي أقل…بتصير تنضّف أكتر كمان…

وبتصير كلّ ما ينجوي البيت.. أو كل ما تطلع غبرة مثلاّ…

بتنفئس….

وبتصفي إنّو لأ… ما بيصير هيك…

 

باليابان… في حصّة بالمدرسة بينضفوا فيها الطلاب صفوفن وحمّماتن…

بتتخايلو شو يعني….

يعني هيدا اللي بيتعلم ينضف عصغر… رح بيصفي عم بنضف عكبر….

منو معوّد صار… مش رح يتعب متل حضرة جنابي…

ومش بس رح  ينضف مدرستو… رح بينضف بيتو …وحيّو…ومدينتو العايش فيها كمان…

 

رح بيصير إذا إجا وزير لعندو وقلّو بدنا نعمل مطمر بالمدينة…

رح ينفئس….ويصفي إنّو لأ… ما بيصير هيك…

رح بتصفي علاقتو مع الزبالة حميمة…

ورح يتعلّم يحترمها… ويفرزها… ويعيد تأهيلها ليرجع يستعملها…

 

ما هوّي إذا اتعودّ ينضّف عصغر… في ينضّف كلّ شي عكبر…

ما الزبالة بتجي من العالم هيّي…

جييّ زبالة… وعيشي زبالة… وقرارات زبالة.. وفي عالم زبالة كمان….

ولا لأ؟…

 

إحترماتنا…

إحترماتنا…من هونيك مدينة بكندا…

Mission Impossible Lebanon ميشون إمبوسبل ليبانون

11 نوفيمبر جايي لعنّا الماراتون….
ورح ينزلو هالخليقة… من كلّ حدبٍ وصوب…

يشاركو…

 

هلّق تلات ارباع العالم مش همّها إنّو تربح….

همّا تشارك….

أصلاً ليش نحنا في شي ما منحبّ نشارك فيه؟…

بدنا نشارك…

منحبّ نشارك بكّل شي….

نحنا ربّ المشاركة…

المشاركة… إذا خلقت… خلقت لقلنا…

 

نحنا… منحبّ نشارك لننبسط….

لأنّو ما في إشيا كتير بتبسط بهالبلد عادةً….

ومنحبّ نشارك…لنوجّه رسالة للمجتمع الدولي….

إنّو نحنا شعب واحد، ومتكاتف، ومسالم، ومتحضّر

وبحبّ الحياة. ولا la vie en rose.

 

منحبّ نبلفن يعني…

 

 

بينزلوا السياسيّي والفنّانين

على منصّة ال VIP… وبيقعدو يتضحّكو… ويتسايرو…

 ويكذبو عبعض وعالعالم…

وبكونوا هنّي من جوّا عم ببخوّا سم ماراتوني…متواصل…

 

ولا… بتعرفوا إنّو الماراتون الرئيسي مساحتو 42 كلم ونكعة….

وبتعرفوا إنّو اللي لازم يربح… لازم يقطع هودي ال42 كلم والنكعة…

والنكعة قبل ال 42… ؟

ومش بسّ هيك… لازم يجيب أفضل وقت كمان….

 

إي هيدي ما بتزبط عنّا ….

عناّ لازم يعدلو قانون الماراتون….

كلّ حدا بيخلص ال 42 كلم…

لازم يربح تلقائيّاً…

 

خيّي بتعرف شو 42 كلم…

42 كلم يعني متل بيروت وعمشيت…

ول يللّي ما بيعرف عمشيت وين بتصير…

عمشيت بتصير بين جبيل والبترون….

إي بتعرفوا شو يعني…

 

يعني قدّيش بدّو يكون حظّو حلو هيدا…

ليركض 42 كلم ونكعة…

من دون ما يطلعلو شي…

 إنفجار عالطريق…

أو شي قنّاص…

أو شي حدن يخطفو ويطالب أهلو بفدية..

أو شي جناح عسكري لشي عيلة لبنانيّة بدّها “تستضيف” الركّيضة…

أو شي منيك زهئان بدّوا يتسلاّ…

أو حدن من فتح الإسلام لاطيلو عالطريق… هودي اللّي هربوا من حبس رومية من كم شهر… قليلة هودي؟

 

هيدي إذا كانت الطرقات أصلاً فاتحة وما فيلو شي قرطة جاية عبالها تنزل تولّع دواليب عالطرقات…

 

هيدا اللّي عم يركض…

والله لازم يكون حظّو بيفلق الصخر…

ليوصل عخطّ النهاية…

بيناتنا…قليلة الريسك اللّي غاطس فيه…

 

لمّن تاخد هيك ريسك…

ما بيعود إلّو أهميّة الوقت…

المهمّ توصل…مش مهمّ أيا ساعة بتوصل…

 

هيدا الماراتون بلبنان… أنا برأيي لازم يغيرولو إسمو…

لازم يصير إسمو سي متل “ميشون إمبوسبل ليبانون”Mission Impossible Lebanon مثلاً…

وبيوجّهوا المشتركين إنّو وكلّ واحد حابب يشارك…

 المفروض فيه…ضروري… إنّو يودّع أهلوا قبل بليلة…

وضروري يشوف المحامي..ليكتب وصيتو هوّي ويّاه…

خصوصي إذا في عيلة بضهرو…..

 

إي شو… فقكرين المشاركة هالقد هينة…

شاركو لئلكن…

 

إحترماتنا…