نتفة هوا زيادة

كنّا ساردينا مبارح عشيّي…

بقهوة من قهاوي الحمرا…عشارع مقدسي….

وعم نشرب كاس ويسكي….

وعم نسمع موسيقى بتلفت النظر…وبتلفت السمع كمان….

 

حلوي كتير الموسيقى كانت مبارح….

 

وعم نتحدثّ ….

وفي نسمة هوا كانت عم تضرب عالرصيف….

مطرح ما قاعدين….

ومع كلّ عجقة الحمرا…وزماميرها…ومماحينا..

حسّينا بهدوء وسكون واسترخاء….

 

وكان الطقس حلو كمان….

قلتلّوا…. لشبّ صديقي كان معنا…شو حاسس أنا…..

قلتلّو… إنّو الطقس جدّاً ظابط….وقلتلو إنّو هيدا أجمل طقس بالنسبة إلي….

وافق معي هوّي…وقلّي إنّو هيدا أجمل طقس بالنسبة قلوا كمان…. لكن مع نتفة هوا زيادي….

 

هون اختلفنا…

ما في يقول هيك…

 

نتفة هوا زيادي….يعني صار غير طقس….

بسّ أنا…هيدا الطقس …من دون هوا بالزايد أو هوا بالنقص…هوّي أفضل طقس لئلي…

فما في… يجي يقلّي إنّو هيدا أفضل طقس لئلو..لكن مع نتفة هوا زيادة…

ما غير شي بصير…

.

 

قلتلّو أنا…

اتطلّع فيي هوّي..اتفاجأ..وسطّل..

وكفّا متل كأنّو شي ما كان…..

 

كسّ إختها الواحد شو لازم يكون دقيق…وحربوق….وواضح….وواثق….ونبيه…لمّا بيحكي…..

خصوصي لمّا يجي يحكي عن الطقس….

 

إحترماتنا….

بلا حركات

إنو هيك يعني طلعت الخبريّة بالآخر؟…..

هيدي الطنّة والرنّة….اللّي…فلقتونا فيها….

وهيدي الهمروجة اللّي ربّيتونا عليها….

طلعت كلّها فالصو؟….

 

لاه روئوا طولوا بالكن….

..إنّو…مرحبا….

 

ولاه….

 

ولاه من أوّل ما خلقت…

وإنتو نازلين فيي وباللّي من جيلي….

 خطابات ونظريّات…..

على إنّو لبنان الأرز….

و لبنان الأخضر ومدرشنّي…..

 

كنت بإيطاليا وبفرنسا من أسبوعين…..

اندوخت قدّ ما في خضار هونيك….

عناّ ببيروت…صرنا عم نشتهي الشجرة….

ولاه….أكبر خضار عنّا صفّى سوكلين…..

 

 

من أوّل ما خلقت…

وإنتو نازلين فييّ على إنّو…

وين ما تروح ما فيش متل لبنان….

أكيد ما فيش متل لبنان…..

شايفين شي بلد أهلوا بيحكوا تلات لغّات بالقليلة….

وبفشخوا عبعضن بالأكل والشرب والسيّارات والتياب…

وأكل الهوا…والسهر والسياسة والنظريّات….

وما في عندن لا كهربا ولا ماي ولا استشفى؟….

 ولاه….

بدل ما ننفبر بالعربي وبالفرنساوي وبالإنغليزي…

نفسّر للعالم إنّو ما فيش عنّا كهربا….وننبسط بالخبريّة…..

ونشوف حالنا على إنّو نحنا “تري لانغ” أو “تراي لنغويل”…

أنا بفضّل باللّبناني..بسّ ياللبناني..قول

 “كتّر خير أللّه عنّا كهربا…. وماي واستشفى وفينا انعيش متل البشر”

 

من أوّل ما خلقت…

وإنتو نازلين فييّ على إنّو…

“لبنان كان في ترام…وسكّة الترام….” وكنتوا تضّحكوا من بعدا…

وأنا لمّا كنت بفرنسا من أسبوعين….

كمان خبّرتن بالفرنساوي…

إنّو “لبنان كان في ترام …وسكّة الترام….” وكمان اتضحّكت من بعدا…

قامو رجعوا هنّي اتضحّكوا من بعدي….

 اتضحّكوا لأنّو هنّي بعدو عندن “الترام وسكّة الترام….”

وهيدا الترام… صار شي عادة جدّاً بالنسبة لئلن….

متل الكهربا يعني…

كان بدّي اتضحّك عن جديد وقلّن إنّو نحنا بعدنا ناطرين الكهربا…..

بسّ استحيت….

 

 

من أوّل ما خلقت…

وإنتو نازلين فييّ على إنّو…

الأكل اللّبناني هوّي أطيب أكل….

دخيل عرضكن عملولكن برمي بلبنان….بتشوفو….

كيف إنّو المطاعم كلّها…يا أما أرمنيّة…يا أما أميركيّة….يا أما فرنساويّة….

يا أمّا يابانيّة…..يا أمّا صينيّة….يا أمّا طليانيّة…..يا أمّا هنديّة….

أووف تعبت….

وهودي كلّن طيبين عفكرة….وأطيب أكل كمان…..

والبرهان إنّو لبنان..مليان مننّ….

 

من أوّل ما خلقت…

وإنتو نازلين فييّ على إنّو…

نحنا عنّا النايت لايف…..غير شكل…

بسّ بدّي قلكن….

إنّو النايت لايف اللّي عنّا…

متلا متل اللّي عند غيرنا…..

بس نحنا منعمل منّها همروجي زيادة عن اللزوم…

طلعوا لبرّا وبتشوفوا…..

 

من أوّل ما خلقت…

وإنتو نازلين فييّ على إنّو…

إنّو نحنا كتير منحبّ الحياة لأنّو ما منعرف بكرا شو مخبّالنا….

إي أنا بفضل حبّ الحياة شويّ… وأعرف بكرا شو مخبّالي مثلاً….

وبسّ أعرف بكرا شو مخبّالي… بصير فينيّ حبّ الحياة كتير مش شويّ…

 

من أوّل ما خلقت…

وإنتو نازلين فييّ على إنّو…

اللّه خلقنا وكسر القالب…..

وإنّو نيّال اللّي عندو مرقد عنزة بلبنان….

وبلا بلا بلا بلا بلا بلا بلا….

ليكوا ..اللّه بحبّ اللّبنانيّة قد… ال “مش” لبنانيّة….

والقالب بعدوا ما انكسر..

وبعدوا ألله عم يخلق متلنا وأفضل منّا…

 

وأنا برأيي…

إنّو لازم نطلع منّها هالحركات كلّها بقا….

وننتبه عحالنا….

ونعيش بلا حركات….

 

إحترماتنا….